9 شىلدە 2019, 17:03 547 0 سىرتقى ساياسات دينارا مىڭجاسارقىزى

بۇۇ: 2017 جىلى وتباسىداعى زورلىق-زومبىلىقتان 50 مىڭ ايەل كوز جۇمدى

بۇۇ-نىڭ ەسەبىنشە، 2017 جىلى الەمدە 50 مىڭ ايەل مەن جاس قىز وتباسىنداعى زورلىق-زومبىلىق سالدارىنان كوز جۇمعان. ءبىر جىلدىڭ ىشىندە الەمدە 87 مىڭ ايەل ەرىنەن ءزابىر كورگەن. بۇل تۋرالى بۇۇ 8 شىلدەدە جاريالاعان ەسىرتكى جانە قىلمىس جايلى ەسەبىندە ايتىلعان.

بۇۇ 2017 جىلى اسكەري قاقتىعىستاردىڭ سالدارىنان الەمدە 89 مىڭ ادام مەرت بولعانىن مالىمدەدى.

ەسەپ اۆتورلارى 2017 جىلى 2012 جىلمەن سالىستىرعاندا وتباسىداعى زورلىق سالدارىنان قايتىس بولعاندار سانى وسكەنىن ايتادى. بۇۇ دەرەگىنشە، ايەلدەردى زورلاۋ فاكتىسى ازيادا (20 مىڭ) كوپ تىركەلگەن. افريكادا – 19 مىڭنان استام ايەل، امەريكادا – 8 مىڭ، ەۋروپادا 3 مىڭ ايەل ەرىنىڭ قولىنان قازا تاپقان.

قازاقستاندا دا جىل سايىن مىڭداعان ايەل وتباسىنداعى زورلىق-زومبىلىقتان زارداپ شەگەدى. قازاقستان باس پروكۋراتۋراسى دەرەگىنشە، 2016 جىلى ەلدە وتباسىنداعى زورلىق-زومبىلىقتان 36 ايەل مەن ءبىر بالا قازا بولعان. ايەلدەر قۇقىعىن قورعايتىن ۇيىمدار ەرىنەن تاياق جەيتىن ايەلدەردىڭ سانى رەسمي ستاتيستيكادان دا كوپ دەپ سانايدى. قۇقىق قورعاۋ ۇيىمدارىنىڭ مالىمدەۋىنشە، قازاقستاندا كۇيەۋىنەن تاياق جەگەن ايەلدەر ماسەلەسىن اشىق ايتىپ، سوتقا شاعىمدانا بەرمەيدى، سوندىقتان مۇنداي جايتتار كوبىنە اشىلماي قالادى.

2017 جىلعى شىلدەدە قازاقستان "ۇرىپ-سوعۋ" جانە "دەنساۋلىعىنا قاساقانا جەڭىل زاقىم كەلتىرۋ" باپتارى اكىمشىلىك قۇقىق بۇزۋشىلىق تۋرالى كودەكسكە اۋىستىرىلعان. جىل باسىندا ىشكى ىستەر مينيسترلىگى ء(ىىم) تۇرمىستاعى زورلىق-زومبىلىقتىڭ الدىن الۋعا قاتىستى احۋالدىڭ ناشارلاپ كەتۋىنە سىلتەپ، وتباسىنداعى ۇرىپ-سوعۋدان قىلمىستىق سيپاتتى الىپ تاستاۋدى ۇسىنعان. قۇقىق قورعاۋ ۇيىمدارى قازاقستان بيلىگىنەن بۇل وتباسىنداعى ۇرىپ-سوعۋ وقيعالارىنا قايتادان قىلمىستىق سيپات بەرۋدى تالاپ ەتكەن. بىراق بيلىك ولاردىڭ سوزىنە قۇلاق اسپادى.

سوڭعى جاڭالىقتار