4 شىلدە, 12:56 217 0 نۇر وتان تاڭسۇلۋ الدابەرگەنقىزى

«وڭىرگە ەت كومبيناتى كەرەك»،– دەيدى وبلىس اكىمى شارۋا قوجالىعىنداعى جۇزدەسۋىندە

ەلباسىمىزدىڭ جىل سايىنعى حالىققا ۇندەۋىندە تۇراقتى تۇردە ايتىلىپ كەلە جاتقان ماسەلەلەردىڭ ءبىرى – اۋىل تۇرعىندارىنىڭ جاعدايىن جاقسارتۋ. وسى رەتتە «اگروونەركاسىپتىك كەشەندى 2017-2021 جىلدارعا ارنالعان باعدارلاماسى اياسىندا «جۇمىسپەن قامتۋدىڭ جول كارتاسى» باعىتىندا «اۋىلداعى جۇمىس ورنى» جاڭا جوباسى ومىرگە كەلگەنى بەلگىلى. وندا ۇكىمەتكە جەرگىلىكتى اكىمدەرمەن بىرلەسىپ، ەلدى مەكەندەردە اۋىلشارۋاشىلىعى ونىمدەرىن وتكىزۋ جانە قايتا وڭدەۋدى قامتاماسىز ەتەتىن كووپەراتيۆتەر ۇيىمداستىرۋ جونىندە شارالار قابىلداۋدى قاتاڭ تاپسىرعان بولاتىن. اسىرەسە، «كووپەراتسيالار تۋرالى» زاڭنىڭ قابىلدانىپ، بەكىتىلۋى ءبىراز وڭىرلەردەگى شاعىن جانە ورتا كاسىپپەن اينالۋشىلار قاتارىن ارتتىردى.

ەلىمىزدىڭ اۋىلشارۋاشىلىعى ونىمدەرىن ءوسىرىپ، ساتۋمەن قاتار مال شارۋاشىلىعىنىڭ ونىمدەرىن دە قاتاڭ نازاردا ۇستاۋى زاڭدىلىق. ويتكەنى، قازاقستاندا ەتتى مال شارۋاشىلىعىن دامىتۋ اگرارلىق سالانىڭ باسىم باعىتتارىنىڭ ءبىرى بولىپ تابىلادى. وسى رەتتە قاراعاندى وبلىسىنداعى اتقارىلىپ جاتقان تىرلىكتەرگە توقتالا كەتۋدى ءجون سانادىق. وبلىستىڭ اگروونەركاسىپ كەشەنى سالاسى ءوندىرىس­تىڭ وسۋىمەن، اۋىلداردا قارجى قىزمەتىنىڭ دامۋىمەن، اۋىل تۇرعىندارىنىڭ ءومىر ءسۇرۋ دەڭگەيىنىڭ وسۋىمەن سيپاتتالادى. ول ءۇشىن جىل سايىنعى ءوسىم مالىنىڭ ىشكى جانە سىرتقى ساتىلىمدارىن رەتكە كەلتىرۋ جاقسى ناتيجەگە قول جەتكىزەتىنى بەلگىلى. سوندىقتان دا بيىل وزبەكستانعا مال شارۋاشىلىعى ونىمدەرىنىڭ ەكسپورتىن كۇشەيتۋ ماقساتىندا «جاكە» شارۋا قوجالىعى 28 مىڭ بۇقا جەتكىزۋ تۋرالى كەلىسىم-شارت جاساعان. بىراق تاپسىرىس بەرۋشىلەردىڭ سۇرانىسى بويىنشا ءاربىر بۇقانىڭ سالماعى 400 كەلىدەن كەم بولماۋى كەرەك.

ايماق اكىمى ەرلان قوشانوۆ «جاكە» شارۋا قوجالىعىنىڭ بورداقىلاۋ الاڭىندا بولىپ، كاسىپورىننىڭ بۇگىنگى تىندىرعان تىرلىكتەرى مەن الداعى جوسپارلارىنا قانىق بولدى. جيىرما گەكتار ايماقتا مال قورالارى مەن باسقا دا وندىرىستىك ءۇي-جايلارى ورنالاسقان ءىرى قارا مالىن بورداقىلاۋعا ارنالعان بۇل الاڭ بۇقار جىراۋ اۋدانىنا قاراستى ۇشتوبە اۋىلدىق وكرۋگىندە ورنالاسقان. جاڭا تەحنولوگيا زامانىنا سايكەستەن­دىرىلگەن بۇل جەردە مال جەمدەرىن تاراتۋ مەحانيكالاندىرىلعان، سۋارعىشتارى دا اۆتوماتتى جۇيە بويىنشا ارەكەت ەتەدى.

– ەكى جىل ىشىندە ءوندىرىس كولەمىن 5500 باسقا دەيىن وسىردىك. الداعى ۋاقىتتا بۇل كورسەتكىش 10 مىڭ باسقا دەيىن كوبەيتىپ، جىلىنا 40 مىڭ باس بورداقىلانعان بۇقالاردى ساتۋعا شىعارامىز دەگەن ماقسات بار،– دەيدى كاسىپورىن وكىلى ا.سىزدىقوۆ.

كاسىپورىننىڭ مال شارۋاشىلىعى ونىمدەرىن ەلدىڭ ىشكى نارىعىمەن قاتار شەتەلگە دە ساتۋعا مۇمكىندىگى بار. ەكسپورتتىق جەتكىزىلىمدەر ەكى باعىتتا جۇرەدى. شارۋا قوجالىعىنىڭ ونىمدەرى وزبەكستان مەن يرانعا شىعارىلادى. ال «سىباعا» باعدارلاماسى بويىنشا رەسەيدەن 5000, پولشادان 2000 باس ءىرى قارا ساتىپ الۋدى جوسپارلاپ وتىر. ساتىپ الىناتىن ءىرى قارالاردىڭ گەنەتيكاسىن جاقسارتۋ جۇمىستارى دا نازاردان تىس قالعان ەمەس. وسى رەتتە «جاكە» شارۋا قوجالىعى مال شارۋاشىلىعىنىڭ ونىمدەرىن ارتتىرۋ ماقساتىندا جەرگىلىكتى فەرمەرلەرمەن دە تىعىز بايلانىس ورناتقان.

– وڭىرگە ەت وڭدەۋ كومبيناتى وتە قاجەت. بۇگىندە «قاراپايىم زاتتاردىڭ ەكونوميكاسى» اتتى جاڭا باعدارلاما پايدا بولىپ، مەملەكەتتىك قولداۋ جولدارى قاراستىرىلۋدا. سوندىقتان دا قولدا بار مۇمكىندىكتى پايدالانۋ كەرەك، – دەدى وبلىس اكىمى.

وتكەن جىلى ەلوردامىزدا ۇيىمداستىرىلعان قاراعاندى وبلىسى اۋىلشارۋاشىلىعى ونىمدەرىنىڭ جارمەڭكەسىندە 98 توننا – ەت، 12 توننا – ءسۇت ونىمدەرى، بالىق – 5, كارتوپ – 350, 75 توننا كوكونىسپەن قاتار 360 مىڭ دانا جۇمىرتقا ساتىلىپ، سونىمەن قاتار اۋىلشارۋاشىلىعى ونىمدەرىنىڭ بۇل ءىس-شاراسىندا باۋىرساق پەن قىمىز فەستيۆالى دە ۇيىمداستىرىلعانى وسىنداي كاسىپورىندار ەڭبەگىنىڭ جەمىسى ەكەنى داۋسىز.

تاڭسۇلۋ الدابەرگەنقىزى

سوڭعى جاڭالىقتار