17 شىلدە, 13:27 392 0 ونەر Túrkistan Gazeti

اقتوتى رايىمقۇلوۆا ونەرپاز جاستارمەن كەزدەستى

قر مادەنيەت جانە سپورت ءمينيسترى اقتوتى رايىمقۇلوۆا حالىقارالىق بايقاۋلاردا جۇلدەگەر اتانعان جاستارمەن كەزدەستى.

كەزدەسۋگە «سلاۆيان بازارى – 2019» كونكۋرسىنىڭ جەڭىمپازى ءادىلحان ماكين مەن ۋكراينادا وتكەن «مولودايا گيليچينا-2019» حالىقارالىق ءان بايقاۋىنىڭ باس جۇلدەسىن العان قۋانىش ەرزاتۇلى جانە ءى ورىن جۇلدەگەرلەرى مەرەكە كەنجەعۇل مەن «قازاق قىزدارى» تريوسى كەلدى.

«كۇللى الەمگە ۇلى دالا ەلىنىڭ ونەرى مەن مادەنيەتىن ناسيحاتتاپ جۇرگەن ەڭبەكتەرىڭىزگە شەكسىز العىسىمدى بىلدىرەمىن. قازاقتىڭ قوڭىر ءۇنى حالقىمىزدىڭ ماڭدايىنا بىتكەن باعى دەسەم، ارتىق ايتقانىم ەمەس. وزدەرىڭىز بىلەسىزدەر، امىرە قاشاۋباەۆ ءپاريجدى قالاي باعىندىرسا، ديماشىمىز ميللياردتاعان حالقى بار قىتايدى، كەيىنىرەك الەمدى مويىنداتتى. مىنەكەي، سىزدەر دە دارىندارىڭىزبەن كوزگە ءتۇسىپ، جۇلدەمەن كەلىپ وتىرسىزدار. شىن جۇرەكتەن قۋانىشتىمىن. بولاشاقتا الەم ساحنالارىندا بۇدان دا قور جەتىستىكتەرگە جەتەتىندەرىڭىزگە سەنىمدىمىن»، - دەدى اقتوتى رايىمقۇلوۆا قر مادەنيەت جانە سپورت مينيسترلىگىندە وتكەن كەزدەسۋدە.

سونىمەن بىرگە، كەزدەسۋدە قازاق ۇلتتىق ونەر ت. جۇرگەنوۆ اتىنداعى ونەر اكادەمياسىنىڭ رەكتورى اسحات ماەميروۆ قر مادەنيەت جانە سپورت مينيسترلىگىنە العىس ءبىلدىردى.

«سلاۆيان بازارى» - ەۋرازيا كەڭىستىگىندەگى بەدەلدى ورىنداۋشىلار بايقاۋى. ءتورت جىل بۇرىن ديماش وسى بايقاۋدان قانات قاعىپ ۇشتى. قازىر الەمدى باعىندىردى. ءسىزدىڭ دە (اقتوتى رايىمقۇلوۆا - رەد.) انا رەتىندە ادىلحانعا جازعان قولداۋىڭىزدى جەتكىزىپ ءجۇردىم. تاعى ءبىر ايتارىم، ءانشى تامارا گۆارتسەدەلي باس جۇلدەنى تاپسىرىپ جاتىپ، قازاقستاندا ونەرگە، مادەنيەتكە قولداۋ بىلدىرگەنى ءۇشىن ەلباسىنا العىس ايتتى. ءادىلحان بيىل ءبىرىنشى رەت تاعايىندالعان بەلارۋس پرەزيدەنتى الەكساندر لۋكاشەنكونىڭ «سلاۆيان ءۇمىتى» سىيلىعىن جەڭىپ الدى»، - دەدى اسحات ماەميروۆ.

ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ ستۋدەنتى ءادىلحان ماكين «سلاۆيان بازارى-2019» حالىقارالىق فەستيۆالىندە گران-پريگە يە بولدى.

بىلتىر بۇل بايقاۋدا قازاقستاندىق ەرنار سادىرباي جۇلدەلى 1-ورىن يەلەنسە، 2015 جىلى ديماش قۇدايبەرگەن تۇڭعىش رەت گران-پري جەڭىپ العان ەدى.

سوڭعى جاڭالىقتار