4 شىلدە, 12:57 223 0 نۇر وتان "تۇركىستان" گازەتىنىڭ اۆتورلارى

«Smart qalamger» جوباسى ىسكە قوسىلدى

قر ۇلتتىق مەملەكەتتىك كىتاپ پالاتاسى مەن «اقپاراتتىق-تەحنولوگيالىق ورتالىعى» قوعامدىق قورى «رۋحاني جاڭعىرۋ»، «تسيفرلى قازاقستان» باعدارلامالارى اياسىندا جانە ەلباسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىنىڭ نەگىزىندە قر ۇلتتىق اكادەميالىق كىتاپحاناسىنىڭ مىرزاتاي جولداسبەكوۆ اتىنداعى زالىندا «Smart qalamger» اتتى جوباسىمەن تانىستىردى.

قر ۇلتتىق مەملەكەتتىك كىتاپ پالاتاسى «تسيفرلى قازاقستان» باعدارلاماسى اياسىندا قولعا الىپ وتىرعان بۇل جوبا «اقپاراتتىق-تەحنولوگيالىق ورتالىعى» قوعامدىق قورىمەن بىرلەسىپ جۇزەگە اسىرىلۋدا. جوبانىڭ ماقساتى – قازاقستان جازۋشىلار وداعى­نىڭ مۇشەسى بولىپ تابىلاتىن ءاربىر قالامگەرلەردىڭ تەگىن ۆەب-سايتتارىن جاساپ بەرۋ جانە ولارعا تەحنيكالىق قولداۋ كورسەتۋ، قالام­گەرلەردىڭ شىعارمالارىن ءبىر جەرگە جيناقتاپ، ولاردىڭ بىرتەكتى ەلەك­ترون­دى بازاسىن قۇرۋ. قر ۇلتتىق مەم­­لەكەتتىك كىتاپ پالاتاسىنىڭ ءباسپاسوز مۇراعاتىن پايدالانا وتىرىپ، قالامگەرلەردىڭ تولىق بيبليو­گرا­فيالىق انىقتامالىعىن جاساۋ، ولار­دىڭ وقىرمانمەن، شەت ەلدىك جازۋشىلارمەن بايلانىسىن دامىتۋ.

تۇساۋكەسەردە العاشقى بولىپ ءسوز العان ءتىل ساياساتى كوميتەتىنىڭ توراعاسى عالىمجان مەلدەش ءوز سوزىندە بۇل جوبانىڭ ماڭىزدىلىعىن ەرەكشە اتاپ ءوتتى. «بۇل جازۋشىلاردىڭ ءوز شىعارمالارىن قالىڭ وقىرمانعا قولجەتىمدى ەتۋىنە ۇلكەن سەپتىگىن تيگىزەدى. ەلباسىمىز ايتقانداي، جاھاندانۋ داۋىرىندە ەلىمىز باسەكەگە قابىلەتتى، دامىعان ەلدەر قاتارىندا بولۋى ءۇشىن «تسيفرلى قازاقستان» باعدارلاماسىنىڭ ماڭىزى وتە زور. «كىتاپ وقۋ قالىپ بارادى» دەپ دابىل قاققان زيالى قاۋىمنىڭ دا ءوز شىعارمالارىن زامانا تالابىنا ساي ۇسىنا بىلگەنى ءجون. ۋاقىتتىڭ كوشىنە ىلەسە بىلسەك، وقىرمان دا تابىلادى. بۇل جوبا – قولىنا سمارتفون ۇستاعان قازىرگى وقىرمان قاۋىمنىڭ كىتاپ وقۋىنا، رۋحانيات دۇنيەسىنەن الشاقتاپ كەتپەۋىنە قوسىلعان ۇلەس بولادى دەپ سەنەمىز»، – دەگەن پىكىرىن ءبىلدىردى.

قوعام قايراتكەرى، عالىم، مىرزاتاي جولداسبەكوۆ ءوز كەزەگىندە جوبانىڭ بولاشاعىنا سەنىم بىلدىرە وتىرىپ، كەزىندە ءوزىنىڭ جەكە سايتىن ميلليوننان استام اقشاعا جاساتقانىن ايتىپ، تەگىن جاسالعان سايتتاردى يەلەنگەن قالامگەرلەرگە قىزىعىپ قالعانىن ءازىل ارالاستىرا جەتكىزدى. اكادەميك سەيىت قاسقاباسوۆ «Smart qalamger» جوباسىنا جارقىن بولاشاق تىلەپ، باتاسىن بەردى.

تۇساۋكەسەر راسىمىندە قر ۇلتتىق مەملەكەتتىك كىتاپ پالاتاسىنىڭ ديرەكتورى ءادىل قويتانوۆ جازۋشىلارعا ارناپ جاسالعان ۆەب-سايتتارمەن جينالعان قاۋىمدى تانىستىرىپ، ءارى قاراي جۇرگىزۋ ءۇشىن سايت يەلەرىنە سەرتيفيكاتتار تاپسىردى. ال «اقپاراتتىق-تەحنولوگيالىق ورتالىعى» قوعامدىق قورىنىڭ پرەزيدەنتى قانات تاڭاتاروۆ جازۋشى قاۋىمىنىڭ جوبا تۋرالى سۇراقتارىنا جاۋاپ بەردى.

وسى ورايدا ەسكەرتە كەتەتىن ءبىر ماسەلە – «Smart qalamger» جوباسى مەملەكەت تاراپىنان قارجىلاندىرىلمايدى. كىتاپ پالاتاسىنىڭ ەلەكتروندى بازاسىن جاساۋدا سەرىكتەسىپ جۇمىس ىستەۋ ءۇشىن دايىندالعان الەۋمەتتىك جوبا ارقىلى ەندى ءار جازۋشى ءوز جەكە سايتىن ءوز كونتەنتىمەن تولتىرىپ، ءوز شىعارماشىلىعىن عالامتوردا قالىڭ وقىرمانعا ۇسىنا الادى.

جاھاندانۋ داۋىرىندە ەلىمىز باسەكەگە قابىلەتتى، دامىعان ەلدەر قاتارىندا بولۋى ءۇشىن «تسيفرلى قازاقستان» باعدارلاماسىنىڭ ماڭىزى زور. جازۋشىلارعا جاڭا زاماننىڭ، ۋاقىتتىڭ تالابىنا ساي بولۋعا مۇمكىندىك بەرەتىن «Smart qalamger» جوباسى جازۋشىلار تاراپىنان ۇلكەن قولداۋعا يە بولۋدا.

گاۋھار تۇرسىنقوجا

سوڭعى جاڭالىقتار