17 شىلدە, 20:56 357 0 تايقازان Túrkistan Gazeti

شالكودەدەگى شوپاندار تويى

الماتى وبلىسى، رايىمبەك اۋدانىنا قاراستى شالكودە جايلاۋىندا شوپاندار تويى ءوتتى. ەكىنشى جىل قاتارىنان ۇيىمداستىرىلىپ وتىرعان شارادا ۇزدىك مالشىلار ماراپاتتالىپ، قىمىزمۇرىندىق مەرەكەسى تويلانىپ، ول ۇلتتىق ات سپورتى ويىندارىنا جالعاستى.

تەڭىز دەڭگەيىنەن 2500 مەتر بيىكتىكتە ورنالاسقان شالكودە جايلاۋىندا ءبىر كەزدەرى 500 مىڭعا دەيىن قوي جايىلعان. ەل-جۇرت جايلاۋعا كوشىپ، ءدۇبىرلى توي وتكىزىپ، شوپاندار تويىن ەرەكشە اتاپ وتەتىن. يگى ءداستۇردى بىلتىر ءوز الدىنا ەنشىسىن الىپ قايتا قۇرىلعان رايىمبەك اۋدانىنىڭ باسشىلىعى قولعا الىپ، جانداندىردى. اۋدان جۇرتشىلىعى دا بىردەن قولداپ كەتتى. شوپاندار تويى اياسىندا اۋداننىڭ مال شارۋاشىلىعىن اسىلداندىرۋ، جانە مال ونىمدەرىن ارتتىرۋعا باعىتتالعان سەمينار-كەڭەس ءوتتى. قازاقستاندىق عالىمدار مال تۇقىمىن اسىلداندىرۋ بويىنشا تاجىربيەلەرىمەن ءبولىسىپ، ونىمدىلىكتى ارتتىرۋدىڭ العى شارتى عىلىممەن تىعىز جۇمىس ىستەۋ كەرەكتىگىن ايتتى. قازىرگى تاڭدا اۋداندا قوي-ەشكى سانى 310 مىڭعا جۋىقتادى. ءىرى قارا سانى 60 مىڭ بولسا، جىلقى 40 مىڭعا جەتتى. سالتاناتتى جيىن بارىسىندا ۇزدىك ناتيجە كورسەتكەن بىرقاتار مالشىلار ماراپاتتالدى.

سونداي-اق جايلاۋ تويى اياسىندا الماتى وبلىستىق قازاقستان حالقى اسسامبلەياسىنىڭ قولداۋىمەن قىمىزمۇرىندىق مەرەكەسى دە اتاپ ءوتىلدى. جەلىنى مايلاپ، بيەنى بايلاپ، قىمىز اشىتىپ، داستارحان ءمازىرىن ۇسىنعان اۋدان جۇرتشىلىعىنا جينالعان قوناقتار ءتانتى بولدى. ايتا كەتۋ كەرەك، جايلاۋعا ەرىنبەي كوتەرىلگەن قاۋىم قاتارىندا اتاقتى سپورتشىلار، اقىن-جازۋشىلار، قوعام قايراتكەرلەرى مەن جۋرناليستەر قاۋىمى كوپ بولدى. شارا سوڭىندا «جەتىسۋ جۇيرىگى» اتتى ءىV وبلىستىق ات سپورت ويىندارى ۇيىمداستىرىلدى. بايگەنىڭ بىرنەشە تۇرىنەن جارىستار ءوتىپ، قوناقتار قىز قۋ، اۋدارىسپاق، قازاق كۇرەسى، قوشقار كوتەرۋ جانە تازى جۇگىرتۋ سياقتى ۇلتتىق ويىنداردى تاماشالادى.

 

سوڭعى جاڭالىقتار