7 تامىز, 23:44 505 0 ءبىلىم دينارا مىڭجاسارقىزى

ستۋدەنتتىك «Climate Week» ەكولوگيالىق فەستيۆالى باستالدى

 5 تامىز كۇنى قازاق ۇلتتىق اگرارلىق ۋنيۆەرسيتەتىندە   ستۋدەنتتىك «Climate Week» ەكوولگيالىق فەستيۆالى اشىلدى.

بۇل شارانى نازارباەۆ ۋنيۆەرسيتەتى، «قازاقستاندىق ۇلتتىق گەوگرافيالىق قوعام» مەن Green Campus كەڭسەسى، قازاقستانداعى بۇۇ دامۋ باعدارلاماسى جانە قازاق ۇلتتىق اگرارلىق ۋنيۆەرسيتەتى بىرلەسە ۇيىمداستىردى. جاستاردىڭ ەڭسەسىن كوتەرگەن يگى ءىستىڭ جوعارى دەڭگەيدە وتۋىنە الماتى قالاسىنىڭ اكىمدىگى، «Almighty Ecology» قوعامدىق قورى جانە حالىقارالىق جاسىل تەحنولوگيالار جانە ينۆەستيتسيالىق جوبالار ورتالىعى قولداۋ ءبىلدىردى.

فەستيۆال جاستار جىلى اياسىندا جانە ول كليمات وزگەرۋ سالاسىنداعى شارالارعا ارنالعان سامميت-2019 قارساڭىندا ءوتىپ وتىر. ول ستۋدەنتتەردىڭ بويىندا ەكولوگيالىق مادەنيەتتى قالىپتاستىرۋعا جانە ەكو-ءتۋريزمدى دامىتۋعا باعىتتالعان. فەستيۆال بارىسىندا قازاقستانداعى بۇۇ دامۋ باعدارلاماسىنىڭ قولداۋىمەن «كليماتتىڭ وزگەرۋى» تاقىرىبىندا كرەاتيۆتى باياندامالار بايقاۋى،  Green Campus كەڭسەسى مەن قازاقستاندىق ۇلتتىق گەوگرافيالىق قوعامنىڭ تۇساۋكەسەر راسىمدەرىن وتكىزۋ كوزدەلگەن.

فەستيۆالعا نازارباەۆ ۋنيۆەرسيتەتى جانە ونىڭ ارىپتەس جوعارى وقۋ ورىندارى: قازاق ۇلتتىق اگرارلىق ۋنيۆەرسيتەتى، الماتى ەنەرگەتيكا جانە بايلانىس ۋنيۆەرسيتەتى، Satbayev University, ءال-فارابي اتىنداعى قازاق ۇلتتىق ۋنيۆەرسيتەتى، قازاق-بريتان تەحنيكالىق ۋنيۆەرسيتەتى، قاراعاندى مەملەكەتتىك ۋنيۆەرسيتەتىنىڭ ستۋدەنتتەرى قاتىستى.

قازۇاۋ رەكتورى، اكادەميك تىلەكتەس ەسپولوۆ قاتىسۋشىلاردى فەستيۆالدىڭ اشىلۋىمەن قۇتتىقتاپ، ۋنيۆەرسيتەتتەگى «نازارباەۆ ءبىلىم جانە عىلىم ورتالىعى»،  قازاقستان-جاپون يننوۆاتسيالىق ورتالىعى، اگروتەحنولوگيالىق حابتىڭ عىلىمي-تاجىريبەلىك-يننوۆاتسيالىق زەرتحانالارىنىڭ جۇمىسىمەن تانىستىردى.

فەستيۆالدىڭ رەسمي بولىمدەرىنەن سوڭ ۇيىمداستىرۋشىلار جاستاردى الماتى وبلىسىنداعى شارىن شاتقالىنا، كورىكتى كولساي، قايىڭدى كولدەرىنە ارنايى ساياحاتقا اپارادى.

سوڭعى جاڭالىقتار