9 شىلدە, 13:04 375 0 ءبىلىم Túrkistan Gazeti

الماتىدا نەيرورەابيليتاتسيالىق ورتالىق قۇرىلادى

ءال-فارابي اتىنداعى قازۇۋ مەن ماكگيلل ۋنيۆەرسيتەتى (كانادا) مەديتسينا سالاسىنداعى ىنتىماقتاستىق جانە بىرلەسكەن نەيرورەابيليتاتسيالىق ورتالىقتى قۇرۋ تۋرالى مەموراندۋمعا قول قويدى.

ورتالىق №1 قالالىق كلينيكالىق اۋرۋحانا بازاسىندا قۇرىلاتىن بولادى. اۋرۋحانا ينفاركت پەن ينسۋلتتەردەن، بالالاردىڭ تسەرەبرالدى سالىنان جانە نەيروگەنەراتيۆتى اۋرۋلاردان كەيىن ەرتە وڭالتۋعا مامانداندىرىلعان اۋرۋحانا قازاقستاننىڭ جەتەكشى جوو-نىڭ ءبىرى ءال-فارابي اتىنداعى قازۇۋ-دىڭ باسقارۋىنا بەرىلگەن بولاتىن.

وقۋ جىلىنىڭ باسىندا قازۇۋ-عا كانادادان الەمگە تانىمال پروفەسسورلار كەلىپ، قازاقستانداعى دەنساۋلىق ساقتاۋ سالاسى ماماندارى ءۇشىن پراكتيكالىق سەمينارلار مەن شەبەرلىك سىنىپتارىن وتكىزەدى. ولاردىڭ ىشىندە: مايكل شەۆەلل - پەدياتريا فاكۋلتەتىنىڭ دەكانى جانە مونرەال بالالار اۋرۋحاناسىنىڭ باس دارىگەرى; اننەت ماجنەمەر - دەكاننىڭ ءبىلىم جونىندەگى ورىنباسارى، تسەرەبرالدى سال جانە مەديتسينانى دامىتۋ سالاسىنىڭ جەتەكشى ساراپشىسى; لارري سي لەندس – وكپەنىڭ گەنەتيكالىق اۋرۋلارى سالاسىنداعى بەلگىلى عالىم جانە ساراپشى، مەديتسينا فاكۋلتەتىنىڭ پەدياتريالىق پۋلمونولوگيا ءبولىمىنىڭ مەڭگەرۋشىسى، مۋكوۆيستسيدوز جانە وكپەنى ترانسپلانتاتسيالاۋ كلينيكاسىنىڭ ديرەكتورلارى بار.

ولار قازاقستاندىق ارىپتەستەرىن زاماناۋي كەشەندى باعدارلامالارمەن، اۋرۋلاردى ەمدەۋ مەن وڭالتۋدىڭ ءدارى-دارمەكتىك جانە ءدارى-دارمەكتىك ەمەس ادىستەرىمەن تانىستىرىپ، وزىق تاجىريبەمەن جانە ادامنىڭ جۇيكە جۇيەسى اۋرۋلارىن زەرتتەۋ ناتيجەلەرىمەن بولىسەدى.

ماكگيلل ۋنيۆەرسيتەتىنىڭ ماماندارى ءال-فارابي اتىنداعى قازۇۋ نەيرورەابيليتاتسيالىق ورتالىعىنىڭ قىزمەتىنە، نەيرودەگەنەراتيۆتى اۋرۋلاردى ەمدەۋ مەن وڭالتۋدىڭ جاڭا تەحنولوگيالارىنىڭ ترانسفەرتىنە ۇنەمى كەڭەس بەرەدى. ورتالىقتىڭ قۇرىلۋى بىرلەسكەن زەرتتەۋ جانە عىلىمي-ءبىلىم بەرۋ جۇمىستارىن جۇرگىزۋگە، قازۇۋ-دىڭ مەديتسينا فاكۋلتەتىنىڭ ستۋدەنتتەرىنىڭ تاجىريبەلىك دايىندىعىن جۇرگىزۋگە دە مۇمكىندىك بەرەدى. بولاشاقتا ورتالىق مەديتسينالىق تۋريزم درايۆەرلەرىنىڭ ءبىرى جانە نەيرودەگەنەراتيۆتى اۋرۋلاردى ەمدەۋ مەن وڭالتۋ جونىندەگى ورتالىق ازيا حابىنا اينالۋى ءتيىس.

اتاپ ءوتۋ كەرەك، قازۇۋ-دا «كاننام سەۆەرانس» كلينيكاسىمەن (كورەيا رەسپۋبليكاسى) بىرلەسە اشىلعان مەديتسينالىق دياگنوستيكالىق ورتالىق تابىستى جۇمىس ىستەۋدە. اعىمداعى جىلدىڭ تامىز ايىندا وڭتۇستىككورەيالىق دارىگەرلەر كەزەكتى رەت الماتىعا كەلىپ، ۋنيۆەرسيتەت قىزمەتكەرلەرى مەن قالا تۇرعىندارىنا تەگىن كەڭەس بەرەدى.

سوڭعى جاڭالىقتار