15 شىلدە, 11:27 285 0 بىلگەنگە مارجان Túrkistan Gazeti

ارىستا تۇندە دە قۇرىلىس جۇمىستارى ءجۇرىپ جاتىر

ارىس قالاسىن قالپىنا كەلتىرۋ باعىتىنداعى جۇمىستار جالعاسىپ جاتىر.  جالپى،  قالادا 8401 ءۇي تىركەلسە،  ونىڭ 7097-ءسى زاقىمدالعان.  سونىمەن بىرگە 104 كوپقاباتتى ءۇيدىڭ 94-ىنە جوندەۋ جۇمىستارى تاعايىندالعان.
سوندىقتان وسى ۇيلەردى جىلدام ءارى ساپالى جوندەۋ،  قالپىنا كەلتىرۋ ءۇشىن قۇرىلىسشىلار تۇندە دە جۇمىستى جالعاستىرىپ كەلەدى. ماسەلەن، كەيبىر سەكتورلاردا جەر ۇيلەردىڭ شاتىرىن جابۋ ارەكەتى تۇندە دە تولاستاعان جوق.  جالپى ارىستاعى قۇرىلىسقا ەلىمىزدىڭ 14 وبلىسى مەن 3 قالاسىنان كەلگەن 5 مىڭداي قۇرىلىسشى،  180-نەن استام مەردىگەر تارتىلعان.  جەرگىلىكتى تۇرعىندار دا اقىلى قۇرىلىس جۇمىسىنا قابىلدانىپ جاتىر.
17 سەكتورعا وبلىس،  قالا اكىمدىكتەرىمەن بىرگە اۋدان اكىمدىكتەرى دە بەكىتىلگەن.  ولار سول سەكتور تۇرعىندارىن تىركەۋ،  قۇجاتتارىن قابىلداۋ،  گۋمانيتارلىق كومەك كورسەتۋ،  اۋماقتى قوقىستان تازالاۋ جانە وزگە دە جۇمىستارمەن اينالىسۋدا.  1-سەكتورعا اتىراۋ وبلىسى مەن جەتىساي اۋدانى جاۋاپتى.  مۇندا 482 ءۇي بار. جەتىسايلىق ازاماتتار تۇندە دە شتاب جۇمىسىن توقتاتپاي، تۇرعىندارعا كومەك كورسەتۋدە.  بارلىق سەكتوردا ەلگە دەگەن جاناشىرلىق،  جۇمىستى ەرتە اياقتاۋعا دەگەن قۇلشىنىس بار.
جەرگىلىكتى تۇرعىندار وسى جۇمىستى ۇيلەستىرە بىلگەن وبلىس باسشىلىعىنا، وزگە وڭىرلەردەن كومەككە كەلگەن ازاماتتارعا ريزاشىلىعىن بىلدىرۋدە.  11 شىلدەدەگى مالىمەت بويىنشا ارىستا 700-دەن استام ءۇي جوندەلدى.

سوڭعى جاڭالىقتار