15 شىلدە, 17:22 385 0 ءوندىرىس Túrkistan Gazeti

«ABAYbooks» باسپا ءۇيى بالالارعا ارنالعان «سالەم، قازاقستان!» گيد-بوياعىشتارىن تانىستىردى

12 شىلدە كۇنى «مەلومان» كىتاپ دۇكەندەرى جەلىسىندە «ABAYbooks» باسپا ءۇيىنىڭ العاشقى ءونىمى «سالەم قازاقستان!» بوياعىش كىتاپتارىنىڭ تۇساۋكەسەرى ءوتتى. كىتاپشانى بالالار جازۋشىسى مەن پسيحولوگى دجان اماني، يلليۋستراتور سوفيا فيلاتوۆا جانە جوبا جەتەكشىلەرى تانىستىردى.

بوياعىش كىتاپتىڭ ماقساتى-بالالاردىڭ ساۋلەت، ءمۇسىن، ونەر جانە ونىڭ تۇرلەرى مەن قىزمەتتەرى تۋرالى تۇسىنىكتەرىن كەڭەيتۋ. سونداي-اق بالالاردى ءوز وتانىنىڭ قالالارىنىڭ كورىكتى جەرلەرى تۋرالى يلليۋستراتسيالار بويىنشا تانۋعا ۇيرەتۋ.

«سالەم قازاقستان!» بوياعىش كىتاپتارىنىڭ ارتىقشىلىقتارى مەن ەرەكشەلىكتەرى تۋرالى جوبا جەتەكشىسى ءارى رەداكتورى كامشات اليبەكوۆا ايتىپ ءوتتى.

-الدىمەن ءبىزدىڭ بوياعىشتارىمىزدىڭ باسقا بوياعىشتاردان قانداي ايىرماشىلىقتارى بار ەكەنىن ايتقىم كەلەدى. بىرىنشىدەن، كىتاپ دۇكەندەرىندە جانۋارلار مەن وسىمدىكتەر، ەرتەگى كەيىپكەرلەرى مەن كولىكتەر بوياعىشتارى وتە كوپ بولعاندىقتان، قازاقستاندا العاش بولىپ قالالاردىڭ كورىكتى جەرلەرىنە ارنالعان بوياعىشتاردى ءبىز جاساپ شىعاردىق. ءار قالانىڭ ءوز تانىمال جەرلەرى بار. ءاربىر كورىكتى ورىننىڭ قىسقاشا مازمۇنى مەن قىزىقتى فاكتىلەرى ايتىلعان. مۇقاباسىنداعى كەيىپكەرلەر دە كىشكەنتاي بالالاردىڭ نازارىنا تۇسەتىنى انىق. سونىمەن بىرگە، بۇل بوياعىشتار كىشكەنتاي تۋريستەرگە گيد-كومەكشى قىزمەتىن دە اتقارادى. ماسەلەن، ءبىر قالاعا ساياحات جاساۋدى ۇيعارساڭىز، كىتاپشالارعا قاراي وتىرىپ، ول قالانىڭ قاي جەرلەرىنە بارۋعا بولادى، تاريحي ەسكەرتكىشتەر، مۇراجايلار مەن تەاترلار، مەشىتتەردىڭ قاي جىلى، كىمنىڭ باستاماسىمەن سالىنعانىن بىلۋگە بولادى.

بوياعىش يلليۋستراتسيالاردىڭ 18 ءتۇرى مەملەكەتتىك تىلدە ۇسىنىلعان. كىتاپ التى جاستان اسقان بالالارعا ارنالعان. وتاندىق سەريانىڭ ەرەكشەلىگى – ول بىرىڭعاي قازاق تىلىندە شىعارىلادى. بۇل-مەملەكەتتىك تىلدەگى قالالاردىڭ كورىكتى جەرلەرى تۋرالى قازاقستانداعى العاشقى بوياعىش كىتاپتار توپتاماسى.

«بوياعىش كىتاپتار كىشكەنتاي بالالاردى تىنىشتىق ساقتاپ، بوساڭسۋعا شاقىرادى. شارشاڭقى كۇننەن كەيىن بالاعا دەمالۋ قاجەت. بوياعىشتار ارقىلى ولار ءتۇس تاڭداۋدى، پىشىندەردى ەستە ساقتاۋدى، كەيىپكەرلەردى قالاي بوياۋ كەرەكتىگىن ۇيرەنەدى. ءار كومپوزياتسيانى بوياي وتىرىپ، نازار سالۋ قابىلەتىن ارتتىرادى. سۋرەت سالۋ بالانىڭ شىعارماشىلىعىن دامىتادى، قيالىنداعى بەينەنى قاعاز بەتىنە ءتۇسىرىپ، ءتۇرلى وقيعالاردى ويلاپ تابادى. اتالعان بوياعىشتاردى جاساپ شىعارماس الدىن، ءبىز ديزاينەر-يلليۋستراتورلاردى اسا مۇقياتتىلىقپەن تاڭدادىق»، - دەيدى «ABAYbooks» باسپا ءۇيىنىڭ ديرەكتورى مايرا ءالجانوۆا.

«سالەم قازاقستان!» بوياعىش كىتاپتارى – «ABAYbooks» باسپا ءۇيىنىڭ العاشقى ونىمدەرىنىڭ ءبىرى. جوبا 5 ايعا جۋىق دايىندالدى. ءار بوياعىش پەن يلليۋستراتسيالاردى سالۋعا پروفەسسيونالدى ديزاينەرلەر اتسالىسىپ، ساپالى تۋىندىلار جاسادى.

«باستاپقىدا قيىن بولعانى راس. ماعان ەكى نارسەگە كوڭىل ءبولۋ كەرەك بولدى: بالالاردىڭ قابىلداۋى جانە ءبىزدىڭ كۇردەلى ارحيتەكتۋرالار، عيماراتتاردىڭ اۋقىمدىلىعى، ءستيلى مەن يدەياسى. بالالار يلليۋستراتسيالاردىڭ ءمانىن جوعالتىپ الماي، عيماراتتاردىڭ وزىندىك قاسيەتتەرىن ساقتاي وتىرىپ، قانشالىقتى تۇرلەندىرۋگە بولاتىنىن ۇعىندىرىپ، وسى ەكى نارسەنى بىرىكتىرۋ كەرەك دەگەن تاپسىرما تۇردى. بالالارعا قىزىقتى ءارى بوياۋ قيىنعا سوقپايتىنداي عيماراتتىڭ دارالىعىن كورسەتۋ كەرەك ەدى. سۋرەتتەردەگى ءاربىر بولشەك كوپشىلىك پىكىرىنەن ءوتتى، ياعني ونىڭ كەرەگى بار ما الدە جوق پا دەگەندەي. سونداي-اق، فلورا مەن فاۋنا ۇلگىلەرىن دە قوسىپ، عيماراتتاردى تۇرلەندىرۋ كەرەك بولدى»، - دەپ ءبولىستى ديزاينەر-يلليۋستراتور سوفيا فيلاتوۆا.

جازۋشى-پسيحولوگ، «الۋان ءتۇرلى بالىقتار جانە داريا» اتتى تانىمال بالالار كىتابىنىڭ اۆتورى دجان امانيدىڭ ايتۋىنشا، اتا-انالارعا بالالارىنا بوياۋ كەزىندە مۇمكىندىگىنشە كومەك كورسەتۋ كەرەك.

«بوياعىشتاردى قولعا العان ساتتەن، ولارعا دەگەن ۇلكەن قىزىعۋشىلىق پايدا بولدى. مەن ءوزىم جازۋشى بولعاندىقتان، بۇنىڭ ارتىندا قانداي ەڭبەك جاتقانىن جاقسى بىلەمىن. راسىندا دا، بوياعىش كىتاپتار بالالار شىعارماشىلىعىن دامىتادى. اتا-انالارعا از عانا ۋاقىتىن ءبولىپ، بالالارىمەن بىرگە بوياعىشتاردى بىرگە بوياعان ابزال. بۇل بالاعا قىزىقتى جانە تانىمدى بولادى. ەگەر دە ول باسقا ەلگە باراتىن بولسا، وندا ءوز ەلىنىڭ قايتالانباس ءارى تاڭعاجايىپ ورىندارى تۋرالى ماقتانىشپەن ايتىپ جۇرەدى»، - دەپ دجان اماني ءوز پىكىرىن ءبىلدىردى.

تۇساۋكەسەر سوڭىندا ۆيكتورينالىق سۇراقتار قويىلىپ، اۋديتوريامەن ويىن ۇيىمداستىرىلدى. بوياعىش كىتاپتارعا بايلانىستى، ءار قالانىڭ كورىكتى جەرلەرى تۋرالى بەرىلگەن سۇراقتارعا دۇرىس جاۋاپ تاپقاندار سىيلىقتارمەن ماراپاتتالدى.

«سالەم، قازاقستان!» بوياعىش كىتاپتارىن «مەلومان»، «الماتىكىتاپ»، «قازىنا» ت.ب. كىتاپ دۇكەندەرىنەن الۋعا بولادى.

قىركۇيەك ايىندا «ABAYbooks» باسپا ءۇيى قازاقستاندا العاش بولىپ بارىنە تانىمال جانە سۇيىكتى «Disney» ەرتەگىلەرىنىڭ قازاق تىلىندەگى توپتاماسىن ۇسىناتىن بولادى.

سوڭعى جاڭالىقتار