1 شىلدە, 12:44 522 0 ىشكى ساياسات دينارا مىڭجاسارقىزى

رۇقسات ەتىلگەن ميتينگ ءوتتى

قازاقستاننىڭ ءىرى قالالارى الماتى مەن نۇر-سۇلتاندا 30 ماۋسىمدا بىرنەشە جىلدان كەيىن العاش رەت رۇقسات ەتىلگەن ميتينگ ءوتتى.

الماتىداعى "سارىارقا" كينوتەاترىنىڭ ارتىندا وتكەن ميتينگىگە 800-900-عا جۋىق ادام جينالدى. ال نۇر-سۇلتانداعى "جەرۇيىق" ساياباعىندا وتكەن ميتينگىگە شامامەن ءجۇز شاقتى ادام كەلدى.

ازاتتىق راديوسى تىلشىلەرىنىڭ حابارلاۋىنشا، ميتينگ وتەتىن جەرلەردە تاڭەرتەڭنەن بەرى ونداعان پوليتسيا كەزەكشىلىك ەتكەن. بىراق اكتسيادان كەيىن ەشكىمدى ۇستامادى.

ميتينگىدە ءتۇرلى ماسەلەلەر ونىڭ ىشىندە ارىس وقيعاسى، مەملەكەتتىك ءتىلدىڭ احۋالى، ەلدەگى پارتيالار جۇيەسى سياقتى ماسەلەلەر كوتەرىلدى. شارانى ۇيىمداستىرۋشىلار سويلەگەن ازاماتتاردىڭ ءدال ۋاقىتىندا ءسوزىن اياقتاۋىن قاداعالاپ وتىردى.

الماتىداعى ميتينگتە قوعام قايراتكەرى رىسبەك سارسەنبايۇلى ەلدىڭ ءبىرىنشى پرەزيدەنتى نۇرسۇلتان نازارباەۆقا "سالەم" جولداپ:

"اقساقال، 30 جىل بويى حالىق موينىنا ءمىنىپ كەلدىڭىز. ەندى حالىق موينىنان ءتۇسىڭىز، بيلىكتەن تولىق كەتىڭىز. وزىڭىزبەن بىرگە بيلىك قولشوقپارى بولعان ىشكى ىستەر ءمينيسترى، وزگە دە شەنەۋنىكتەردى الىپ كەتىڭىز" دەدى.

استاناداعى اكتسيادا بەلسەندى بولاتبەك ءبىلالوۆ "19 ناۋرىزعا دەيىن ءبىز "شال كەت!" دەپ ايعايلاپ جۇرگەن ەدىك، ەندى "شالدار كەتىڭدەر!" دەپ ايعايلايمىز" دەدى.

قازاقستان زاڭناماسى بويىنشا ەلدە ميتينگ وتكىزۋ ءۇشىن جەرگىلىكتى بيلىكتەن رۇقسات سۇراۋ قاجەت. بۇعان دەيىن بىرقاتار بەلسەندىلەر اكىمدىكتىڭ شەرۋ وتكىزۋ جايلى ءوتىنىشتى كوپ جاعدايدا قاناعاتتاندىرمايتىنىن، ەلدە شەرۋ وتكىزۋ قيىندىعىن العا تارتقان ەدى. قازاقستان 2005 جىلى قول قويعان حالىقارالىق ساياسي جانە ازاماتتىق قۇقىق پاكتىسىنە سايكەس، بەيبىت جيىن وتكىزگىسى كەلگەن ازاماتتاردىڭ بيلىكتى تەك ەسكەرتۋى عانا جەتكىلىكتى.

سوڭعى جاڭالىقتار