27 ماۋسىم 2019, 14:36 918 0 قاۋىپسىزدىك دينارا مىڭجاسارقىزى

ارىستا بولعان اپات

«اپات ايتىپ كەلمەيدى». 24 ماۋسىمدا تۇركىستان وبلىسى، ارىس قالاسىندا اسكەري بولىمشە قويماسىندا بولعان جارىلىس جەرگىلىكتى تۇرعىنداردى سانسىراتتى. اپات ورىن العان كۇنى قانشاما بالا اتا-اناسىنان كوز جازىپ قالسا، كوپشىلىگى قاۋىپسىز ايماقتارعا ۋاقىتشا كوشىرىلدى.

ارىس قالاسىنا مەملەكەت باس­­شىسى قاسىم-جومارت توقاەۆتىڭ شۇ­عىل ۇشىپ كەلۋى جەرگىلىكتى تۇرعىندار ءۇشىن ۇلكەن دەمەۋ بولدى. توتەنشە جاعداي بولعان ايماقتان كوشىرىلگەن تۇرعىنداردى ور­نالاس­تىرۋ بويىنشا اتقارىلىپ جاتقان جۇمىستاردىڭ بارىسىمەن تانىسقان پرەزيدەنت قاۋىپسىز جەرلەرگە كو­شىرىل­گەن ارىس قالاسىنىڭ تۇرعىندارىن ىستىق تاماقپەن، مەديتسينالىق جاردەممەن قامتاماسىز ەتىپ، باس­قا دا بارلىق قاجەتتى كومەك كورسەتۋدى تاپسىردى. ءتىپتى، ازاماتتاردىڭ قاۋىپسىزدىگى مەن ولاردىڭ دۇنيە-ءمۇ­لىكتەرىنىڭ ساقتالۋىن جانە بالالارعا ەرەكشە كوڭىل ءبولۋ كەرەكتىگىن ەسكەرتتى دە. جارىلىستىڭ سەبەبىن انىقتاۋدى تاپسىرعان پرەزيدەنت مەملەكەت تاراپىنان جان-جاقتى كومەكتىڭ دەر كەزىندە كورسەتىلەتىنىن جەتكىزدى. ول ءوزىنىڭ Twitter پاراقشاسىندا: «قورعانىس، ىشكى ىستەر مينيسترلەرىنە جانە تۇركىستان وبلىسىنىڭ اكىمىنە ارىس اسكەري بولىمىندەگى وق-ءدارى قويماسىندا بولعان جا­رىلىستىڭ زارداپتارىن جويۋ جونىندە شۇعىل شارالار قابىلداۋدى تاپسىردىم. تۇرعىنداردىڭ قاۋىپ­سىزد­ىگىن قامتاماسىز ەتىپ، جارىلىستىڭ سەبەپتەرىن انىقتاۋ قاجەت»، – دەپ جازدى.

وقيعا بولعان كۇنى جەتكەن تۇركىستان وبلىسىنىڭ اكىمى ومىرزاق شوكەەۆتىڭ تاپسىرماسىمەن اۋدان، قالالاردا تۇرعىنداردى قابىلدايتىن ارنايى ورىندار ازىرلەندى. تۇركىستان وبلىسى پوليتسيا دەپارتامەنتىنىڭ 448 قىزمەتكەرى مەن 75 ارنايى اۆتوكولىگى جۇمىلدىرىلدى. ۇلتتىق گۆارديانىڭ №6506 اسكەري ءبولىمىنىڭ 580 اسكەري قىزمەتشىسى جانە 36 ارنايى اۆتوكولىگى، ونىڭ ىشىندە تۇرعىنداردى ەۆاكۋاتسيالاۋعا قاجەتتى جوعارى وتىمدىلىكتى 10 «ۋرال» اۆتوكولىگى، اسكەري پوليتسيانىڭ 10 قىزمەتكەرى، №0358 اسكەري ءبولىمىنىڭ 200 اسكەري قىزمەتشىسى (بارلىعى 1238 قىزمەتكەر) بار. سونداي-اق، قر قورعانىس مينيسترلىگىنە قاراستى بولىمشەلەردىڭ 1800 اسكەري قىزمەتشىسى مەن 50 ارنايى تەحنيكاسى تارتىلدى. 25 ماۋسىمدا پوليتسيا دەپارتامەنتى قورعانىس مينيسترلىگىنىڭ بولىمشەلەرىمەن بىرلەسە وتىرىپ، ارىس قالاسىنىڭ اۋماعىن جارىلعىشتاردان تازارتۋ بويىنشا ءىس-شارالار وتكىزدى. ناتيجەسىندە 130-عا جۋىق سنارياد تابىلدى.

سونداي-اق، مەملەكەت باسشىسى: «وسى تارتىپپەن جۇمىستى جالعاستىرىڭىزدار. ۇكىمەتكە قالاعا جانە ونىڭ تۇرعىندارىنا كومەكتەسۋ تۋرالى تاپسىرما بەرىلدى. قازىر ءبىز ەڭ ءبىرىنشى كەزەكتە ادامداردىڭ، قالا تۇرعىندارىنىڭ قاۋىپسىزدىگىن قامتاماسىز ەتۋىمىز كەرەك. ەكىنشى – كورسەتىلەتىن كومەكتەر.

ارنايى قور قۇرىلدى. ارىسقا بۇكىل قازاقستان كومەكتەسەدى. مەن حالىقپەن جۇمىس ىستەپ جاتقان قالانىڭ جۇرتشىلىعىنا، ارداگەرلەرگە ريزاشىلىعىمدى بىلدىرەمىن. جارىلىستىڭ سەبەپتەرىن انىقتاۋ قاجەت. قىلمىستىق ءىس قوزعالدى، تەرگەۋ-تەكسەرۋ باستالدى. ەگەر كىنالىلەر بولسا، ولار زاڭمەن قاتاڭ جازالانادى. الداعى ۋاقىتتا ارىس جارىلعىش قۇرىلعىلاردىڭ بارلىعىنان تازارتىلۋى ءتيىس»، – دەدى.

قازىر ارىس قالاسىنداعى جاعداي تۇراقتى. بۇگىندە قالانى تازارتۋ جۇمىستارى جۇرگىزىلىپ جاتىر. توتەنشە جاعدايدان زارداپ شەككەن حالىقتىڭ دا جاعدايى قالىپتى. ارىس قالاسىندا ورىن العان توتەنشە جاعدايعا بايلانىستى زارداپ شەككەن ازاماتتارمەن جۇمىس جۇرگىزۋ جانە قولداۋ كورسەتۋ ماقساتىندا قۇرىلعان ارنايى جەدەل شتاب قازىرگى تاڭدا تولىققاندى جۇمىس جۇرگىزۋدە. ەۆاكۋاتسيالىق پۋنكتتەردە 24 مىڭنان استام ادام تىركەلدى. ونىڭ ىشىندە شىمكەنت قالاسىندا 20 مىڭ، تۇركىستان وبلىسىنىڭ اۋداندارىندا 4 مىڭنان استام ادام ءتيىستى كومەك الۋدا.

ارىس قالاسىنداعى توتەنشە جاعدايعا بايلانىستى تۇركىستان وبلىسى مەن شىمكەنت قالاسىندا 70-كە جۋىق قونىستانۋ ورتالىقتارى جۇمىس ىستەۋدە. حالىق ورنالاسقان ورتا مەكتەپ، كوللەدج، بالاباقشا، مەكتەپ-ينتەرناتتاردا ەۆاكۋاتسيالانعان ازاماتتارعا بارلىق قاجەتتى جاعدايلار جاسالعان.

ال كەشە قر قورعانىس ءمينيسترىنىڭ ورىنباسارى، گەنەرال-مايور باقىت قۇرمانباەۆتىڭ قاتىسۋىمەن وتكەن بريفينگتە قالا اۋماعى بويىنشا قورشاۋ جۇمىستارى ۇيىمداستىرىلىپ، ونىڭ ىشىندە 125 ساپەر قالا كوشەلەرىندە، تەمىرجول بويىندا جانە اسكەري بولىمگە ىرگەلەس اۋماقتا تازالاۋ جۇرگىزگەنى بەلگىلى بولدى. «اۋادا ۇشقىشسىز ءۇش اپپارات ۇشىرىلىپ، ءورت وشاقتارىن باقىلاۋدا. بۇگىنگى كۇنى 3 وت ورنى انىقتالدى. دەسەك تە ءىرى جارىلىس ورىن المادى. دەگەنمەن، تۇراقتى قاۋىپتى جاعداي ساقتالۋدا. ارىس قالاسىنىڭ 16 كوشەسىنەن جارىلماعان 70-تەن استام سنارياد تابىلعان. جارىلماعان سناريادتاردىڭ تۇرعىن ۇيلەرگە ءتۇسۋى مينا جويۋ جۇمىسىن كۇردەلەندىرە تۇسۋدە. مۇنداي ءۇي-جايلارعا ساپەرلەردى جىبەرۋ پروكۋراتۋرا، پوليتسيا جانە جەرگىلىكتى اتقارۋشى بيلىك ورگاندارى قىزمەتكەرلەرىنىڭ ىلەسىپ جۇرۋىمەن جۇزەگە اسىرىلادى»، – دەدى قر قورعانىس ءمينيسترىنىڭ ورىنباسارى باقىت قۇرمانباەۆ.

ايتا كەتۋ كەرەك، وسى قايعىلى اپاتقا بايلانىستى «تۇركىستان» كورپوراتيۆتىك الەۋمەتتىك دامۋ قورى جانىنان اشىلعان ارنايى ەسەپ-شوتقا ءۇش كۇننەن بەرى رەسپۋبليكانىڭ تۇكپىر-تۇكپىرىنەن وتانشىل جانە جومارت جۇرەكتى ازاماتتار قارجى اۋدارۋدا. 26 ماۋسىمداعى مالىمەت بويىنشا قورعا تۇسكەن قارجى كولەمى 225 ملن تەڭگەگە جەتكەن.

P.S.

قازاق «كوپ تۇكىرسە – كول» دەيدى. قازىر بۇل وڭىردەگى وقيعاعا سەلت ەتپەگەن ادام كەمدە-كەم. ءار ادام قال-قادىرىنشە كومەك بەرۋگە دايار. حالىقتىڭ بىرلىگى وسىندايدا سىنالادى. قاراپايىم جۇرت تا، قالتالى ازاماتتار دا قول قۋسىرىپ قالعان جوق. ءتىپتى، ەۆاكۋاتسيا كەزىندە اتا-اناسىنان اداسىپ قالعان 200-گە جۋىق بالانىڭ وتباسىمەن قاۋىشۋىنا بار جانىن سالعان ەرىكتى بەلسەندىلەردىڭ ەڭبەگىن ەرەكشە اتاپ وتكەن ءجون. حالىقارالىق «Túrkistan» گازەتىنىڭ ۇجى­مى دا ارىستاعى اعايىنعا كومەك رەتىندە ءبىر كۇندىك جالاقىسىن اۋداردى.

 

دينارا مىڭجاسارقىزى

سوڭعى جاڭالىقتار