30 شىلدە, 11:19 537 0 كولىك Túrkistan Gazeti

ەرەكشە كورمە ءوتتى

تارازدا تۇڭعىش رەت اۆتوكولىكتەر كورمەسى ءوتتى. وندا قويىلعان كونە تەمىر تۇلپارلاردان باستاپ سوڭعى ۇلگىدەگى وتە قىمبات كولىكتەردىڭ كوللەكتسياسى كوپشىلىكتى ءتانتى ەتتى.

شاھار ورتالىعىنداعى «جاستار» اللەياسىندا وتكەن ەرەكشە كورمەگە حالىق وتە كوپ جينالدى. شارانى «دجيپ كلۋب تاراز» توبى جانە وبلىس اكىمدىگى بىرلەسە ۇيىمداستىرعان.

ۇيىمداستىرۋشىلار كورمەگە قالاداعى ەڭ ادەمى دەگەن 50-گە جۋىق اۆتوكولىك جانە 10 شاقتى موتوتسيكل ارنايى تاڭدالىپ الىنعانىن ايتادى. ماركاسى جاعىنان بىرىنەن ءبىرى وزا شاپقان تەمىر تۇلپارلار كوزدىڭ جاۋىن الىپ، كورۋشىلەردى قىزىقتىرا ءتۇستى. كورمەگە كەلۋشىلەر وزدەرىنە ۇناعان كولىكتىڭ جانىندا فوتوعا ءتۇسىپ، قىزىقتاپ جاتتى. ءتىپتى اتىشۋلى «بريگادا» سەريالىنداعى كولىكتەر دە بۇل كورمەدەن تابىلدى. ۇيىمداستىرۋشىلار قالا بەردى سوناۋ سوعىستان بەرى سارى مايشا ساقتالعان اۆتوكولىكتەردى دە مۇندا اكەلگەن.

«فەستيۆالگە 50-گە جۋىق تەمىر تۇلپار قاتىستى. اراسىندا ايگىلى «بريگادا» سەريالىندا بوي كورسەتكەن گاز 21 ۆولگا، Lincoln Town Car اۆتوكولىكتەرى دە بار. سونداي-اق، قالىڭ جۇرتشىلىق نازارىنا ەكىنشى دۇنيەجۇزىلىك سوعىستىڭ كوزىن كورگەن كولىكتەر دە تانىستىرىلدى. سونىڭ ءبىرى Ford GPW اۆتوكولىگىن يەسى كورمەگە ەۆاكۋاتورمەن اكەلدى. كۇن كوزىنە شاعىلىسقان مەرسەدەس پەن اۆتواۋەسقويلاردىڭ قىزىعۋشىلىعىن تۋدىرعان بمۆ-ءنى دە ءدال وسى جەردەن تاپتىق»،- دەيدى «دجيپ كلۋب تاراز» توبىنىڭ مۇشەسى ەۆگەني دۋيۋنوۆ.

كورمەگە قويىلعان كولىكتەردىڭ ىشىندەگى ەڭ كونەسى — «گاز – 67» اۆتوماشيناسى. بۇل تەمىر تۇلپاردىڭ يەسى – ءابدۋجاليل قۇربانوۆ. ۇزىن سانى 20 اۆتوكولىك قۇراستىرعان ول مۇندا ونىڭ التاۋىن اكەلگەن.

«جاستار» جىلى مەن جامبىل وبلىسىنىڭ 80 جىلدىعىنا ورايلاستىرىپ وتكىزىلگەن اۆتوكولىكتەر كورمەسىن ەندى جىل سايىن وتكىزۋ جوسپارلانىپ وتىر.

 

سوڭعى جاڭالىقتار