6 تامىز, 16:09 595 0 ءبىلىم دينارا مىڭجاسارقىزى

ارىستىڭ مەكتەپتەرى جاڭا وقۋ جىلىنا دايىن

 قر ءبىلىم جانە عىلىم ءمينيسترى اسحات ايماعامبەتوۆ ارىستاعى جاڭا وقۋ جىلىنا دايىندىق تۋرالى ايتىپ بەردى، دەپ حابارلايدى قازاقپارات ءتىلشىسى.

«ءبىز ارىسقا بىرنەشە رەت باردىق. قازىرگى ۋاقىتتا وندا ءبىلىم جانە عىلىم مينيسترلىگىنىڭ وكىلى ءجۇر. ول مەكتەپتەردەگى جوندەۋ جۇمىستارىن قاداعالايدى. جاڭا وقۋ جىلىنا قالا مەن ونداعى ءبىلىم بەرۋ مەكەمەلەرى تولىق دايىن بولادى دەپ ايتا الامىز»، - دەدى اسحات ايماعامبەتوۆ ەلوردادا «Burabay Forum» اشىلۋىندا تىلشىلەرگە بەرگەن سۇحباتىندا. سونىمەن بىرگە، مينيستر مەكتەپتەردىڭ جاي-كۇيى تۋرالى ايتىپ بەردى. «تەرەزەسىنە عانا زاقىم كەلگەن مەكتەپتەر بار. تەك ءىشىنارا جوندەۋ جۇمىستارى قاجەت مەكەمەلەر بولدى. بىراق، ءىس جۇزىندە شامامەن بارلىق مەكتەپكە كۇردەلى جوندەۋ جۇرگىزىلدى. ماسەلەن، جارىلىستان زارداپ شەكپەگەن سپورتتىق زالداردىڭ دا ەدەندەرى اۋىستىرىلدى. اپتا سايىن ارىسقا بارامىز جانە ۇلكەن وزگەرىستەردىڭ كۋاسى بولىپ جاتىرمىز. بارلىق مەكتەپ وقۋ جىلىنا ءازىر بولادى، وعان الاڭداۋدىڭ قاجەتى جوق»، - دەدى ول. بۇعان دەيىن ارىس قالاسىندا 6 704 ءۇيدىڭ جوندەۋ جۇمىستارى اياقتالعانى حابارلانعان ەدى. قالانى قالپىنا كەلتىرۋ جۇمىستارىنا 184 كومپانيا، 7 382 قۇرىلىسشى جانە 298 ارنايى تەحنيكا قاتىسۋدا.

سوڭعى جاڭالىقتار