30 شىلدە, 18:04 857 0 ىشكى ساياسات Túrkistan Gazeti

فرانتسۋز ءمينيسترى قازاقستانعا كەلدى

فرانتسيانىڭ ەكونوميكا جانە قارجى ءمينيسترى بريۋنو لە مەر ەلورداعا ىسساپارمەن كەلدى. بۇل – ونىڭ ورتالىق ازياعا العاشقى ساپارى.

ءىسساپاردىڭ نەگىزگى ماقساتى – قازاقستانمەن جاڭا سەرىكتەستىك قارىم-قاتىناستار ورناتىپ، ىنتىماقتاستىقتى نىعايتۋ.

قر پرەزيدەنتى قاسىم-جومارت توقاەۆ بريۋنو لە مەردى ارنايى قابىلدادى. كەزدەسۋ بارىسىندا مەملەكەت باسشىسى قازاقستان مەن فرانتسيا اراسىندا سەنىمدى ەكىجاقتى ىنتىماقتاستىق ورناعانىن، اسىرەسە، ساۋدا-ەكونوميكالىق جانە ساياسي سالالاردا زور مۇمكىندىكتەر بارىن اتاپ ءوتتى.

– ءبىز فرانتسيانى ەۋروپا وداعى شەڭبەرىندەگى نەگىزگى ارىپتەس رەتىندە قاراستىرامىز. ەو – قازاقستاننىڭ باستى ساۋدا سەرىكتەسى. ەكىجاقتى ساۋدا كولەمى 4,5 ميلليارد دوللارعا جەتتى. ال فرانتسيادان ەل ەكونوميكاسىنا تارتىلعان تىكەلەي ينۆەستيتسيالار كولەمى 15 ميلليارد دوللاردان استى، – دەدى قاسىم-جومارت توقاەۆ.

مەملەكەت باسشىسى قازاقستاندا جۇمىس ىستەپ جاتقان فرانتسۋز كومپانيالارىنىڭ تابىستى قىزمەتىن اتاپ ءوتىپ، فرانتسيا مينيسترىنە ەلىمىزدە ولاردىڭ تيىمدى جۇمىس ىستەۋى ءۇشىن بارلىق جاعداي جاسالاتىنىن ايتتى.

ب.لە مەر قازاقستان پرەزيدەنتىنە جىلى قارسى العانى ءۇشىن العىسىن ءبىلدىرىپ، فرانتسيا مەن قازاقستاندى كوپجىلدىق ءوزارا ءتيىمدى ستراتەگيالىق سەرىكتەستىك بايلانىستىراتىنىن اتاپ ءوتتى. فرانتسيانىڭ ەكونوميكا جانە قارجى ءمينيسترى ەكى ەل اراسىنداعى ءوزارا جەمىستى ءىس-قيمىلداردى بارىنشا ارتتىرۋعا نيەتتەستىك ءبىلدىردى.

سوڭىندا مەملەكەت باسشىسى فرانتسيا كوشباسشىسى ەممانيۋەل ماكرونعا سالەم جولداپ، ىزگى تىلەگىن ءبىلدىردى.

بريۋنو لە مەر ودان بولەك ەلەكتروۆوز قۇراستىرۋ زاۋىتىندا بولدى.

«بىزدە يادرولىق سالادا، ۇشاق شىعارۋدا (Airbus), قۇجاتتاما قاۋىپسىزدىگى، ەنەرگەتيكا (Total) سالاسىندا ىنتىماقتاستىق ورناتىلعان. بارلىق جوبالارىمىزدىڭ ءساتتى جۇزەگە اسقانىن قالايمىز»، - دەدى فرانتسيا ءمينيسترى استاناداعى «ەلەكتروۆوز قۇراستىرۋ زاۋىتىندا» تىلشىلەرگە بەرگەن سۇحباتىندا.

مينيستر تەمىرجول كولىگىنە جۇيەلەر مەن قۇرال-جابدىقتار شىعاراتىن فرانتسيالىق Alstom كومپانياسىنىڭ نۇر-سۇلتانداعى جۇمىسىمەن تانىستى.

«بۇل زاۋىت قازاقستان مەن فرانتسيا اراسىنداعى ەكونوميكالىق ىنتىماقتاستىقتىڭ ايعاعى ىسپەتتەس. تەمىر جولدى دامىتۋ سالاسىنداعى سەرىكتەستىك ءبىزدىڭ ەلىمىز ءۇشىن ماڭىزدى ستراتەگيالىق باعىت بولىپ سانالادى. مەن ءۇشىن ازەربايجانعا ەكسپورتقا باعىتتالعان لوكوموتيۆتىڭ سالتاناتتى اشىلۋىنا قاتىسۋ – ۇلكەن عانيبەت. ەكى ەل اراسىنداعى تەمىرجول سالاسىنداعى سەرىكتەستىك قارىم-قاتىناستى جالعاستىرامىز. اتاپ ايتقاندا، جولاۋشىلار جانە جۇك لوكوموتيۆتەرىن ءوندىرۋ جانە سيگناليزاتسيا سالالارىندا. دابىل قاعۋ بويىنشا ءبىز ءۇشىن ماڭىزدى جوبالار بار. Alstom كومپانياسىنىڭ قازاقستاننىڭ تەمىر جول ۆوكزالدارىن دابىل قاعۋ جۇيەسىمەن جابدىقتاۋىن قالايمىز»، - دەدى ول. ساپار بارىسىندا فرانتسيانىڭ ەكونوميكا جانە قارجى ءمينيسترى بريۋنو لە مەر «ەلەكتروۆوز قۇراستىرۋ زاۋىتىنىڭ» وندىرىستىك بولىكتەرىمەن تانىستى. وعان ازەربايجان تەمىر جولىمەن كەلىسىمشارت اياسىندا ازىرلەنگەن №Z8A0008 لوكوموتيۆىن كورسەتتى. اتالعان كەلىسىمشارتقا سايكەس، ازەربايجانعا 50 لوكوموتيۆ قۇراستىرىلماق.

«تەمىرجول سالاسىنان بولەك، قازاقستان – فرانتسيانىڭ ستراتەگيالىق ارىپتەسى. قازاقستان ءۇشىن فرانتسيا – ەۋروپاعا ەنۋدەگى سەنىمدى سەرىكتەس. فرانتسيادا جاڭا دامىعان تەحنولوگيالار بار، ونەركاسىپ سالاسى جاقسى دامىعان. سوندىقتان، فرانتسيا قازاقستانمەن ىنتىماقتاستىق ورناتقىسى كەلەدى. سالدەن سوڭ، قازاقستان رەسپۋبليكاسىنىڭ پرەزيدەنتىمەن جانە پرەمەر-مينيسترىمەن كەزدەسەمىن. وندا قر تۇڭعىش پرەزيدەنتى نۇرسۇلتان نازارباەۆتىڭ تۇسىنداعى تىعىز ارىپتەستىكتى ەسكە سالسام دەيمىن. جانە تاعى قانداي باعىتتاردا ىنتىماقتاستىقتى دامىتا الامىز، سونى تالقىلاعىم كەلەدى»، - دەدى بريۋنو لە مەر.

سوڭعى جاڭالىقتار