12 شىلدە, 16:08 297 0 قوعام Túrkistan Gazeti

بەردىبەك ساپارباەۆ اتاۋلى كومەك الۋشىلاردى ەڭبەك ەتۋگە شاقىردى

شىمكەنتكە جۇمىس ساپارى اياسىندا قر ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپارباەۆ اتاۋلى الەۋمەتتىك كومەك، جاڭا جۇمىس ورىندارىن قۇرۋ، حالىقتى جۇمىسپەن قامتۋ جانە باسقا دا الەۋمەتتىك-ەڭبەك سالاسىنىڭ ماسەلەلەرى بويىنشا كەڭەس وتكىزدى.

ەڭبەك مينيسترلىگى باسشىسىنىڭ مالىمەتىنشە، بۇگىندە قازاقستاندا اتاۋلى الەۋمەتتىك كومەك الاتىن 291 مىڭ وتباسى نەمەسە 1 ميلليون 450 مىڭ ادامعا 87 ملرد تەڭگە تولەندى. بۇل رەتتە ااك الۋشىلاردىڭ 38%-ى شىمكەنت قالاسى مەن تۇركىستان وبلىسىنىڭ تۇرعىندارى. بەردىبەك ساپارباەۆ ااك-ءتىڭ نەگىزگى ماقساتى – قيىن جاعدايعا تاپ بولعان وتباسىلارعا كومەك كورسەتۋ، سونىڭ ىشىندە جۇمىسپەن قامتۋدىڭ بەلسەندى شارالارىن كورسەتۋ ارقىلى جاردەمدەسۋ ەكەنىنە ەرەكشە نازار اۋداردى.

وسىعان بايلانىستى ول جەرگىلىكتى جەرلەردە اقپاراتتىق-ءتۇسىندىرۋ جۇمىستارىن كۇشەيتۋ قاجەتتىگىن اتاپ ءوتتى. ءمينيستردىڭ مالىمەتىنشە، رەسپۋبليكا بويىنشا ەڭبەككە قابىلەتتى 85 مىڭ ااك الۋشىنىڭ تەك 32,5 مىڭى نەمەسە 38 پايىزى عانا الەۋمەتتىك كەلىسىم-شارتتار جاساسقان. تۇركىستان وبلىسىندا بۇل كورسەتكىش 29 پايىزدى، شىمكەنت قالاسىندا-9 پايىزدى قۇرايدى.

«كەيبىر جۇمىسقا قابىلەتتى ازاماتتار ااك-ءتى العىسى كەلەدى، بىراق جۇمىس ىستەۋدەن باس تارتادى. ەڭبەككە قابىلەتتى الەۋمەتتىك كومەك الۋشىلارمەن مىندەتتى تۇردە ولار جۇمىسقا ورنالاسا الاتىن، جاڭا ماماندىقتار مەن بيزنەس جۇرگىزۋ نەگىزدەرىن وقيتىن، گرانتتار مەن جەڭىلدەتىلگەن ميكروكرەديت الاتىن الەۋمەتتىك كەلىسىم-شارتتار جاساۋ كەرەك. ماسىلدىققا جاعداي جاساۋعا بولمايدى، سوندىقتان ءتيىستى وزگەرىستەر ەرەجەگە ەنگىزىلەتىن بولادى»، – دەدى ساپارباەۆ.

سونداي-اق ۆەدومستۆو باسشىسى اتاۋلى الەۋمەتتىك كومەك تاعايىنداۋ جانە تولەۋ كەزىندە بۇزۋشىلىقتارعا جول بەرىلمەۋىن تالاپ ەتتى.

«ءبىزدىڭ ماماندارىمىز «E-حالىق IP»-دە تىركەلمەگەن تولەمدەر، ارتىق تولەمدەر، ەكى ەسەلەنگەن تولەمدەر، ۋچاسكەلىك كوميسسيانىڭ تەكسەرۋىنسىز ااك تاعايىنداۋ سياقتى بىرقاتار بۇزۋشىلىقتاردى انىقتادى. مىسالى، مەنشىگىندە ءۇش قاباتتى كوتتەدج بەن اۆتوكولىگى بار ازاماتتارعا ااك تولەنىپ كەتكەن جاعدايلار دا ورىن العان. بۇل بيۋدجەت قاراجاتىن زاڭسىز پايدالانۋ بولىپ تابىلادى جانە وعان جاۋاپكەرشىلىك كوزدەلگەن. اكىمدىكتەرگە جەرگىلىكتى جەرلەردە باقىلاۋدى كۇشەيتۋ كەرەك»، – دەپ اتاپ ءوتتى ەڭبەك ءمينيسترى.

وسىعان بايلانىستى مينيسترلىك تاراپىنان اكىمدىكتەرمەن جانە قۇقىق قورعاۋ ورگاندارىمەن بىرلەسىپ انىقتالعان بۇزۋشىلىقتاردى جويۋعا، زاڭسىز تولەنگەن قاراجاتتى بيۋدجەتكە قايتارۋعا، سونداي-اق بولاشاقتا مۇنداي بۇزۋشىلىقتارعا جول بەرمەۋگە باعىتتالعان جۇمىستار اتقارىلىپ جاتىر. سونىمەن قاتار، كەڭەستە جاڭا جۇمىس ورىندارىن اشۋ، جالاقى بويىنشا بەرەشەكتەردى تولەۋ، جۇمىسسىز جانە از قامتىلعان ازاماتتاردى «ەڭبەك» مەملەكەتتىك باعدارلاماسىنا تارتۋ ماسەلەلەرى قارالدى.

سوڭعى جاڭالىقتار