1 شىلدە, 12:33 528 0 قوعام دينارا مىڭجاسارقىزى

ديماش قۇدايبەرگەن كونتسەرتتەن تۇسكەن قاراجاتتىڭ ءبىر بولىگىن ارىسقا اۋدارادى

  «شەتەلدە كوپ جۇرگەنىممەن،  ىلعي ەلىمنىڭ جاڭالىقتارىن ءبىلىپ وتىرامىن. ينتەرنەتتى اقتارعاندا ەڭ ءبىرىنشى ەلىمدە نە جاڭاىق بولىپ جاتقانىن قارايمىن. جاقىندا ارىستا بولعان وقيعا ماعان دا قاتتى باتتى. ءتىپتى كونتسەرت بەرۋ وسى كەزدە ىڭعايسىزداۋ سەكىلدى كورىندى،  سولاي ايتقاندار دا بولدى.

الايدا شەتەلدەن شاقىرىپ قويىلعان قوناقتار بار،  ارنايى كەلۋشىلەر بار! سولاردى ەسكەرۋ كەرەك بولدى. سوندىقتان ارىسقا كومەك رەتىندە وسى كونتسەرتتەن تۇسكەن قاراجاتتىڭ ءبىر بولىگىن اۋدارامىن دەپ شەشتىم. بۇل سىزدەردىڭ دە كومەكتەرىڭىز بوپ سانالادى،  اعايىن» - دەدى ديماش قۇدايبەرگەن كونتسەرت بارىسىندا. ايتا كەتسەك، بۇعان دەيىن د. قۇدايبەرگەننىڭ «ارناۋ» اتتى جەكە كونتسەرتى 29 ماۋسىم كۇنى ەلوردادا وتەتىنى جانە ديماشتىڭ كونتسەرتىنە ۇزىن-سونار كەزەك پايدا بولعانى تۋرالى حابارلاعان بولاتىنبىز. ديماش وسى كونتسەرتىندە  دەنيس تەنگە ارناپ ءان شىرقادى.      ەسكە سالساق، ارىس قالاسىنداعى اسكەري ءبولىمنىڭ قويماسىندا 24 ماۋسىم كۇنى تاڭەرتەڭ جارىلىس بولدى. سالدارىنان ءۇش ادام قازا تاپتى - ارىس تۇرعىنى مەن ەكى اسكەري قىزمەتشى. 170-كە جۋىق ادام زارداپ شەكتى. 20-عا جۋىق ءۇي، 9 قورا-قوپسى جانىپ، دالالى اۋماقتا 14 وشاق تۇتاندى. ءۇي-جايلار مەن عيماراتتاردىڭ 80-90 پايىزىنا ءارتۇرلى دەڭگەيدە زاقىم كەلدى. بىرقاتار وڭىردە شۇعىل جەلىلەر قۇرىلدى. تۇركىستان وبلىسىنا ارنايى بارعان قازاقستان پرەزيدەنتى قاسىم-جومارت توقاەۆ ارىستاعى اسكەري بولىمشەدەگى وق-ءدارى قويماسىنداعى جارىلىستان زارداپ شەككەن قالا تۇرعىندارىمەن كەزدەسىپ، قالانىڭ قالپىنا كەلتىرىلەتىنىنە ۋادە بەردى. سونداي-اق ەلباسى نۇرسۇلتان نازارباەۆ ارىستاعى جاعدايعا الاڭداۋشىلىق ءبىلدىردى.  ۇكىمەت وتىرىسىندا پرەمەر-مينيستر اسقار مامين جارىلىس سالدارىنان كوز جۇمعانداردىڭ تۋعان-تۋىستارىنا كوڭىل ايتىپ، تۇرعىندارعا بارلىق كومەك كورسەتىلەتىنىن ايتتى. كەلتىرىلگەن زالالدىڭ كولەمى باعالانىپ، ۇكىمەت رەزەرۆىنەن اقشا بولىنەدى.

سوڭعى جاڭالىقتار