5 شىلدە, 12:24 473 0 ادەبيەت "تۇركىستان" گازەتىنىڭ اۆتورلارى

«كوشباسشىلىق» – كەرەك كىتاپ

سوڭعى كەزدە بارلىق ەلدە موتيۆاتسيالىق باعىتتاعى كىتاپتار كوپتەپ شىعىپ جاتىر جانە ولار ۇلكەن سۇرانىسقا يە. سەبەبى ادامنىڭ قابىلەتىن اشۋعا پايداسى زور، ايبەرگەنوۆشە ايتقاندا، «جانام دەگەن جۇرەككە وت بەرەتىن» ونداي دۇنيەلەر جاڭا زاماننىڭ جاڭا ادامدارىن قالىپتاستىراتىنى ءسوزسىز.

كۇللى الەمدىك بۇل ۇدەرىستەن قازاقستان دا سىرت قالعان جوق. ءبىزدىڭ ەلىمىزدە دە ىسكەرلىك الىپپەسى، كوشباسشىلىق قاعيدالارى سىندى ادامدى جان-جاقتى دامىتاتىن كىتاپتار جارىق كورىپ، وقىرماندارىن تاۋىپ جاتىر.

سونداي كىتاپتىڭ بىرەگەيى – «مازمۇنداما» قورىنىڭ جەتەكشىسى، جۋرناليست شىڭعىس مۇقاننىڭ «كوشباسشىلىق» اتتى كىتابى. تاياۋدا الماتى قالاسىندا تانىستىرىلىمى وتكەن كىتاپ 3 مىڭ دانامەن قازاق جانە ورىس تىلدەرىندە جارىق كورگەن. كىتاپ يەسىنىڭ ايتۋىنشا، كىتاپتا جەكە تۇلعالاردى جانە جالپى قوعامدى دامىتاتىن نەبىر يدەيالار بار.

شىڭعىس مۇقان ءوز كىتابى تۋرالى بىلاي دەيدى: «سوڭعى ەكى جىلدا امەريكادا وقىپ، كوپتەگەن تاقىرىپتاردى زەرتتەدىم، كوپتەگەن كىتاپتاردى وقىدىم. ونىڭ ىشىندە ليدەرلىك تاقىرىبى وزىمە قاتتى ۇنادى. وسى تاقىرىپتاعى مىقتى شەتەلدىك كىتاپتاردى وقىپ وتىرىپ، ونداعى يدەيالارعا تاڭ قالدىم. جانە وسىلاردى نەگە قازاقشاعا اۋدارماسقا دەپ زەرتتەي باستادىم. سويتسەم، اعىلشىن تىلىندە كوشباسشىلىق تۋرالى 7,5 مىڭ كىتاپ شىققان ەكەن. سونىڭ ىشىنەن مىقتى دەگەن ون كىتاپتىڭ قايماعىن قالقىپ الىپ، ءبىر كىتاپقا مازمۇنداپ سىيعىزدىق. سونىمەن قاتار بۇل كىتاپتى وقىعان ادام ءتىلدى دە ۇيرەنەدى، ياعني ورىسشا، اعىلشىنشا سوزدەرمەن سوزدىك قورىن تولتىرىپ وتىرادى».

كىتاپتىڭ تانىستىرىلىمىنا جازۋشىلار، اۋدارماشىلار مەن جۋرناليستەر قاتىسىپ، «كوشباسشىلىق» كىتابى تۋرالى ويلارىن ايتىپ جاتتى. قر پرەزيدەنتىنىڭ كەڭەسشىسى ماقسات سقاق كىتاپتىڭ ەل ازاماتتارى ءۇشىن وتە قاجەت دۇنيە ەكەنىن ايتا كەلىپ، ءسوزىن بىلاي تۇجىردى:

«بىزدەن تالاي ويشىلدار شىقتى. جەر كولەمى بويىنشا الەمدە العاشقى توعىزدىققا كىرەتىن مۇنداي جەردى اقىلسىز ەل يەلەنىپ، ساقتاپ قالا المايدى. ول ءۇشىن مىقتى رۋح كەرەك. رۋح دەگەنىمىز – كوشباسشىلىق. كوشباسشى كەز كەلگەن جاعدايدا ۇلتتىڭ ىشىنەن سۋىرىلىپ شىعادى. دەگەنمەن مەن، وسى كوشباسشىلىقتى ۇلتتىق تەرەڭدىگىمىزبەن بايلانىستىرعىم كەلەدى. قازاق بار نارسەگە كوڭىل بولگەن، ءبىزدىڭ ۇلىلىعىمىز سوندا. قۇنارلى جەردەن عانا ۇلكەن دۇنيەلەر شىعادى».

سونىمەن قازاققا ارنالعان زاماناۋي ۇردىستەردى تۇسىندىرەتىن جانە كەۋدەسىندە وتى بارلاردى العا ۇمتىلدىراتىن تاعى ءبىر كىتاپ وقىرمانعا جول تارتتى.

 

ا.جۇماعاليۇلى

 

تەگتەر كوشباسشىلىق

سوڭعى جاڭالىقتار