26 شىلدە, 18:02 438 0 نۇر وتان اسەل انۋاربەك

Nur Otan apta

باسپانالى بولۋعا باستايتىن باعدارلاما

«Nur Otan» پارتياسىنىڭ «باقىتتى وتباسى» جوباسى بويىنشا پاۆلوداردا قۇجات قابىلداۋ باستالدى.

 

بۇل باعدارلامانىڭ كومەگىمەن كوپبالالى، تولىق ەمەس جانە مۇمكىندىگى شەكتەۋلى بالا تاربيەلەپ وتىرعان وتباسىلار تۇرعىن ءۇي قۇنىنىڭ 10 پايىزدىق باستاپقى جارناسىن تولەگەن جاعدايدا 20 جىلعا دەيىن كرەديت بەرۋ مەرزىمىمەن جىلدىق 2 پايىز ستاۆكا بويىنشا قارىز الا الادى.

قالالىق تكش ءبولىمى تۇرعىن ءۇيدى ءبولۋ سەكتورىنىڭ مەڭگەرۋشىسى اقەركە ەلامانوۆانىڭ ايتۋىنشا، قابىلداۋ باستالعالى بەرى پاۆلودارداعى 50 وتباسىنىڭ قۇجاتتارى قابىلدانىپتى. سپيكەر باعدارلاماعا كوپبالالى نەمەسە تولىق ەمەس وتباسىلار، مۇمكىن­دىگى شەكتەۋلى بالالاردى تاربيەلەپ وتىرعان وتباسىلار قاتىسا الادى دەپ ءتۇسىندىردى. بۇل رەتتە ولار جوعارىدا كورسەتىلگەن ساناتتاردىڭ ءبىرى بويىنشا تۇرعىن ءۇي الۋعا كەزەكتە تۇرعانى ءجون. سونداي-اق، وتباسىنىڭ ءاربىر ءمۇ­شە­سىنە شاققانداعى تابىسى 42 500 تەڭگەدەن اسپاۋى قاجەت.

دەگەنمەن ءوتىنىش بەرۋشى تولەۋگە قابىلەتتى بولۋى ءتيىس، ياعني، جۇمىسى بولۋى كەرەك. ەگەر دە اناسى بالا كۇتىمىمەن دەمالىستا بولسا، باعدارلاماعا اكەسى قاتىسا الادى. تاعى ءبىر ايتا كەتەر جايت، وتباسىندا وتەلمەگەن نەسيە بولماۋ كەرەك نەمەسە نەسيەنى تولىق تولەگەننەن كەيىن باعدارلاماعا قاتىسۋعا ءوتىنىش بەرە الادى.

«وتىنىمدەردى قابىلداۋ ءليميتى جوق. ءبىز بارلىق قۇجاتتى شىلدەنىڭ اياعىنا دەيىن قابىلدايمىز. تۇرعىن ءۇي الۋ كەزەگىندە 4 مىڭ تولىق ەمەس وتباسى، مۇگەدەك بالالار تاربيەلەپ وتىرعان 135 وتباسى، 411 كوپبالالى وتباسى تۇر. ولاردىڭ ءبارىنىڭ «باقىتتى وتباسى» باعدارلاماسىنا قاتىسۋعا مۇمكىندىگى بار. قۇجاتتاردى تولىق قابىلداپ بولعان سوڭ، ولاردى تۇرعىن ءۇي قۇرىلىس جيناق بانكىنە تاپسىرامىز. باعدارلاما ءۇش جىلعا ەسەپتەلگەن. بيىل تاپسىرىستارىن ماقۇلداماعاندار كەلەر جىلى باق سىناپ كورە الادى»، – دەيدى اقەركە ەلامانوۆا.

تۇرعىن ءۇيدى ءبولۋ سەكتورىنىڭ مەڭگەرۋشىسى اتاپ وتكەندەي، ءتورت جانە ودان دا كوپ كامەلەتكە تولماعان بالالار مەن جوعارى وقۋ ورىندارىندا نەمەسە كوللەدجدەردە وقيتىن 23 جاسقا دەيىنگى بالالار تاربيەلەپ وتىرعان وتباسىلار كوپبالالى بولىپ ەسەپتەلەدى. باعدارلاماعا قاتىسۋشى 10 ملن تەڭگەگە دەيىن تۇرعىن ءۇي ساتىپ الۋعا قارىز الا الادى. تۇرعىن ءۇيدى باستاپقى جانە قايتالاما نارىقتان ساتىپ الۋعا بولادى.

ءوتىنىش بەرۋ ءۇشىن وزىمەن بىرگە ءوتىنىش، جەكە كۋالىك، نەكە قيۋ، نەكە بۇزۋ تۋرالى كۋالىك نەمەسە جۇبايىنىڭ قايتىس بولۋى تۋرالى كۋالىك، بالالاردىڭ تۋ تۋرالى كۋالىگى كەرەك. سونداي-اق، ءوتىنىش بەرۋشى مەن ونىمەن بىرگە تۇراقتى تۇراتىن وتباسى مۇشەلەرىن تىركەۋ تۋرالى مەكەنجاي انىقتاماسى، جىلجىمايتىن مۇلىك تۋرالى انىقتاما، مەملەكەتتىك جاردەماقىلار مەن اليمەنتتەر ەسەبىنسىز سوڭعى جارتى جىل ىشىندەگى تابىسى تۋرالى مالىمەتتەر، ءوتىنىش بەرۋشىنىڭ ساناتىن راستايتىن قۇجات تا بولۋى قاجەت. ايتا كەتەيىك، بۇل قۇجاتتاردىڭ كو­شىر­مەلەرى عانا قابىلدانادى.

 

ۋاقىت تالابىمەن ۇندەسكەن ورتالىق

«Nur Otan» پارتياسىنىڭ» قازاقستان كىتاپحانالارى – زاماناۋي ءبىلىم ورتالىقتارى» پارتيالىق جوباسى اياسىندا ءبىلىم نارىمەن سۋسىنداتاتىن جاڭا رۋحاني قازىنا ورتالىعى اشىلدى. قوستاناي وبلىسىنا قاراستى قارابالىق اۋىلىنداعى ورتالىقتىڭ تۇساۋى قر پارلامەنتى ءماجىلىسىنىڭ دەپۋتاتى يرينا ارونوۆانىڭ جۇمىس ساپارى اياسىندا كەسىلدى.

«باستىسى، جاستاردىڭ جاڭاشا ءبىل­ىم الىپ، ونى دۇرىس پايدالانا ءبىلۋى. تەحنولوگيالاردىڭ كەلەشەگى زور. سوندىقتان يننوۆاتسيالىق ءبىلىم الۋعا مۇمكىندىك جاساۋ – مەملەكەت ساياساتىنىڭ ماڭىزدى باعىتتارىنىڭ ءبىرى. «قازاقستان كىتاپحانالارى – زاماناۋي ءبىلىم ورتالىقتارى» جوبا-سىنىڭ شەڭبەرىندە قازىر ەلىمىزدە كىتاپحانالار وسىنداي ۋاقىت تالابىنا ساي ءبىلىم ورتالىقتارىنا اينالدىرىلىپ، ءتيى­سىن­­شە جابدىقتالىپ، ەلەكتروندى ۇلگىگە كوشىرىلۋدە»، – دەيدى قر پارلامەنتى ءماجىلىسىنىڭ دەپۋتاتى يرينا ارونوۆا.

مۇندا ءتۇرلى ادەبيەتتەرمەن، وقۋ قۇرالدارىمەن قاتار، كەز كەلگەن اقپاراتتى ونلاين رەجىمدە الۋعا مۇمكىندىك جاسالعان. ورتالىق ينتەرنەت جەلىسىمەن، تسيفرلى تەحنولوگيالارمەن، قاجەتتى جيھازدارمەن تولىقتاي قامتاماسىز ەتىلگەن. كەلۋشىلەر ءۇشىن مۇندا قاجەتتى اقپارات الىپ قانا قويماي، ءوزارا وي-پىكىر، تاجىريبە الماسۋعا، شىعارماشىلىق ەڭبەكپەن اينالىسۋعا دا مۇمكىندىك زور.

«كىتاپحانا جۇيەسى قايتا جاڭعىرتىلۋدا. كلاسسيكالىق باعىت بويىنشا كىتاپ بۇرىنعىداي بەرىلەدى. قازىر بۇل باعىتتار باسقاشا وزگەرۋدە. ياعني، حالىقپەن جۇمىس جاساۋعا باسىمدىلىق بەرىلەدى. ءتىپتى، وقىرماننىڭ ءوزى وزگەرىپ، ءبىلىمدى ادامدار سانى ارتا تۇسەدى. وسىنداي كوۆوركينگ ورتالىقتاردىڭ كىتاپحانادا اشىلىپ، ءتۇرلى قىزمەتتەردى جاڭا جۇيەدە ۇسىنۋى – تسيفر­لاندىرۋعا قاراي جاساعان كەزەكتى قادام دەپ ءبىلۋىمىز كەرەك»، – دەيدى كىتاپحانا قىزمەتكەرى ءۇمىت عالەەۆا.

بۇل ورتالىق كىتاپتىڭ، ءتۇرلى ادەبيەتتەردىڭ دە قادىرىن ارتتىرىپ، كوپشىلىكتىڭ ءوز ۋاقىتىن ءتيىمدى وتكىزۋىنە سەپتىگىن تيگىزەرى ءسوزسىز. ايتا كەتۋ كەرەك، بۇل وڭىردەگى وسىمەن التىنشى ورتالىق. اۋدان تۇرعىندارى حالىققا قىزمەت كورسەتۋ ورتالىعىنا جۇگىنبەي-اق، بىرقاتار قىزمەت تۇرلەرىن دە وسى ورتالىقتان الا الادى.

 

 

«Qutty meken» قۇت بولماق

 

«Nur Otan» پارتياسىنىڭ قوستاناي وبلىسى، دەنيسوۆ اۋداندىق فيليالىنىڭ قىزمەتكەرلەرى مەن مونيتورينگتىك توپ مۇشەلەرى «Qutty meken» پارتيالىق جوباسى اياسىندا اتالمىش اۋدانعا قاراستى انتونوۆ اۋىلىنداعى سۋ قۇبىرىن سالۋ جۇمىستارىمەن تانىستى.

سۋ قۇبىرىن سالۋ جۇمىستارىمەن اينالىسىپ جاتقان «ينسەكت» جشس مەردىگەرى ۇسەرباي اسانباەۆ: «سۋمەن قامتۋ جۇيەسى رەسپۋبليكالىق بيۋدجەت ەسەبىنەن قارجىلاندىرىلادى. الايدا سۋ تارتۋ جۇمىستارى بەلگىلەنگەن مەر­زىمىنەن بۇرىن اياقتالۋدا. انتونوۆ جانە الچانوۆ اۋىلدارىندا ءبىزدىڭ سە­رىك­تەستىك جۇمىس ىستەيدى. جوباعا سايكەس قۇرىلىس جۇمىستارى كەلەر جىلى اياقتالادى دەپ جوسپارلانعانىمەن، ءبىز اعىمداعى جىلى اياقتاۋدى ماقسات ەتىپ وتىرمىز»، – دەيدى.

دەنيسوۆ اۋدانىنا ارنايى بۇرعىلاۋ تەحنيكاسى اكەلىنگەن. بۇل جولداعى اسفالتتى بۇزباي، قۇبىر تارتۋعا مۇمكىندىك بەرەدى. ارنايى بۇرعىلاۋشى ءۇش مەتر جەر استىندا تران­شەيا ارقىلى قۇبىر جىبەرەدى. ءتىپتى، جەكە ۇيلەرگە سۋدى قوسۋعا مۇمكىندىك بەرەدى. «Qutty meken» جوباسىنىڭ ماقساتى – ينجەنەرلىك جانە الەۋمەتتىك ينفراقۇرىلىمنىڭ دامۋ بارىسىنا پارتيالىق باقىلاۋ جۇرگىزۋ. ءبىز انتونوۆ اۋىلىنا ءىس-ساپار بارىسىندا قۇرىلىس نىساندارىنا باقىلاۋ جۇرگىزدىك. بيۋدجەت قاراجاتىنىڭ ماقساتتى جۇمسالۋى جانە قۇرىلىس ساپاسىنا جانە مەرزىمىنە مونيتورينگ جاساپ، مۇنى حالىققا كەڭىنەن ءتۇسىندىرۋ جۇمىستارىن جۇرگىزۋ ماڭىزدى»، – دەيدى «Nur Otan» پارتياسى دەنيسوۆ اۋداندىق فيليالى توراعاسىنىڭ ءبىرىنشى ورىنباسارى ايگۇل بەكتەمىسوۆا.

ونىڭ ايتۋىنشا، پارتيالىق باقىلاۋ جۇرگىزىپ وتىرۋ جولدار مەن قۇرىلىستاردىڭ، تۇرعىن ۇيلەردىڭ ساپالى بولۋىن قامتاماسىز ەتەدى. سونداي-اق، كوممۋنيكاتسيا، وزگە دە الەۋمەتتىك جانە ينجەنەرلىك ينفراقۇرىلىمدارعا ۋاقىتىلى قول جەتكىزۋ مۇمكىن بولادى.

سۋ قۇبىرىن جۇرگىزىپ جاتقان سەرىكتەستىك ۇزاق جىلدان بەرى بۇل سالادا قىزمەت كورسەتىپ كەلەدى. بۇعان دەيىن ولار سارىكول، مەڭدىقارا، التىنسارين اۋداندارى مەن كوكشەتاۋ وبلىسىن تىرشىلىك كوزى – سۋمەن قامتاماسىز ەتكەن. قوستاناي، قاراعاندى، كوكشەتاۋ مەن وزگە قالالاردان ارنايى ماماندار شاقىرتىلعان.

 

 

كومەك – تەك مۇقتاج جاندارعا

مەملەكەت تاراپىنان الەۋمەتتىك كومەك الۋعا ۇمىتكەر وتباسىلاردىڭ كىرىسىن انىقتاۋ بارىسىندا قاراعاندى وبلىسىندا الاياقتىق ءىس-ارەكەتتىڭ ورىن العانى بەلگىلى بولدى. جاقسى تابىس تاۋىپ وتىرعان ءارى الەۋمەتتىك تۇرعىدان از قامتىلعان توپقا جاتپايتىن ادامدار اي سايىن جاردەماقى الىپ وتىرۋ ءۇشىن كىرىسىن ازايتىپ، جالعان قۇجات جاساپ، ءتۇرلى ايلا-تاسىلدەرگە بارعان.

«Nur Otan» پارتياسى قاراعاندى وبلىستىق فيليالىنىڭ توراعاسى، وبلىس اكىمى ەرلان قوشانوۆ جەرگىلىكتى بيلىككە جانە پارتيانىڭ وبلىستاعى فيليالىنا جاردەماقى الۋعا ۇمىتكەر ازاماتتاردى تەكسەرۋ جونىندە تاپسىرما بەردى. ءوڭىر باسشىسى اتاۋلى الەۋمەتتىك كومەكتى تەك مۇقتاج ادامدار الۋى كەرەكتىگىن تىلگە تيەك ەتتى.

«Nur Otan» پارتياسى جانە الەۋمەتتىك قىزمەت وكىلدەرىنەن قۇرالعان ءموبيلدى توپ ءوز جۇمىسىن اياقتادى. «ءموبيلدى توپتىڭ ماقساتى – جۇمىس ىستەگىسى كەلمەيتىن جانە ءتۇرلى سىلتاۋمەن جۇمىسقا ورنالاسۋ تۋرالى وتىنىشتەردەن باس تارتاتىنداردى انىقتاۋ. سونىمەن قاتار، ءبىزدىڭ ءموبيلدى توبىمىز جاردەماقى الۋ ماقساتىندا ءوزىنىڭ تابىسىن جاسىرعان ادامداردى دا انىقتايدى»، – دەدى پارتيانىڭ قاراعاندى وبلىستىق فيليالى توراعاسىنىڭ ءبىرىنشى ورىنباسارى حاديشا وسپانوۆا.

ۆاكانسيالار باقىلاۋعا الىنىپ، اۋداندىق جانە قالالىق جۇمىسپەن قامتۋ ورتالىعى ارقىلى جىبەرىلسە دە، قاراعاندى وبلىسىندا كىرىسىن جاسىرىپ، جۇمىس ىستەگىسى كەلمەيتىن وتباسىلاردىڭ بارى انىقتالىپ وتىر.  «زەرتتەۋ ناتيجەسىنە سايكەس، 199 وتباسىنىڭ اتاۋلى الەۋمەتتىك كومەك الۋىن قىسقارتۋ تۋرالى شەشىم قابىلداندى. ال قالعان جۇمىستارمەن بولىمشەلىك كوميسسيا اينالىسىپ جاتىر. جازانىڭ ەكى ءتۇرى بار. ايلا-تاسىلگە بارعاندار شىعىن تولەيدى نەمەسە سوت ورگاندارى ارقىلى جازالانادى»، – دەدى جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى اسەم جۇنىسبەكوۆا.

 

 

پارتيا كومەك كورسەتۋگە دايىن

«Nur Otan» پار­تياسى تۇركىستان وبلىس­تىق فيليالىنداعى جۇ­مىس اپتاسى ماقتارال اۋدانىنان باستالدى. مۇندا  «حالىققا كومەك» بىرىڭعاي الەۋمەتتىك تەرەزەسى اياسىن­دا ازاماتتاردى كوشپەلى قابىلداۋ ءوتتى.

بۇدان سوڭ پارتيانىڭ شاردارا اۋداندىق فيليالىندا وتباسىلاردى قولدايتىن «باقىتتى وتباسى» پارتيالىق جوباسى اياسىندا پسيحولوگتار مەن زاڭگەرلەر كەڭەس بەردى. ءىس-شارالار بارىسىندا ازاماتتار الەۋمەتتىك قولداۋعا يە بولسا، ايەلدەرگە نەسيە بەرۋدە كومەك كورسەتۋ ماسەلەلەرى بويىنشا كەڭەستەر مەن قۇقىقتىق كومەكتەر كورسەتىلدى.

«بۇگىندە ءبىز مەملەكەت باسشىسىنىڭ باستاماسىمەن قولعا الىنعان قازاقستاندىقتاردىڭ پروبلەمالارىن بىلۋگە باعىتتالعان #Birge ۇلتتىق اكتسياسىنىڭ قورىتىندىسىن شىعاردىق. وسى ۋاقىت ىشىندە ايماقتىڭ مىڭداعان تۇرعىنىنىڭ ماسەلەسىن شەشۋگە كومەكتەستىك. ارنايى قوعامدىق قابىلداۋ بولمەلەرى مەن ءموبيلدى توپتار جۇمىس ىستەپ، وعان پارتيانىڭ جاستار قاناتىنىڭ وكىلدەرى دە ءوز ۇلەستەرىن قوستى. بارلىعى ەكى مىڭعا جۋىق ادام قابىلدانىپ، 50 مىڭنان استام ءوتىنىش پەن ۇسىنىس جينالدى. وتىنىشتەردىڭ كوپ بولىگى كەنتاۋ جانە ارىس تۇرعىندارىنان كەلدى»، – دەدى «Nur Otan» پارتياسى تۇركىستان وبلىستىق فيليالى توراعاسىنىڭ ءبىرىنشى ورىنباسارى مىندەتىن اتقارۋشى قاليما جانتورەەۆا.

 

 

 

«جاس كاسىپكەر» – جاڭا جوبا

«Jas Otan» جاستار قاناتى ەلوردالىق فيليالى نۇر-سۇلتان قالالىق كاسىپكەرلەر پالاتاسىمەن سەرىكتەستىك جايلى مەموراندۋمعا قول قويدى. مەموراندۋم «جاس كاسىپكەر» جوباسىن ىلگەرىلەتۋ، باعدارلاما اياسىندا جاستاردى كاسىپكەرلىك نەگىزدەرىنە وقىتۋ، جاس كاسىپكەرلەرگە قولداۋ كورسەتۋدى كوزدەيدى.

«جاس كاسىپكەر» باعدارلاماسى – ەلباسى ن.نازارباەۆتىڭ باستاماسىمەن قولعا الىنعان ىسكەر جاستارعا ارنالعان جاڭا وقۋ جوباسى. كاسىپكەرلەر پالاتاسى كاسىپ باستاپ، ءوزىنىڭ باعىتىن تاۋىپ، تابىستى بولعىسى كەلەتىن جاستارعا قولداۋ كورسەتپەك.

«جاستار اراسىندا ءوز كاسىبىن باستاپ، ارماندارىن جۇزەگە اسىرعىسى كەلەتىندەر كوپ. بۇل جاس كاسىپكەرلەر ءۇشىن ۇلكەن مۇمكىندىك بولاتىنىنا سەنەمىن»، – دەيدى  «Jas Otan» جق ەلوردالىق فيليالىنىڭ ءتور­اعا­سى ب.جاندىلداەۆ.

باعدارلاما بويىنشا 18-29 جاس ارالىعىنداعى ازاماتتاردى كاسىپكەرلىككە جۇمىلدىرۋ، قىزىقتى يدەيالاردى قولداۋ، بيزنەس باستاۋعا تاجىريبەلىك وقىتۋ، اۋىل مەن قالادا بيزنەستى دامىتۋدى كوزدەيدى. قاتىسۋشىلار ءوز بيزنەسىنە باستاپقى كاپيتال رەتىندە 200 اەك (505 مىڭ تەڭگە), 8000 اەك-گە دەيىن 6 پايىزدىق مولشەرلەمەمەن نەسيە الۋعا مۇمكىندىگى بار.

 

 

بۇقارالىق سپورتتى دامىتۋ – ورتاق مىندەت

«Nur Otan» پارتياسى ارقالىق قالالىق فيليالىنىڭ مۇرىندىق بولۋىمەن جەرگىلىكتى «قوسىمشا ءبىلىم بەرۋ ورتالىعىمەن» بىرلەسىپ، دوپ دوداسىن ۇيىمداستىردى. وعان شاعىن شاھارداعى جاس جەتكىنشەكتەردەن قۇرالعان 10-عا جۋىق كوماندا قاتىستى.

«بۇقارالىق سپورت – ۇلت دەنساۋلىعىنىڭ كەپىلى. ونى دامىتۋ – بارشانىڭ ورتاق مىندەتى. وسى رەتتە پارتيا تاراپىنان ءتۇرلى سپورتتىق شارالارعا قولداۋ كورسەتىپ ءجۇرمىز. فۋتبول – الەمدەگى تانىمال سپورت ءتۇرى. سول سەبەپتى، جاستاردى بىرىكتىرىپ، تەڭبىل دوپ دوداسىن ۇيىمداستىردىق»، – دەيدى «Nur Otan» پارتياسى ارقالىق قالالىق فيليالى توراعاسىنىڭ ءبىرىنشى ورىنباسارى سابىرجان تاسماعانبەت.

ءبىر اپتاعا سوزىلعان شاعىن فۋتبول ءتۋرنيرى مارەسىنە جەتتى. كوماندالار «ا» جانە «ب» توبىنا ءبولىنىپ ونەر كورسەتتى. توپتان شىققان كوماندالار باس جۇلدە ءۇشىن تالاسقا ءتۇستى. الامان باسەكەنىڭ قورىتىندى ويىنىندا ب.مايلين اتىنداعى №3 ورتا مەكتەپتىڭ كومانداسى مەن ى.التىنسارين اتىنداعى گيمنازيا اياقدوپشىلارى ءوزارا سىنعا ءتۇستى. تارتىستى ويىندا ب.مايلين اتىنداعى №3 ورتا مەكتەپتىڭ كومانداسىنىڭ مەرەيى ۇستەم بولىپ، جارىس جەڭىمپازى جانە «Nur Otan» پارتياسى كۋبوگىنىڭ يەگەرى اتاندى. ۇشتىكتى م.اۋەزوۆ اتىنداعى №5 ورتا مەكتەپتىڭ كومانداسى تۇيىندەدى. جۇلدەگەرلەرگە باعالى سىيلىقتار تاپسىرىلدى.

سوڭعى جاڭالىقتار