19 شىلدە, 15:18 379 0 قوعام Túrkistan Gazeti

جول بويىنداعى دارەتحانالار نەگە ماسەلەگە اينالدى؟

«QazAvtoJol» كومپانياسى ءوز تاراپىنان دەمالىس الاڭدارى مەن ايالدامالارداعى دارەتحانا ماسەلەسىن شەشۋ ءۇشىن ينۆەستيتسيالىق كونكۋرس جاريالاپ وتىر.

اتالمىش كونكۋرس جىلدىڭ ءۇشىنشى توقسانىنان باستاپ جاريالانباق. باستاما يەسى – «QazAvtoJol» ۇلتتىق كومپانياسى.

«ءۇشىنشى توقساندا ەكى كەزەڭدىك كونكۋرس باستالادى. ءبىرىنشى كەزەڭدە ينۆەستورلار جايلى دارەتحانانىڭ ءوز نۇسقاسىن ۇسىنادى. ەكىنشى كەزەڭدە ۇزدىك جوبا ساپاسىمەن بىرگەن كۇتىپ-ۇستاۋ شىعىندارىنا قاراي ىرىكتەلەدى. دارەتحانانى جىلىتۋ ءۇشىن «جاسىل تەحنولوگيا» قولدانۋىنا دا بولادى. بۇل تۇرعىدا ەشقانداي شەكتەۋ جوق. ءتىپتى جالعىز دارەتحانامەن شەكتەلمەي، جانىنان سەرۆيس ورتالىعىن ورناتۋىنا دا بولادى. ەڭ باستىسى، كۇتىم شىعىندارى قىزمەت ساپاسىنا ساي بولۋى كەرەك»، - دەيدى كومپانيانىڭ ستراتەگيالىق جوسپارلاۋ، بيزنەستى دامىتۋ جانە اقپاراتتاندىرۋ دەپارتامەنتىنىڭ ديرەكتورى رۋستام يساەۆ.

ۇلتتىق كومپانيانىڭ باسقارما توراعاسى ۇلان ءالىپوۆتىڭ مالىمەتىنە سۇيەنسەك، كونكۋرستا جوباسى ۇزدىك دەپ تانىلعان مەردىگەر 7 جىل بويى جولاۋشىلارعا قىزمەت كورسەتەدى.

«مەردىگەرلەر قازىردىڭ وزىندە قىزىعۋشىلىق تانىتىپ وتىر. ولار ءوز اقشاسىنا زامان تالابىنا ساي دارەتحانا ورناتۋى كەرەك. سونى جەتى جىل بويى وزدەرى كۇتىپ ۇستايدى. ال ءبىزدىڭ كومپانيا كۇتىپ ۇستاعان شىعىنى ءۇشىن اقى تولەيدى. الدىن الا ەسەپ بويىنشا، ونداي شىعىننىڭ كولەمى ءبىر دارەتحاناعا ايىنا 500 مىڭ تەڭگە بولۋى مۇمكىن»، - دەيدى ول.

جالپى، 2021 جىلعا دەيىن رەسپۋبليكالىق ماڭىزداعى جولداردىڭ بويىنان 304 جايلى دارەتحانا ورناتۋ جوسپارلانعان ەكەن.

«2019-2021 جىلدارعا دەپ رەسپۋبليكالىق جولداردىڭ بويىندا 304 سانيتارلىق توراپ ورنى بەكىتىلگەن. ونىڭ ىشىندە 109 ورىن جاڭادان سالىنىپ جاتقان جولداردىڭ بويىنان بەلگىلەندى. قولدانىستاعى جولدار بويىندا 195 ورىن انىقتالىپ وتىر. ونىڭ ءبارىن ينۆەستورلار جەكە قاراجاتىنا ورناتۋى كەرەك. جىل باسىنان بەرى وسى تالاپتاردىڭ بارلىعىن ساقتاعان 20 سەرۆيس نىسانى سالىندى. جىل سوڭىنا دەيىن ولاردىڭ قاتارىن تاعى 25 نىسان تولىقتىرادى»، - دەيدى دەپارتامەنت ديرەكتورى رۋستام يساەۆ.

ونان وزگە رەسپۋبليكالىق ماڭىزداعى جولداردىڭ بويىندا جابدىقتالعان دارەتحاناسى جوق سەرۆيس نىساندارىنىڭ جۇمىسىنا تىيىم سالىنۋى مۇمكىن. ورتالىق كوممۋنيكاتسيالار قىزمەتىندە وتكەن بريفينگ بارىسىندا اۆتوموبيل جولدارى تۋرالى زاڭعا وسىنداي وزگەرىس ەنگىزۋ ۇسىنىلدى.

«QazAvtoJol» ۇلتتىق كومپانياسىنىڭ ستراتەگيالىق جوسپارلاۋ، بيزنەستى دامىتۋ جانە اقپاراتتاندىرۋ دەپارتامەنتىنىڭ ديرەكتورى رۋستام يساەۆ سوڭعى كەزدە جول بويىنداعى سەرۆيس نىساندارىنا قويىلاتىن تالاپتاردىڭ قاتاڭداتىلعانىن ايتادى.

«سوڭعى ەكى جىلدا ۇلتتىق ستاندارتقا سايكەس كەلەتىن جول بويىنداعى سەرۆيس نىساندارىنىڭ سانى 33 پايىزدان 47 پايىزعا ءوستى. بۇگىندە رەسپۋبليكالىق جانە حالىقارالىق جولدار بويىندا 1819 سەرۆيس نىسانى قىزمەت ەتەدى. سونىڭ تەك 850-ىندە عانا جابدىقتالعان جايلى دارەتحانا بار. 2018 جىلى 12 پاۆيلون قويىلعان بولاتىن.

«قازاۆتوجول» باقىلاۋىنا قارايتىن جولداردا 23 جابدىقتالعان دارەتحانا، 880 جىلىتىلمايتىن دارەتحانا بار. ونىڭ 411-ءى دەمالىس بازالارىنىڭ اۋماعىندا، 469-ى نەگىزگى جول بويىندا تۇر»، - دەيدى ۇلتتىق كومپانيا وكىلى.

رۋستام يساەۆتىڭ ايتۋىنا قاراعاندا، جول بويىنداعى سەرۆيستىڭ ساپاسىن رەتتەيتىن ۇلتتىق ستاندارتتا دارەتحاناعا قاتىستى ناقتى تالاپتاردىڭ بولماۋى سەرۆسي نىساندارىن بوساڭسىتىپ وتىر.

«قولدانىستاعى تالاپتار جول بويىندا سالقىن دارەتحانالار قويۋدى شەكتەمەيدى. ۇلتتىق ستاندارتتا مىندەتتى تالاپ بولماعاندىقتان، سەرۆيس ورتالىقتارى جابدىقتالعان جايلى دارەتحانا ورناتپايدى. اۆتوموبيل جولدارى تۋرالى زاڭعا وزگەرىستەر ەنگىزىلمەك. زاڭ جوباسى قازىر تالقىلانىپ جاتىر. سەرۆيس يەلەرى اباتتانعان دارەتحانا ورناتپاسا، ولاردى جول بويىندا كاسىپ اشۋعا جىبەرمەۋ تۋرالى ۇسىنىستار ءتۇستى»،- دەيدى دەپارتامەنت ديرەكتورى.

 

سوڭعى جاڭالىقتار