28 ماۋسىم, 14:41 1026 0 قوعام دينارا مىڭجاسارقىزى

ەليزاۆەتا II توقاەۆقا جەدەلحات جولدادى

 قاسىم-جومارت توقاەۆتىڭ قازاقستان رەسپۋبليكاسىنىڭ پرەزيدەنتى بولىپ سايلانۋىنا وراي قۇتتىقتاۋ حاتتارى مەن جەدەلحاتتار ءالى كۇنگە دەيىن كەلىپ جاتىر، دەپ حابارلايدى اقوردا سايتى.

ۇلىبريتانيا پاتشايىمى ءىى ەليزاۆەتا ءوزىنىڭ حاتىندا قاسىم-جومارت توقاەۆتى شىن جۇرەكتەن قازاقستان پرەزيدەنتى لاۋازىمىنا سايلانۋىمەن قۇتتىقتادى. "سىزگە جانە قازاقستان حالقىنا بار جاقسىلىقتى تىلەيمىن، سونداي-اق، ەلدەرىمىز اراسىنداعى جاقسى قارىم-قاتىناستاردى جالعاستىرۋدى تاعاتسىزدانا كۇتەمىن", – دەلىنگەن جەدەلحاتتا. كۋۆەيت مەملەكەتىنىڭ ءامىرى ساباح ءال-احماد ءال-دجابەر ءال ساباح قاسىم-جومارت توقاەۆتى پرەزيدەنت سايلاۋىنداعى جەڭىسىمەن قۇتتىقتاپ، ەكىجاقتى ىقپالداستىقتى ودان ءارى نىعايتۋعا دايىن ەكەنىن ءبىلدىردى. "دوستاس ەلدەرىمىز اراسىنداعى ىنتىماقتاستىقتى جوعارى باعالايتىنىمىزدى جانە ونى مەملەكەتتەرىمىزدىڭ مۇددەسى ءۇشىن دامىتۋعا نيەتتى ەكەنىمىزدى ايتقىم كەلەدى", – دەپ جازعان كۋۆەيت ءامىرى. الجير پرەزيدەنتىنىڭ مىندەتىن اتقارۋشى ابدەل كادەر بەن ساليح تا قاسىم-جومارت توقاەۆقا قۇتتىقتاۋ حاتىن جولداعان. "ەكى ەل اراسىندا جاقسى تاريحي بايلانىستار، ءوزارا قارىم-قاتىناستار ورناعان. ەلدەرىمىزدىڭ يگىلىگى ءۇشىن سىزبەن جۇمىس ىستەۋگە جانە ەكىجاقتى فورماتتاعى جانە حالىقارالىق ۇيىمدار اياسىنداعى ىقپالداستىقتى نىعايتۋعا دايىن ەكەنىمدى بىلدىرەمىن", – دەلىنگەن جەدەلحاتتا. يامايكانىڭ پرەمەر-ءمينيسترى ەندريۋ حولنەسس ءوز قۇتتىقتاۋىندا مەملەكەت باسشىسىنىڭ ساياسي تاجىريبەسى باي ەكەنىن اتاپ ءوتىپ، قازاقستاننىڭ ءوسىپ-وركەندەي بەرۋىنە تىلەكتەستىك ءبىلدىردى. "يامايكا مەن قازاقستان 24 جىل بۇرىن ديپلوماتيالىق بايلانىس ورناتقان ساتتەن بەرى جاقسى قارىم-قاتىناستارىن جالعاستىرىپ كەلەدى. الداعى ۋاقىتتا وسى بايلانىستارىمىزدى تەرەڭدەتە وتىرىپ، ءوزارا مۇددەلەرىمىزدى بىلدىرەتىن ماسەلەلەر جونىندەگى ىنتىماقتاستىقتى كەڭەيتۋگە ۇمىتتەنەمىن", – دەپ اتاپ وتكەن ەندريۋ حولنەسس. مونعوليانىڭ ەكس-پرەزيدەنتى نامبارىن ەنحبايار قۇتتىقتاۋ حاتىندا قازاقستاننىڭ ودان ءارى دامي بەرەتىنىنە جانە قاسىم-جومارت توقاەۆتىڭ باسشىلىعىمەن حالىقتىڭ ءال-اۋقاتى جاقسارا تۇسەتىنىنە سەنىم ءبىلدىردى. "مونعوليا مەن قازاقستان اراسىنداعى ورتاق تاريح پەن حالىقتارىمىزدىڭ جاقىندىعىنا نەگىزدەلگەن ارىپتەستىك قاتىناستار جاڭا دەڭگەيگە كوتەرىلەدى دەپ سانايمىن", – دەلىنگەن جەدەلحاتتا. م.ۆ. لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ رەكتورى ۆيكتور سادوۆنيچي قاسىم-جومارت توقاەۆتىڭ رەسەيمەن ستراتەگيالىق جانە دوستىق قاتىناستاردى دامىتۋعا بەيىلدىگىن ۋنيۆەرسيتەت ۇجىمى جوعارى باعالايتىنىن اتاپ ءوتىپ، وقۋ ورنىنىڭ جۇمىسىنا كوڭىل بولگەنى ءۇشىن مەملەكەت باسشىسىنا العىس ايتتى. شۆەيتسارياداعى ماسكەۋ مەملەكەتتىك حالىقارالىق قاتىناستار ينستيتۋتىنىڭ تۇلەكتەرى اسسوتسياتسياسىنىڭ توراعاسى يۋري نازاركين بىرلەستىك اتىنان مەملەكەت باسشىسىن قۇتتىقتادى. "قازاقستاننىڭ يگىلىگى ءۇشىن بارلىق اۋقىمدى مەملەكەتتىك مىندەتتەردى تابىستى شەشۋىڭىزگە تىلەكتەسپىز. ءسىزدىڭ حالىقارالىق دەڭگەيدەگى مول تاجىريبەڭىز جاھاندىق ارەناداعى ەلىڭىزدىڭ ورنىن ودان ءارى نىعايتۋعا سەپتىگىن تيگىزەتىنىنە سەنىمدىمىز", – دەپ جازىلعان جەدەلحاتتا. سونداي-اق، قاسىم-جومارت توقاەۆتىڭ اتىنا كۋۆەيتتىڭ پرەمەر-ءمينيسترى دجابەر ءال-مۋباراك ءال-حاماد ءال ساباح، كۋۆەيت مەملەكەتى ءامىرىنىڭ تاق مۇراگەرى ناۋاف ءال-احماد ءال-دجابەر ءال ساباح، توكيو گۋبەرناتورى يۋريكو كويكە، بۇكىل دۇنيەجۇزىلىك كەدەن وداعىنىڭ باس حاتشىسى كۋنيو ميكۋريا، بۇۇ چادتاعى رەزيدەنت-ۇيلەستىرۋشىسى ستيۆەن تۋلل، گەرمانيا ەكونوميكاسى شىعىس كوميتەتىنىڭ توراعاسى ۆولفگانگ بيۋحەلە، پورتۋگاليا-قازاقستان ساۋدا پالاتاسىنىڭ توراعاسى نۋنو ميگەل افونسو لوپەس، شۆەيتساريا فەدەرالدى جينالىسىنىڭ "شۆەيتساريا-قازاقستان" دوستىق توبىنىڭ تەڭ توراعاسى فيليپپو لومباردي، "Total" كومپانياسىنىڭ باسقارما توراعاسى پاتريك پۋياننە، INPEX CORPORATION پرەزيدەنتى تاكايۋكي ۋەدا، ەۋرازيالىق بانكتىڭ باسقارما توراعاسى اندرەي بەليانينوۆ، "تەنگيزشەۆرويلدىڭ" باس ديرەكتورى يمەر بوننەر، پەكين لينگۆيستيكالىق ۋنيۆەرسيتەتىنىڭ ۇجىمى قۇتتىقتاۋلارىن جولدادى.

سوڭعى جاڭالىقتار