18 شىلدە, 12:52 447 0 تۇلعا "تۇركىستان" گازەتىنىڭ اۆتورلارى

الاش رۋحانياتىنىڭ تامىرشىسى

قاي حالىقتا بولماسىن، داۋىلدى شاقتا كەۋدەسىن وققا توسەپ، جانىن وتقا قاقتاپ، ۇلتىنىڭ وي-ساناسىن وياتىپ، مۇلگىگەن نامىسىن نايزاعايداي ويناتاتىن، تاعدىر توسقان الاساپىراننان امان الىپ شىعاتىن، اتانجىلىك ازاماتتار تۋماي قويمايدى. «اتالى جۇرتىمىزدىڭ، اۋداندى ۇلتىمىزدىڭ» ارداقتى اتى – «الاشتى» ورنىقتىرۋ جولىندا توزاق وتىنان دا تايسالماي، «بەسقارۋىن» اسىنىپ شىققان ۇلت ۇستازى – ا.بايتۇرسىنوۆتىڭ ۇستانىمى دۇشپانىنىڭ ءتىسىن شىقىرلاتىپ، قانداستارىنىڭ مەرەيىن ۇستەم ەتىپ، اتا-بابامىزدىڭ ەرلىك جولىنا، الاش قولىنان شىققان رۋحاني قۇندىلىقتارعا سانا ميكروچيپىمەن ۇڭىلدىرگەنى اقيقات.

الاش ارىستارى اقتالىپ، ولاردىڭ ۇشان-تەڭىز رۋحاني بايلىعىن كسرو ارحيۆتەرىنەن تىرنەكتەپ جيناپ، ءتىرىلتۋدىڭ امالى جاندانا باستادى. «الاش مۇراسىن» زەرتتەۋدە سول باياعى كرەاتيۆتىك كرەدوسىنان اينىماي، جان-جاقتى بىلىمدارلىعىمەن، پاراساتتىلىق، ساياسي كۇرەستىڭ تاسىلدەرى مەن قالىپتاسقان جاعدايدى قاپىسىز باعالاعان الاشتانۋشىلار دەپ بىرەگەي عالىمدار ءۇ.سۇبحانبەردينا، ك.نۇرپەيىسوۆ، ق.اتاباەۆ، م.قويگەلدى، ت.جۇرتباي، ە.سىدىقوۆ، د.قامزابەكۇلى، ت.وماربەك، ق.ساق، ءو.ءابديمانۇلى، ع.انەس، م.ءتاج-مۇرات، ا.ىسماقوۆا، ءا.قارا، ا.ماحاەۆا، د.امانجولوۆا، د.سۇلەيمەنوۆا، ك.ءىلياسوۆالاردىڭ ەسىمدەرىن ەرەكشە قۇرمەتپەن اتار ەدىك. بۇلار ەڭبەگى بولەك، ءجونى بولەك، عۇمىرلارىن حالقىنىڭ تاۋەلسىزدىگىن الىپ بەرۋگە ساداقا ەتكەن اۋليەپيعىل كۇرەسكەرلەرگە قاتىستى دەرەكتەر ىزدەپ، شەكسىز كەڭەس يمپەرياسىنىڭ كىتاپحانا، مۇراعاتتارىن قالدىرماي شارلاپ، الاش ارداگەرلەرىنىڭ رۋحىن حالقىمەن ەمىرەندىرە قاۋىشتىردى. سوندىقتان ءبىز ولاردىڭ ەڭبەگى قانداي اۋىر، ازاپتى، جاۋاپتى، قاستەرلى ءارى ازاماتتىق تۇرلاۋلىقتى، ۇلتجاندىلىقتى، قىراعىلىق پەن انىق قاسيەتتەردى تال بويىنا تۇندىرعان كىسىلىكتى كىسى ەكەنىنە كوز جەتكىزۋ ءۇشىن سولاردىڭ ءبىرىنىڭ عانا تۇلعالىق تىلسىمىنا بارلاۋ جاساۋدى ءجون كوردىك.

ءبىزدىڭ تاڭداۋىمىز الاشتانۋعا بوزبالالىقتىڭ بوزالا تاڭىنان باستاپ ارالاسىپ، اقىل-ويىنىڭ سەرگەكتىگى، قيالىنىڭ جۇيرىكتىگى، ۇستانىم تۇرلاۋلىلىعىمەن ەرەكشەلەنەتىن فيلولوگيا عىلىمدارىنىڭ كانديداتى، پروفەسسور ساق قايرات ءومىربايۇلى بولۋى جايدان-جاي ەمەس. ول تالانتى مەن ءبىلىمىن، جان بايلىعى مەن ار بايلىعىن، بۇكىل كوپ قىرلى قابىلەتىن ءبىر عانا ۇلكەن ماقساتقا – الاش قايراتكەرلەرىنەن قالعان ەشبىر ولشەممەن ولشەۋگە كەلمەيتىن رۋحاني بايلىقتى قىلشىعىنا قىلاۋ تۇسىرمەي حالقىنىڭ يگىلىگىنە جاراتىپ، ولمەس ءومىر سىيلاعان ەرلىككە پارا-پار تاباندى ىزدەنىستەرىمەن جۇرتىنىڭ العىسىنا بولەنگەن عالىم.

تابيعاتىنداعى تاكاپپارلىق، تەگىندەگى بەكزادالىق، مىنەزىندەگى ورشىلدىك، ەڭ قاجەتتىنى ءجىتى سەزىنەرلىك ينتۋيتسياسىنىڭ قۋاتتىلىعى قايراتتىڭ قايراتىن ەرتە قايراپ نە نارسەنى دە ەشكىمگە ارقا سۇيەمەي، شيەلەنگەن ءتۇيىندى ءوزى شەشۋگە، الىنباستى القىنا جەڭىپ شىعۋعا، ادال كۇشىمەن ورگە سۇيرەۋگە داعدىلاندىردى. ماسەلەن، اكادەميك، تاريح عىلىمدارىنىڭ دوكتورى بۇركىت اياعان قايرات ساقتىڭ دا، وزدەرىنىڭ دە جوعارى وقۋ ورنىنىڭ سوڭعى كۋرستارىندا وقىپ جۇرگەن شاقتارىندا الاش قايراتكەرلەرىنىڭ مۇراسىن زەرتتەۋدە «اقيقات» اتتى بەيفورمالدى قوعام قۇرىپ، ارحيۆتە كۇنى-ءتۇنى تىنباي ەڭبەكتەنىپ، جۇدىرىقتاي جۇرەكتەرى ۇلت مۇددەسى دەپ سوعىپ، ءبىراز جۇمىس اتقارعاندارىن سۇيسىنە ايتادى.

ەڭبەك جولى شەتەلدەردەگى قازاقتارمەن مادەني بايلانىس جاسايتىن «وتان» قوعامىنىڭ «ءبىزدىڭ وتان» گازەتىندە ءتىلشى قىزمەتىنەن باستالدى. اراب جازۋىن جەتىك بىلەتىندىكتەن بەلگىلى بيبليوگراف-عالىم ءۇ.سۇبحانبەردينامەن بىرگە «دالا ۋالاياتىنىڭ گازەتى» ەنتسيكلوپەديالىق جيناعىنىڭ IV-V تومدارىن قۇراستىرۋعا اتسالىستى. 1993-1996 جىلدارى ءال-فارابي اتىنداعى قازۇۋ-ءدىڭ اسپيرانتۋراسىندا ءبىلىمىن جەتىلدىرىپ، ءبىر مەزگىلدە كەزىندە ساياسي قۋعىن-سۇرگىن سالدارىنان جابىلىپ قالعان «قازاق» گازەتىن قايتا ءتىرىلتىپ، 266-ءنومىرى بولىپ جالعاسىن تاپقان اپتالىق باس رەداكتورىنىڭ ورىنباسارى قىزمەتىن اتقاردى.

اسىرەسە ونى الاش قوزعالىسىنىڭ كوسەمدەرى ءاليحان، احمەت، مىرجاقىپتاردىڭ كەمەڭگەرلىگى، مارتتىك بولمىستارى، ۇلتتىق مامىلە، ۇلتتىق كونسەنسۋس توڭىرەگىندەگى ويلارىنىڭ، شەشىمدەرىنىڭ ترانسفورماتسياسى «اسىل ءبىلىمدى ىزدەسەڭ، سولاردى وقى، ەرىنبە» دەگەن بەرىك بايلام جاساۋعا تابان تىرەتتى. سونىڭ ىقپالى بولار، ۋنيۆەرسيتەتتى بىتىرەر شاقتا ديپلوم جۇمىسىنا ۇلكەن عالىم، ۇستازى تاۋمان اماندوسوۆتىڭ قولداۋىمەن «مىرجاقىپ دۋلاتوۆتىڭ جۋرناليستىك جانە پۋبليتسيستىك قىزمەتى» دەگەن تاقىرىپتى تاڭداپ، بۇگىنگى بولمىسپەن مىرجاقىپ عۇمىر كەشكەن نايزاعايى ويناعان داۋىلدى شاقتى سالىستىرا سارالاي وتىرىپ، عۇلامانىڭ پۋبليتسيستيكاسىنا ساياسي، الەۋمەتتىك، فيلوسوفيالىق قورىتىندى جاساۋعا تالپىنىس جاسايدى.

ءال-فارابي اتىنداعى قازاق ۇلتتىق ۋنيۆەرسيتەتىن 1990 جىلى ۇزدىك ديپلوممەن اياقتاعان سوڭ ول ەڭبەك جولىن «شالقار» گازەتىندە ءتىلشى قىزمەتىمەن جالعاستىرادى. 1993-1996 جىلدارى ءوزى جوعارى ءبىلىم العان وقۋ ورنىنىڭ اسپيرانتۋراسىندا وقىپ، اتاقتى عالىم، كورنەكتى قالامگەر ءارى قوعام قايراتكەرى تەمىربەك قوجەكەەۆ پەن قازاقستان جۋرناليستيكا اكادەمياسىنىڭ پرەزيدەنتى، تاريح عىلىمدارىنىڭ دوكتورى، پروفەسسور ساعىمباي قوزىباەۆتىڭ عىلىمي جەتەكشىلىگىمەن 1998 جىلى «قازاق» گازەتىندەگى ۇلتتىق-ساياسي ماسەلەلەردىڭ جازىلۋى» دەگەن تاقىرىپتا كانديداتتىق ديسسەرتاتسياسىن ءساتتى قورعاپ شىعادى. «تاريح ارمەن سۋارىلىپ، ادالدىقپەن عانا جازىلاتىن نازىك عىلىم» (الىمعازى داۋلەتحان) ەكەنىن قايرات ساق «قازاق» گازەتىنىڭ تاريحىن «جىلىگىن شاعىپ، مايىن جەگىزۋمەن» دالەلدەي الدى.

قايرات ءومىربايۇلى 1996 جىلى قازۇۋ-ءدىڭ جۋرناليستيكا فاكۋلتەتىنە وقىتۋشىلىق قىزمەتكە تارتىلدى. قازاق ءبىلىمىنىڭ قارا شاڭىراعىندا وقىتۋشىلىقپەن قوسا «قازاق ۋنيۆەرسيتەتى» گازەتىنىڭ باس رەداكتورى (1998-1999), «قازاق ۋنيۆەرسيتەتى» باسپاسىنىڭ ديرەكتورى (1999-2000), «باسپا ءىسى جانە رەداكتسيالاۋ» كافەدراسىنىڭ مەڭگەرۋشىسى (2000-2008) قىزمەتتەرىن جەمىستى اتقاردى.

2008 جىلى استاناداعى ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى رەكتورىنىڭ شاقىرۋىمەن «جۋرناليستيكا» كافەدراسىنىڭ مەڭگەرۋشىسى قىزمەتىنە تاعايىندالدى. 2010 جىلى جاڭادان اشىلعان «ءباسپاسوز جانە باسپا ءىسى» كافەدراسىنىڭ تۇڭعىش مەڭگەرۋشىسى قىزمەتىن اتقارا ءجۇرىپ، جۋرناليستيكا جانە ساياساتتانۋ فاكۋلتەتىنىڭ اشىلۋىنا ۇيىتقى بولدى. ۇستانىمىنا بەرىك، جاڭالىق تۋىن جوعارى ۇستاعان، ساننان ساپاعا جانى قۇمار، كاسىبي شەبەرلىكتى ءبىرىنىشى ورىنعا قويۋدا پرينتسيپىنەن شەگىنۋگە جوق قايرات رەكتوردىڭ الدىنا زامانعا لايىق جۋرناليست كادرلارىن ازىرلەيتىن «جۋرناليستيكا جانە ساياساتتانۋ» فاكۋلتەتىن اشۋ جايلى ۇسىنىس جاسايدى. فاكۋلتەتتىڭ قۇرىلىمدىق جۇيەسى، مازمۇنى، پاسپورتى، كافەدرالاردىڭ اتقاراتىن قىزمەتى جايلى قۇجاتتارى جوعارى ساپادا ازىرلەنگەندىكتەن، مەملەكەتتىك ءمانى ايىرىقشا ءوتى­نىش قولداۋ تابادى. كوزى قاراقتى مامانداردىڭ جازعانىنا قاراعاندا، مۇنداي فاكۋلتەت بىزدە جانە پولشا مەملەكەتىندەگى ۆارشاۆا ۋنيۆەرسيتەتىندە عانا تىركەلىپتى. رەكتور سونى فاكۋلتەتتى اياعىنان تىك تۇرعىزىپ، ءوزى ۇسىنعان جاڭالىقتى قاپىسىز جۇزەگە اسىرۋ ماقساتىن كوزدەيتىن فيلولوگيا عىلىمدارىنىڭ كانديداتى، دوتسەنت قايرات ساقتى ءبىر جىلدان كەيىن، ياعني، 2011 جىلى فاكۋلتەت دەكانى ەتىپ تاعايىندايدى. اراعا ءبىراز جىلدار سالىپ بارىپ، قايرات ساق باسقاراتىن فاكۋلتەت جاڭادان اشىلعانىنا قاراماستان تاۋەلسىز رەيتينگ اگەنتتىگىنىڭ ساراپتاۋى بويىنشا رەسپۋبليكامىزدا ءبىرىنشى ورىنعا جايعاسۋى – سول اقيقاتتى ايعاقتايتىن ءجايىت. وسى فاكۋلتەتتى اياعىنان تۇرعىزۋ بارىسىندا كۇرمەۋى قيىن شارۋالاردىڭ تىگىسىن جاتقىزۋ توڭىرەگىندەگى بار قيىندىقتاردىڭ جۋان ورتاسىندا جۇرگەن ساياساتتانۋ عىلىمدارىنىڭ دوكتورى، پروفەسسور ءناۋبات قاليەۆ جيىندا: «ءسىز قايرات ساق دەگەن اتى-جونىڭىزگە تولىق لايىقتىسىز، قايرات دەسە قايراتتى، ساق دەسە ساق ەكەنىڭىز اقيقات. ياعني كولگىرسۋ، قىزبا مىنەز، وتىرىك ايتۋ تابيعاتىڭىزعا جات نارسە»، – دەۋىن قايرات ومىربايۇلىمەن ءبىر قازاندا قايناپ جۇرگەن ارىپتەسىنىڭ ونىڭ جۇلدىزى جانۋىن جاقىننان باقىلاپ بەرگەن ادىلەتتى باعاسى ساناعان ءلازىم. وسى مەرەيتويعا قاتىسىپ، قايرات ساقتى ۋنيۆەرسيتەت اتىنان قۇتتىقتاپ، ءسوز سويلەگەن ۋنيۆەرسيتەت رەكتورى، قر ۇعا اكادەميگى ەرلان سىدىقوۆ: «...قايرەكەڭنىڭ مەرەيتويى – عالىمداردىڭ، زيالىلاردىڭ، ل.ن. گۋميلەۆ اتىنداعى ەۇۋ-ءدىڭ تويى. ولاي دەيتىنىم، وسى ۋنيۆەرسيتەتتىڭ وتىمەن كىرىپ، كۇلىمەن شىعىپ، جىرتىسىن جىرتىپ جۇرگەن بەلگىلى دە، بىلىكتى ازامات قايرات ءومىربايۇلى وسىنداي ۇلكەن ابىرويعا ءوزىنىڭ تازا ەڭبەگىمەن، ماڭداي تەرىمەن، قولىنداعى قالامىنىڭ كۇشىمەن كەلدى. بەلگىلى جۋرناليست، قارىمدى قالامگەر بولدى. قايرەكەڭ از عانا ۋاقىتتىڭ ىشىندە جۋرناليستيكا فاكۋلتەتىنىڭ قالىپتاسىپ، دامىپ، ىرگەسىنىڭ مىعىم بولۋىنا كۇش سالدى. فاكۋلتەت شاعىن عانا ۋاقىتتا بەدەل جيناپ، اتاق-ابىرويى الىستارعا جەتتى، شاكىرتتەرى شارتاراپتا قىزمەت ەتىپ ءجۇر»، – دەپ كەمەل باسشى قاراۋىنداعى قىزمەتكەرىنىڭ ورەلى ءىس، كەلىستى قىزمەتىن، كوتەرىلگەن بيىگى، ازاماتتىق كەلبەتىن از سوزبەن اپتاپ بەرگەن.

قايرات ساق – جان-جاقتى قابىلەت يەسى: ۇستاز، عالىم، جۋرناليست، اۋدارماشى، قازاق ءتىلىنىڭ جوقشىسى، قوعام قايراتكەرى. بۇلار تۆورچەستۆولىق كەمەلدىلىك پەن كىسىلىك ىرىلىكتى، زيالىلىقتى، ەركىندىكتى قاجەتسىنەتىنى ايان. د.س. مەحاچەۆ: «زيالى ادام ءۇشىن ەركىندىك – ادامي كاتەگوريا، ونىڭ جان-دۇنيەسى ار-ۇياتتان قۇرالعان، ەڭ باستىسى، ونىڭ بولمىسىنا تانىم بوستاندىعى، تۇيسىك تاۋەلسىزدىگى ءتان»، – دەپ دۇرىس پايىمداپتى. «ۇستازى جاقسىنىڭ – ۇستانىمى جاقسى». قايرات ساق – كەشەگى م.اۋەزوۆ، ق.جۇماليەۆ، ب.كەنجەباەۆ ءتارىزدى كوريفەيلەردىڭ الدىن كورگەن ز.قابدولوۆ، ت.اماندوسوۆ، ت.قوجاكەەۆ، ءا.ىدىرىسوۆ، ش.ەلەۋكەنوۆ، س.قوزىباەۆ، ن.وماشەۆ، ا.مارحاباەۆ، ءۇ.ۋايدين مەكتەبىنەن وتكەن زەيىندى شاكىرتى. ول مەكتەپتىڭ گۋمانيستىك ۇستانىمى: «مامان تاربيەلەۋدەن بۇرىن – ادام تاربيەلەۋ».

جۋرناليستيكا جانە ساياساتتانۋ فاكۋلتەتىن رەسپۋبليكا جاستارىمەن بىرگە شەتەلدىك جاستار دا تاڭداپ كەلىپ، وقىپ جاتقانىنا ەرەكشە ماڭىز بەرگەن قايرات ساق ءبىلىم بەرۋدىڭ ساپاسىن بۇرىنعىدان دا جەتىلدىرە ءتۇسۋدى كوزدەپ، جۋرناليستيكانىڭ فۋنكتسياسىن، جاۋاپكەرشىلىگىن، جانرلارىن، ءتىلى مەن ءستيلىن، ولاردىڭ ەرەكشەلىكتەرىن تەرەڭ بىلەتىن جۋرناليست-عالىمداردى ساباق بەرۋگە تارتۋدا.

اسىلى، قايرات ساق فاكۋلتەتكە دەكان بولعالى مەرزىمدىك تاجىريبە الماسۋ ماقساتىندا شەتەلگە جىبەرۋ ءۇردىسى ۇجىمدا بەرىك قالىپتاستى دەۋگە نەگىز بار.

قازىر راديو جۋرناليستيكا، تەلە جۋرناليستيكانىڭ اسا قاجەتتى ستۋديالىق ساباقتارىن ستۋدەنتتەر زاماناۋي تەحنيكامەن جاراقتالعان، ەلى­مىزدە عانا ەمەس، تمد-دا تەڭدەسسىز سانالاتىن ەلور­داداعى قازمەديا ورتالىعىندا ءوتۋ ءمۇم­كىن­دىگىنە يە بولىپ، شاكىرتتەرىنىڭ كاسىبي تاجىريبە جيناقتاۋلارىنا بارىنشا جاعداي جاسالعان. تەلەحابارلار جاسالۋىنىڭ جوباسىن تالقىلاۋدى، رەجيسسەرلىك ءپۋلتتى باسقارۋدى، بەينەكامەرالارمەن قالاي ءتۇسىرۋدىڭ ءتاسىلىن مەڭگەرىپ، مونتاج جاساۋدى ۇيرەنۋ بىلىمگەرلەرگە از ولجا ەمەس. وسىنشاما قيۋى قيىسا بەرمەيتىن، كىلتى اسپانداعى شارۋالاردىڭ وڭ شەشىمىن تابۋىنىڭ باسى-قاسىندا جۇرگەن توپتاستىرۋشى دىڭگەك – كەڭەسىپ پىشكەن تون كەلتە بولمايتىنىنا جۇرتتى ۇيىتا بىلەتىن سۇڭعىلا دەكان قايرات ساق مىرزا.

2007 جىلى قر ءبىلىم جانە عىلىم مينيستر­لى­گىنىڭ «قازاقستان جوعارى وقۋ ورنىنىڭ ۇزدىك وقىتۋشىسى» گرانتىن يەلەندى. ءبىلىمدى دە بىلىكتى مامان دايارلاۋداعى ەرەن ەڭبەگى جوعارى باعالانىپ، وعان 2013 جىلى رەسەيدىڭ حالىقارالىق ەۋرازيا تەلە-راديو اكادەمياسى پرەزيدۋمىنىڭ شەشىمىمەن اكادەميك اتاعى بەرىلدى. 2014 جىلى قازاقستان جۋرناليستەر اكادەمياسىنا قابىلداندى. ال 2018 جىلى قازاقستان پەداگوگيكالىق عىلىمدار اكادەمياسىنىڭ اكادەميگى اتاندى.

وتاندىق جانە شەتەل عالىمدارى جوعارى باعالاعان «قازاق» گازەتى جاريالانىمدارىنىڭ اكادەميالىق جيناعىن قۇراستىرۋعا قاتىستى. جيناق «قازاق ەنتسيكلوپەدياسى باس رەداكتسياسى» باسپاسىنان 1998 جىلى جارىق كوردى. ءدال وسى جىلى «قازاق» گازەتىندەگى ۇلتتىق ساياسي-الەۋمەتتىك ماسەلەلەردىڭ جازىلۋى» دەگەن تاقىرىپتا فيلولوگيا عىلىمدارىنىڭ كانديداتى عىلىمي دارەجەسىن الۋ ءۇشىن دايىنداعان ديسسەرتاتسياسىن ءساتتى قورعادى. 2002 جىلى قر عىلىم جانە ءبىلىم مينيسترلىگى جاق تورالقاسىنىڭ شەشىمىمەن «ادەبيەتتانۋ» ماماندىعى بويىنشا دوتسەنت عىلىمي اتاعىن الدى. 2007-2017 جىلدار ارالىعىندا قر ءبىلىم جانە عىلىم مينيسترلىگىنىڭ كونكۋرستىق نەگىزدە قارجىلاندىرىلعان بىرنەشە عىلىمي جوباعا جەتەكشىلىك ەتتى.

«ۇلتتىق سانا ۇيىتقىسى» (2001), «قازاق جۋرناليستيكاسى» (2008), «الاش مۇراسى» (20014) وقۋ قۇرالدارىنىڭ، «الاش كوسەمسوزى» (2014) كوپ تومدىعىنىڭ، 150-دەن اسا عىلىمي ماقالانىڭ اۆتورى. قر مادەنيەت جانە اقپارات مينيسترلىگىنىڭ «الەۋمەتتىك ماڭىزدى ادەبيەت تۇرلەرى» باعدارلاماسى اياسىندا قىتاي حالىق رەسپۋبليكاسىنىڭ كورنەكتى جازۋشىسى با-ءتسزيننىڭ «ىزعارلى ءتۇن» رومانىن قازاق تىلىنە اۋداردى. «اۋدارما» باسپاسىنان ەكى رەت باسىلىپ شىققان كىتاپتى جوعارى وقۋ ورىندارى ستۋدەنتتەرى حرەستوماتيالىق وقۋلىق رەتىندە پايدالانۋدا.

قايرات ءومىربايۇلى قر تۇڭعىش پرەزيدەنتى نۇرسۇلتان نازارباەۆتىڭ (2015) جانە قر پرەزيدەنتى قاسىم-جومارت توقاەۆتىڭ العىس حاتىمەن (2019), قر تۇڭعىش پرەزيدەنتىنىڭ جارلىعىمەن «استانا 20 جىل» مەرەكەلىك مەدالىمەن (2018), قازاقستان جۋرناليستەر وداعىنىڭ سىيلىعىمەن (2002), قر مادەنيەت جانە اقپارات مينيسترلىگىنىڭ مادەنيەت قايراتكەرى توسبەلگىسىمەن (2010), «ءتىل جاناشىرى» قوعامدىق بىرلەستىگىنىڭ شەشىمى نەگىزىندە «ءتىل جاناشىرى» قۇرمەت بەلگىسىمەن (2013), قر اقپارات جانە كوممۋنيكاتسيا مينيسترلىگىنىڭ شەشىمىمەن «قازاق تەلەۆيزياسىنا - 60 جىل» مەرەكەلىك ءتوس بەلگىسىمەن (2018), قر ۇلتتىق ۇلان باس قولباسشىسىنىڭ بۇيرىعىمەن «قر قۇقىق قورعاۋ اسكەرىنە - 25 جىل» ءتوس بەلگىسىمەن (2018), وڭتۇستىك قازاقستان وبلىسى اكىمىنىڭ وكىمىمەن «وبلىسقا سىڭىرگەن ەڭبەگى ءۇشىن» مەدالىمەن (2014), ءال-فارابي اتىنداعى قازۇۋ-ءدىڭ 80 جىلدىق (2014) جانە ل.ن. گۋميلەۆ اتىنداعى ەۇۋ-ءدىڭ 20 جىلدىق مەرەيتويلىق مەدالدارىمەن ماراپاتتالدى.

ول – ستۋدەنت شاعىندا، ايگىلى جەلتوقسان قىرعىن-سۇرگىنىنىڭ جۋان ورتاسىندا ءجۇرىپ، كەڭەستىك گەنوتسيدتىڭ ادام بالاسىن قيناۋدان ءلاززات الاتىن ساديستەرى حايۋاندىققا شىمىرىكپەي بارعانىنا قارسى ارەكەت ەتكەن قاندى كويلەك دوستارىنىڭ امان قالعاندارىن تەرگەۋ بارىسىندا سىر اشپاي، قورعاپ قالعان بولات سۇيەك گرۋپپا ستاروستاسى. بۇل جونىندە كۋرستاسىنىڭ «ءسوزى مەن ءىسىنىڭ اراسىندا ينەنىڭ جاسۋىنداي جالعاندىق بولمايدى» دەپ باعالاۋى ءبىزدى شىن قۋانتتى (جۇماباي قۇليەۆ). ادىلىنە جۇگىنسەك، ونداي ازاماتتاردىڭ قاتارى قالىڭدىعى ەلدىڭ ىرىسى عوي. زيالىسى مول، بىرلىگى مىقتى ەلدىڭ ارقاشان دا تۇعىرى بيىك، الار قامالى كوپ.

 

تۇرسىن سىدىقوۆ،

فيلولوگيا عىلىمدارىنىڭ دوكتورى،

پروفەسسور، قر پەداگوگيكالىق عىلىمدار اكادەمياسىنىڭ اكادەميگى.

سوڭعى جاڭالىقتار