11 شىلدە, 10:11 365 0 ونەر اسەل انۋاربەك

«Nur Suńqar» جۇلدەگەرلەرى  انىقتالدى

كەشە نۇر-سۇلتان قالاسىندا  ونىنشى مارتە ۇيىمداستىرىلعان ءداستۇرلى «Nur Suńqar» بايقاۋى جۇلدەگەرلەرىنىڭ ەسىمدەرى بەلگىلى بولدى. «Nur Otan» پارتياسى جاريالاعان بايقاۋدىڭ قورىتىندىسىنا ساي ءوز ىسىندە وزات دەپ تانىلعان تىلشىلەر ماراپاتتالدى.

«Nur Suńqar» بايقاۋى 2010 جىلدان بەرى جىل سايىن وتكىزىلىپ كەلەدى. وسى جىلدار ىشىندە كونكۋرستى وتكىزۋ ۇلگىسى، ەرەجەسى، ونداعى اتالىمدار مەن جۇلدەلەر دە وزگەرتىلىپ، جەتىلدىرىلدى. بۇگىندە بۇل بايقاۋ مەديا سالاسىنىڭ قىزمەتكەرلەرىن ىنتالاندىرۋعا باعىتتالعان بەدەلدى ءىس-شارالاردىڭ قاتارىنا ەندى. الايدا كونكۋرستىڭ ءاۋ باستاعى ماقساتى وزگەرگەن جوق. بايقاۋ قازاقستاندىق جۋرناليستەردى، بلوگەرلەر مەن شىعارماشىلىق ۇجىمداردى  قولداۋ، ولاردىڭ وتاندىق كاسىبي جۋرناليستيكانى دامىتۋعا، قوعامدى جەدەل ءارى وبەكتيۆتى اقپاراتپەن قامتاماسىز ەتۋگە قوسقان ۇلەسىن باعالاۋدى ماقسات ەتەدى.

ونىنشى مارتە ۇيىمداستىرىلعان بايقاۋدىڭ ماراپاتتاۋ سالتاناتىندا «Nur Otan» پارتياسى توراعاسىنىڭ ءبىرىنشى ورىنباسارى باۋىرجان بايبەك: «جاڭا تەحنولوگيالار دامىپ كەلەدى، سۇرانىس وزگەرۋدە. كوپ ادامدار اقپاراتتى الەۋمەتتىك جەلىدەن الادى. كەز كەلگەن ادامدا ءوز پىكىرىن، ويىن الەۋمەتتىك جەلى ارقىلى حالىققا جەتكىزۋ مۇمكىندىگى بار.  دەگەنمەن، كاسىبي جۋرناليستەردىڭ ماڭىزدى ءرولى حالىق ءۇشىن وتە قاجەت»، – دەدى.

قر اقپارات جانە قوعامدىق دامۋ ءمينيسترى داۋرەن اباەۆ جۋرناليستەردى قۇتتىقتاپ، جىلى لەبىزىن ءبىلدىردى. «بۇگىنگى ماڭىزدى وقيعامەن بارلىقتارىڭىزدى قۇتتىقتايمىن. «Nur Suńqar» سىيلىعى مەديا-لاندشافتى وزگەرتتى دەپ ايتۋعا بولادى. بۇل تۇرعىدا وڭ ناتيجە جالعاسىن تابادى دەپ سەنەمىن. ۇزدىكتەر لايىقتى ماراپاتتارعا قول جەتكىزە بەرسىن»، – دەدى مينيستر.

ۇيىمداستىرۋشىلاردىڭ ايتۋىنشا، بيىل كونكۋرستىڭ ۇيىمداستىرۋ كوميتەتىنە 207 قاتىسۋشىدان مىڭعا جۋىق جۇمىس كەلىپ ءتۇستى. جەڭىمپازدار 10 اتالىم بويىنشا انىقتالدى. سونىمەن، كوميسسيا شەشىمىمەن «حالىق داۋىسى» نوميناتسياسى بويىنشا «قازاقستان» ۇلتتىق ارناسىنداعى «اپتا» باعدارلاماسىنىڭ رەداكتور-ساراپشىسى ايبەك قوبداباي ۇزدىك تەلەۆيزيالىق جۋرناليست اتاندى. ال «توچكا زرەنيا» اتالىمىن «حابار24» ارناسىنىڭ شىعارۋشى رەداكتورى جۇراعات بامان جەڭىپ الدى. «ءسوز زەرگەرى» نوميناتسياسى بويىنشا «ەگەمەن قازاقستان» گازەتى باس رەداكتورىنىڭ ورىنباسارى عابيت مۇسىرەپ ۇزدىك گازەت ءجۋرناليسى دەپ تانىلدى. «ليتەر» رەسپۋبليكالىق قوعامدىق-ساياسي گازەتىنىڭ ءتىلشىسى تالعات يسەنوۆ «ماستەر سلوۆا» اتالىمى بويىنشا ماراپاتتالدى. ينتەرنەت باسىلىمدارى جۋرناليستەرىنىڭ اراسىندا Bnews.kz اقپارات اگەنتتىگىنىڭ باس رەداكتورى اقمارال ولجاباەۆا «مەديا-پروفي» نوميناتسياسىن جەڭىپ الدى. «جاس سەرپىلىس» نوميناتسياسى «حابار» ارناسى ساراپتامالىق باعدارلامالار ءبولىمىنىڭ تىلشىلەرى ساكەن ماحامەتكەرىموۆ پەن نازىمگۇل كۇمىسباەۆاعا بۇيىردى.

سونىمەن قاتار، «Nur Suńqar» بايقاۋىنىڭ ۇيىمداستىرۋشىلارى ۇسىنعان ەلباسى قىزمەتىن ەرەكشە جارىققا شىعارعان «كازاحستانسكايا پراۆدا» گازەتىنىڭ ارنايى ءتىلشىسى يگور پروحوروۆ «ەلباسى سالعان سارا جول» نوميناتسياسىنا يە بولدى. ال «پارتيا جوبالارى جايلى جارىق كورگەن ەڭ جاقسى جاريالانىم» ءۇشىن «استانا» تەلەارناسىنىڭ اقپاراتتىق-ساراپتامالىق باعدارلامالار قىزمەتىنىڭ ارنايى ءتىلشىسى ەكاتەرينا برىنيۋك پەن «ايقىن» گازەتىنىڭ شولۋشىسى گۇلجان راحمان ماراپاتتالدى. سونداي-اق، «جەتىسۋ» تەلەارناسىنىڭ قىزمەتكەرى، بەلگىلى تەلەجۋرناليست نۇرتىلەۋ يمانعاليۇلىنا وتاندىق جۋرناليستيكانىڭ دامۋىنا قوسقان ۇلەسى ءۇشىن «مايتالمان» نوميناتسياسى تابىستالدى. قوعامدىق سانانى جاڭعىرتۋ باعدارلاماسىن ناسيحاتتاۋعا قوسقان ۇلەسى ءۇشىن تاعايىندالعان «رۋحاني جاڭعىرۋ» اتالىمى «استانا» تەلەارناسىنىڭ اتقارۋشى پروديۋسەرى بازاركۇل وتىنشيەۆا مەن «اباي» جۋرنالىنىڭ ءتىلشىسى ايگۇل كەمەلباەۆاعا بۇيىردى.

 

سوڭعى جاڭالىقتار