9 شىلدە, 16:37 374 0 جاھان Túrkistan Gazeti

گرۋزيالىقتار تىكەلەي رەسەيگە ۇشا المايتىن بولدى

رەسەي پرەزيدەنتى ۆلاديمير ءپۋتيننىڭ جارلىعىمەن 8 شىلدەدەن باستاپ رەسەيلىك جانە گرۋزيالىق اۋە كومپانيالارىنا ەكى ەل اراسىندا تىكەلەي رەيس ورىنداۋعا تىيىم سالىندى. ونىڭ كۇشى قاشان جويىلاتىنى ازىرگە بەلگىسىز. 

وسى ۋاقىتقا دەيىن ەكى ەل اراسىندا تىكەلەي رەيستى رەسەيلىك "اەروفلوت", "پوبەدا", S7, "ۋرالسكيە اۆياليني", Red Wings, "نورداۆيا" جانە ەكى گرۋزيالىق – Georgian Airways جانە MyWay Airlines اۋە كومپانيالارى ورىنداعان ەدى.

جەكسەنبى، 7 شىلدەدە رەسەيلىك "ۋرالسكيە اۆياليني" جانە S7 ۇشاقتارى تبيليسي اۋەجايىنان رەسەي باعىتىنا قاراي سوڭعى رەيستى ورىندادى.

رەسەيدىڭ كولىك ءمينيسترى ەۆگەني ءديتريحتىڭ سوزىنشە، قازىر گرۋزيادا ءتورت جارىم مىڭعا جۋىق رەسەيلىك تۋريست قالعان. ولار اۋە قاتىناسىنا تىيىم سالىنعانعا دەيىن بيلەتىن تاپسىرماعان نەمەسە باسقا كۇنگە اۋىستىرماعان.

دەسە دە بۇعان دەيىن رەسەيلىك جولاۋشىلارعا 8 شىلدەگە نەمەسە ودان كەيىنگى داتاعا الىنعان بيلەتتى ەشقانداي ايىپپۇلسىز قايتارىپ، اقشانى كەرى الۋعا بولاتىنى، نەمەسە باسقا باعىتقا راسىمدەۋگە بولاتىنى جايلى ايتىلعان ەدى.

ەسكە سالا كەتەيىك، تبيليسيدەگى نارازىلىق اكتسياسى 20 ماۋسىم كۇنى باستالدى. شەرۋگە شىققاندار رەسەيلىك دەلەگاتتاردىڭ پارلامەنتارالىق پراۆوسلاۆيە اسسامبلەياسىنىڭ سەسسياسىنا قاتىسۋىنا قارسى بولعان. وعان مەملەكەتتىك دۋما دەپۋتاتى سەرگەي گاۆريلوۆتىڭ گرۋزيا پارلامەنتىندە سپيكەردىڭ مىنبەرىنە شىعىپ، ورىس تىلىندە سويلەۋى تۇرتكى بولعان.

ميتينگكە شىققاندار ۇكىمەتتىڭ وتستاۆكاعا كەتۋىن تالاپ ەتىپ، رەسەيلىك وكىلدەر وتىرعان پارلامەنتتىڭ عيماراتىنا باسا-كوكتەپ كىرمەك بولدى.

الايدا ارنايى جاساق سۋ اتقىش، رەزەڭكە وقتار مەن كوزدى جاساۋراتاتىن گازدى قولدانىپ، ميتينگكە شىققانداردى تاراتتى. الايدا 21 ماۋسىمدا نارازىلىق تاعى جالعاستى. 240 ادام زارداپ شەگىپ، 300-دەن استامى ۇستالدى.

ءدال سول كۇنى گرۋزيا پارلامەنتىنىڭ باسشىسى يراكلي كوباحيدزەنىڭ وتستاۆكاعا كەتكەنى ءمالىم بولدى.

سوڭعى جاڭالىقتار