8 تامىز, 15:52 329 0 ايماق "تۇركىستان" گازەتىنىڭ اۆتورلارى

ءال-فارابي ءۇيى ىستامبۇل تورىندە اشىلدى  

تۇركيانىڭ ىستامبۇل شاھارىندا ءال-فارابي اتىنداعى قازاق ۇلتتىق ۋنيۆەرسيتەتى «رۋحاني جاڭعىرۋ» مەملەكەتتىك باعدارلاماسى مەن ەلباسى ن.ءا. نازارباەۆتىڭ «ۇلى دالانىڭ جەتى قىرى» ماقالاسىنداعى نەگىزگى ماقسات-مىندەتتەردى جۇزەگە اسىرۋ ماقساتىندا ءال-فارابي ءۇيىن اشتى. جوبانى قازۇۋ ىستامبۇل قالالىق اكىمدىگىمەن بىرلەسە وتىرىپ، تۇركى كەڭەسى، تۇركسوي جانە تۇركياداعى قازاقستان رەسپۋبليكاسى ەلشىلىگىنىڭ قولداۋىمەن جۇزەگە اسىردى.

شارانىڭ سالتاناتتى اشىلۋىنا ىستامبۇل قالاسى اكىمىنىڭ ورىن­باسارى شەنگۇل ارسلان (Şengül ALTAN ARSLAN) حانىم، ىستامبۇل ۋنيۆەرسيتەتىنىڭ رەكتورى ماحمۇت اك، «تۇركسوي» باس حاتشىسى دۇيسەن قاسەيىنوۆ، تانىمال تۇركى قايراتكەرى، اتاقتى كينواكتەر سەردار گوكحان، تۇركيا قازاقتارى قورىنىڭ توراعاسى پازىل توپلى، تۇركياداعى قازاقستان رەسپۋبليكاسى ەلشىلىگى مەن ىستامبۇلداعى قر باس كونسۋلدىعىنىڭ وكىلدەرى جانە ەۋروپاداعى قازاق دياسپوراسى قاتىستى. سونىمەن قاتار، تۇركى الەمى ەتنوگرافيالىق مۇراجاي-كەشەنىندە وتكەن سالتاناتتى شاراعا تۇرىك، تاتار، باشقۇرت، قىرعىز، وزبەك، ءازىربايجان جانە باسقا دا تۇركى ۇلتتارىنىڭ زيالى قاۋىمى كەلىپ ۇلى ويشىلدىڭ ءۇيىنىڭ اشىلۋىنا كۋا بولدى.

شارانى ءال-فارابي اتىنداعى قازاق ۇلتتىق ۋنيۆەرسيتەتىنىڭ رەكتورى، اكادەميك عالىم مۇتانوۆ رەسمي قۇتتىقتاۋ سوزىمەن باستاپ اشتى. ول ءوز سوزىندە: «ءال-فارابي بابامىزدىڭ اسىل مۇراسىن زەرتتەپ، زەردەلەپ، دارىپتەۋدە جانە بابامىزدىڭ مۇراجاي-ءۇيىن اشۋدا جان-جاقتى قولداۋ كورسەتىپ وتىرعان بارشاڭىزعا، اتاپ ايتقاندا: ىستامبۇل قالاسى مەرياسىنا جانە قالا مەرى ەكرەم يماموگلۋ مىر­زاعا، تۇركى كەڭەسىنىڭ باس حاتشىسى باع­دات قۇلتايۇلى امىرەەۆكە، قازاقستان رەس­پۋبليكاسىنىڭ تۇركيا رەسپۋبليكاسىنداعى توتەنشە جانە وكىلەتتى ەلشىسى ابزال ساپاربەك­ۇلىنا، تيۋركسوي تۇركى مادەنيەتى حالىق­ارالىق ۇيىمىنىڭ باس حاتشىسى دۇيسەن قۇرابايۇلى قاسەيىنوۆكە، بۇۇ وركەنيەتتەر اليانسى تۇركيا ۇلتتىق ۇيلەستىرۋ كوميتەتىنىڭ پرەزيدەنتى بەكىر قارلىعاعا، تۇركى الەمى مادەني ورتالىعىنىڭ بۇرىنعى ديرەكتورى كەمال كاپتانەر مىرزاعا العىسىمىز شەكسىز»، –  دەپ جيىلعان جۇرتتىڭ الدىندا ۇيىمداستىرۋشىلار اتىنان ەرەكشە ءىلتيپاتىن ءبىلدىردى.

ىستامبۇل قالاسى اكىمىنىڭ ورىنباسارى شەنگۇل ارسلان حانىم ءوز قۇتتىقتاۋ سوزىندە «ۇلى ءال-فارابي، تەك شىعىس الەمى ءۇشىن عانا ەمەس، باتىس ەلدەرى ءۇشىن دە ايتۋلى وقيعا. ول تەك تۇركى دۇنيەسىنىڭ عانا ەمەس، بارشا ادامزاتقا ورتاق ماقتانىش. عۇلامانىڭ عىلىمي مۇرالارىن زەرتتەۋ، ناسيحاتتاۋ، ولاردى كەلەشەككە جەتكىزۋ بورىشىمىز. ەندى وسى ءۇيى ارقىلى ءال-ءفارابيدى، ونىڭ مول مۇراسىن كۇللى تۇركى جۇرتى جاقىن تانىساتىن بولدى. سوندىقتان دا وسى جوباعا ۇيىتقى بولىپ، جۇزەگە اسىرعان عالىم مۇتانۇلى باستاعان قازاقستان ۇلتتىق ۋنيۆەرسيتەتى ۇجىمىنا ەرەكشە العىسىمدى بىلدىرەمىن» دەپ، اعىنان جارىلىپ، ۋنيۆەرسيتەت باسشىسىنا «ىستامبۇل» اتتى البوم سىيلادى. ءوز كەزەگىندە عالىم مۇتانۇلى قازاقى سالتپەن شەنگۇل حانىمنىڭ يىعىنا كامزول جاۋىپ، ءال-فارابي كادەسىيىن ەستەلىككە سىيعا تارتتى.

سونداي-اق، ع. مۇتانوۆ ۋنيۆەرسيتەت اتىنان ءال-فارابي ءۇيىنىڭ ىستامبۇل شاھارىندا اشىلۋىنا ەرەكشە ەڭبەك سىڭىرگەن تۇركى الەمى ەتنوگرافيالىق مۇراجاي-كەشەنىنىڭ بۇرىنعى جانە قازىرگى باسشىلارىن «ءال-فارابي» مەدالىمەن ماراپاتتادى.

 

ج.ءاشىم

سوڭعى جاڭالىقتار