15 شىلدە, 16:51 321 0 شوۋ-بيزنەس Túrkistan Gazeti

"Baqytty bala" تانىتقان بالعىن جۇلدىزدار

الەمگە جارقىن دا جاس جۇلدىزداردى سىيلاعان "Baqytty bala" ءىى اشىق فەستيۆال كونكۋرسىنىڭ باس جۇلدەگەرلەرى 2 000 000 تەڭگە الدى. ال رەسەيلىك "گولوس. دەتي" تەلەۆيزيالىق شوۋىنىڭ جۇلدىزى "Baqytty bala" اتتى قازاقستاندىق فەستيۆال كونكۋرسىنىڭ جەڭىمپازى اتاندى. 

نۇر-سۇلتان قالاسىنىڭ كىشكەنتاي تۇرعىنى، جاس ۆوكاليس ايكەرىم تىلەۋبەك "Baqytty bala" ءىى اشىق فەستيۆال كونكۋرسىندا "گولوس. دەتي" فەستيۆال كونكۋرسىنىڭ جەڭىمپازىنا ايتارلىقتاي باسەكەلەستىك تانىتتى. ياعني، "ديماشالي" پروديۋسەرلىك ورتالىعى عالامدىق دەڭگەيدەگى تاعى ءبىر جاڭا دا جاس ونەر جۇلدىزىن تانىتتى. ول، ارينە، ەلوردالىق ونەر يەسى ايكەرىم تىلەۋبەك.

بايقاۋدىڭ قورىتىندىسىن انىقتاۋ بارىسىندا ۇيىمداستىرۋشىلار – "ديماشالي" پروديۋسەرلىك ورتالىعى مەن شاقىرىلعان ساراپشىلار كادىمگىدەي قيىن جاعدايعا تاپ بولدى. قىزۋ پىكىرتالاس ءتۇن جارىمىنا دەيىن جالعاستى. ناتيجەسىندە تورەشىلەر القاسى ىمىراعا كەلىپ، ەكى قاتىسۋشىعا باس جۇلدە بەرەتىن بولىپ شەشتى. ال جۇلدە قورىنىڭ كولەمى الدىڭعى كونكۋرستان ەسەلەپ ارتتى.

 

ايتا كەتۋ كەرەك، قازاقستاندا وسىنداي اۋقىمدى ءىس-شارا اقتوبە وبلىسى اكىمدىگىنىڭ جانە اقتوبە قالاسىنداعى جەكە كومپانيالاردىڭ قولداۋىمەن ءوتتى. بايقاۋ الدىندا اقتوبە وبلىسىنىڭ اكىمى وڭداسىن ورازالين قازىلار القاسى مۇشەلەرىمەن جانە فەستيۆال-بايقاۋدى ۇيىمداستىرۋشىلارمەن كەزدەستى.

«دارىندى بالالاردىڭ "Baqytty bala" اتتى ونەر باسەكەسى حالىقارالىق مارتەبەگە يە بولدى. سونىڭ ارقاسىندا قازاقستاندىق ونەر ولكەسىندەگى ورەندەر الەمگە بەلگىلى جەرلەسىمىز ديماش قۇدايبەرگەن سياقتى ەسىمدەرىن تانىتا باستادى. فەستيۆال-بايقاۋدىڭ ونداعان، جۇزدەگەن جاڭا جۇلدىزداردى اشاتىنىنا سەنىمىم مول", - دەپ اتاپ ءوتتى وبلىس اكىمى.

كەزدەسۋ سوڭىندا ايماق باسشىسى قوناقتارعا ەستەلىك كادەسىيلار تابىس ەتتى.

بايقاۋ بولاتىن كۇن «ديماش قۇدايبەرگەن گالا-شوۋعا ءبىر كۇنگە ۇشىپ كەلدى» دەگەن قۋانىشتى حاباردان باستالدى. بالالار قوبالجىعانىن جاسىرا المادى، ولاردىڭ ارقايسىسى ءۇشىن وزدەرىنىڭ سۇيىكتى انشىسىمەن كەزدەسۋ – ۇلكەن ارمان. بىراق جەتكىنشەكتەر ىشكى سەزىمگە تولى تولعانىستارىن باسىپ، ساحنادا ۇزدىك ونەر كورسەتۋگە جانىن دا، بارىن دا سالىپ باقتى. ءوز انا تىلىندە ءان شىرقاۋدى تالاپ ەتەتىن ءبىرىنشى سايىستىڭ وزىندە كورەرمەندەر ءۇشىن جەڭىسكە ۇمىتكەر انىقتالعانداي بولدى. نۇر-سۇلتان قالاسىنان كەلگەن ايكەرىم تىلەۋبەك "جۇماق مەكەن" انىمەن تىڭدارمانداردى باۋراپ الدى، كوپشىلىك وعان ۇزاق ۋاقىت بويى قول شاپالاقتاپ، ىستىق ىقىلاستارىن ءبىلدىردى.

الەمدىك دەڭگەيدەگى تانىمال حيتتەردىڭ پەرفومانستارى ورىندالاتىن ەكىنشى كەزەڭدە ۇيىمداستىرۋشىلار جاس شاماسىنا شەكتەۋ قويماعانىن اتاپ وتكەن ءجون. "ديماشالي" پروديۋسەرلىك ورتالىعىنىڭ جەتەكشىسى قانات ايتباەۆ ايتقانداي، مۇندا قاتىسۋشىلار وزدەرىنىڭ ۆوكالدىق قابىلەتتەرى مەن ساحنالىق تالانتتارىن مەيلىنشە ايقىن كورسەتەتىن اندەر تاڭداۋى وتە ماڭىزدى.

"بالالار تاماشا ونەر كورسەتتى! تاماشاسى سول، ءتىپتى شىن مىقتىنى تاڭداۋ مەن انىقتاۋ اسا قيىنعا سوقتى. الايدا، بايقاۋ شارتتارى دا ورىندالۋى ءتيىس. قازىلار القاسى ەشكىمدى الالاماي، ءوز مىندەتتەرىن ادال اتقاردى دەپ بىلەمىن. سوڭىندا ەرەكشە قورىتىندى شىعاردى", - دەدى بايقاۋدىڭ قازىلار القاسىنىڭ مۇشەسى ايدا نيكولايچۋك.

جۇلدەگەرلەردى سوڭىنان باستاپ تانىستىرساق، قوستانايلىق يساتاي بولتاحان جانە الماتى قالاسىنىڭ ۇمىتكەرى قاراقات باشانوۆا جۇلدەلى ءۇشىنشى ورىندى قاناعات تۇتتى. ولاردىڭ ارقايسىسى 100 000 تەڭگە سوماسىندا سىيلىق سەرتيفيكاتپەن ماراپاتتالدى. ەكىنشى ورىنعا ۋكراينانىڭ حاركوۆ قالاسىنان كەلگەن دارينا گاليتسكايا مەن اقتوبەلىك اڭسار ءجۇسىپ لايىق دەپ تانىلدى. ولارعا 150 000 تەڭگە كولەمىندەگى سەرتيفيكاتتار تابىس ەتىلدى. ال ءبىرىنشى ورىندى رەسەيدىڭ تۋلا قالاسىنان كەلگەن ماريا پانيۋكوۆا مەن

الماتىلىق نۇرلىبەك ساپارباي جەڭىپ الدى. باسەكەلەستەرىنەن ونەر بايگەسىندە وزا شاپقان جاس انشىلەر 250 000 تەڭگە كولەمىندەگى سەرتيفيكاتتارعا يە بولدى.

سەگىز مەملەكەتتەن كەلگەن تاڭداۋلى انشىلەردىڭ ارمانىنداعى باس جۇلدە، ءداستۇر بويىنشا، ساراپشىلار القاسىن تامساندىرىپ، عاجاپ ونەرىمەن كونكۋرس دارەجەسىن كوتەرگەن ەڭ مىقتى ەكى قاتىسۋشىعا تابىستالدى. ولار، جوعارىدا ايتقانىمىزداي، ەلوردانىڭ تۋماسى ايكەرىم تىلەۋبەك پەن رەسەيدىڭ تۇمەن قالاسىنان كەلگەن يسلام بالكوەۆ – "Baqytty bala" ءىى اشىق فەستيۆال كونكۋرسىنىڭ جاڭا قوس جۇلدىزى. باس جۇلدەنى جەڭىپ العانداردىڭ ارقايسىسىنا 1 000 000 تەڭگە سوماسىندا سەرتيفيكاتتار تابىس ەتىلدى.

تاعى دا ايتايىق، يسلام بالكوەۆ "پەرۆىي كانال" ارناسىنان كورسەتىلەتىن "گولوس. دەتي" اتتى تەلەۆيزيالىق جوبا بويىنشا كوپشىلىككە تانىمال. رەسەيدىڭ باستى ۆوكالدىق شوۋىندا ۆالەري مەلادزەنىڭ جەتەكشىلىگىمەن ونەر كورسەتۋ يسلامعا كوپ كومەگىن تيگىزدى. ونىڭ ونەرىنە پىكىر بىلدىرگەن قازاقستاننىڭ ەڭبەك سىڭىرگەن مادەنيەت قايراتكەرى، ديماشتىڭ پەداگوگى مارات ءايتىموۆ بىلاي دەدى: "يسلام تالانتىمەن قاتار، ەرەكشە دارىنى مەن ساحنالىق شەبەرلىگىن تانىتا ءبىلدى. البەتتە، ونىڭ ساحنا ادامى ەكەنى داۋسىز! ول اۋديتوريامەن جۇمىس ىستەي الادى، ساحنانىڭ ءسانىن كەلتىردى. ناعىز ءارتىس ءۇشىن جاقسى ۆوكالدىق قابىلەتى بولۋ جەتكىلىكسىز، ناعىز ءارتىس سان الۋان قاسيەتتەرگە يە بولۋى ءتيىس، ەڭ باستىسى – ءاندى ديماشتاي جۇرەكپەن جەتكىزە ءبىلۋ قاجەت.

مىسالى، شەبەرلىك ساعاتى بارىسىندا مەن يسلامعا ونىڭ حورەوگرافياسىنا قاتىستى بىرنەشە ەسكەرتۋ جاسادىم. ءبيى شيكىلەۋ بولدى، اشىعىن ايتقاندا، ونىڭ دەڭگەيىنە لايىق ەمەس ەدى. ءىس-قيمىلدارى ءسال قىسىڭقى بولاتىن. يسلام مەنى مۇقيات تىڭداپ، پىسىقتاۋعا ۋادە بەردى. ءسويتىپ، فينال كەزىندە مۇلدەم جاڭا قويىلىمىمەن ءتانتى ەتتى! وسىنداي قىسقا مەرزىمدە ول بارلىق كەمشىلىكتەردى جويىپ، ءبيدى جاقسى الىپ شىقتى. بۇل، البەتتە ونىڭ جوعارى كاسىبيلىگىنىڭ كورسەتكىشى".

ايكەرىم تىلەۋبەك ديماش قۇدايبەرگەنمەن بىرگە ونىڭ كەلەسى كونتسەرتىندە ءان شىرقاۋ قۇرمەتىنە يە بولعانى بەلگىلى بولدى.

ەسكە سالا كەتەيىك، "Baqytty bala" فەستيۆال كونكۋرسىنىڭ I ماۋسىمىنىڭ ءفيناليسى نارعىز جانۇزاق لوندوندا وتكەن Indigo at the O2 كونتسەرت زالىنىڭ ساحناسىندا ايگىلى انشىمەن بىرگە مەگا-جۇلدىزدارمەن دۋەتتە ونەر كورسەتتى. ال ەكىنشى باس جۇلدە يەگەرى ەرجان ماكسيمم رەسەيلىك "گولوس. دەتي" تانىمال جوباسىندا ماسكەۋلىك كورەرمەندەردى دارىنىمەن تامساندىرا ءبىلدى.

سوڭعى جاڭالىقتار