9 شىلدە, 11:26 414 0 سپورت Túrkistan Gazeti

جاۋىنگەرلىك ونەر بويىنشا ەڭ ۇزدىك ايماق انىقتالدى

ۇر-سۇلتان قالاسىندا جاۋىنگەرلىك ونەر گالا-فەستيۆالى ءوتتى. وندا قازاقستاننىڭ تۇكپىر-تۇكپىرىندە وتكەن جاۋىنگەرلىك فەستيۆالدەر قورىتىندىلانىپ، ۇزدىكتەر انىقتالدى.

10 مىڭعا جۋىق كورەرمەن جيناپ، ۇلكەن سپورتتىق مەرەكە ۇيىمداستىرعان اتىراۋ وبلىسى ۇزدىك دەپ تانىلدى. اتىراۋ وبلىسى جاۋىنگەرلىك ونەر قاۋىمداستىعىنىڭ ديرەكتورى ەرلان حيسمەتۇلىنىڭ ايتۋىنشا، بۇل جەڭىس بارشا اتىراۋ جۇرتىنا ورتاق. «اتىراۋدا ۇيىمداستىرىلعان فەستيۆال حالىقتىڭ وليمپيادالىق ەمەس سپورت تۇرلەرىن جاقسى كورەتىنىن دالەلدەپ بەردى. اتىراۋ وبلىسى دەنە شىنىقتىرۋ جانە سپورت باسقارماسىنىڭ قولداۋىمەن ەستە قالارلىقتاي كەش ۇيىمداستىرا الدىق. الداعى ۋاقىتتا مۇنىمەن توقتاپ قالماي، ۇلكەن سپورتتىق شارالاردى باسقارمامەن بىرلەسە وتكىزۋدى جوسپارلاپ وتىرمىز. فەستيۆال نەگىزگى ماقساتىنا جەتتى، قورىتىندىسىندا وبلىسىمىزدا 600-گە جۋىق جاس سپورتقا كەلىپ، قىزىعۋشىلىق تانىتتى»، - دەيدى ەرلان حيسمەتۇلى.

ايتا كەتۋ كەرەك، نۇر-سۇلتان قالاسىنداعى فەستيۆال اياسىندا كيكبوكسشى ابزال ءدۇسىپوۆ پەن پانكراتيون شەبەرى جۇماگەلدى جالعاسۇلى كاسىپقوي ارەنادا كەزەكتى كەزدەسۋلەرىندە جەڭىسكە جەتسە، مۋاي-تاي سپورتىنان ەلامان ساياساتوۆ تايلاندتىق قارسىلاسىن جەڭىپ، كاسىپقويلار اراسىندا الەم چەمپيونى بەلبەۋىنە يە بولدى.

 

سوڭعى جاڭالىقتار