26 ماۋسىم, 14:33 445 0 ءبىلىم TURKYSTAN.KZ

پەداگوگيكالىق ءبىلىم بەرۋدىڭ زاماناۋي باعىتتارى

اباي اتىنداعى قازاق ۇلتتىق پەداگوگيكالىق ۋنيۆەرسيتەتى ەلىمىزدەگى مۇعالىم كادرلارىن دايارلايتىن جوعارى وقۋ ورىندارىنىڭ بازالىق ورتالىعى بولعاندىقتان، جاڭا عاسىردىڭ جاڭا پەداگوگتارىن دايارلاۋ جونىندەگى تىڭ ويلار مەن باستامالار وسى ۋنيۆەرسيتەتتەن باستاۋ الاتىنى بەكەر ەمەس. بۇل جاڭاشىلدىق وزىنەن-ءوزى كەلمەيتىنى اقيقات. ول پەداگوگ كادرلارىن جاڭاشا دايىنداۋعا باعىتتالعان تىڭ ىزدەنىستەردەن، زەردەلى زەرتتەۋلەردەن، وزات تاجىريبەلەردەن، شەتەلدىك جوعارى وقۋ ورىندارىندا ومىرگە كەلگەن يننوۆاتسيالاردى ەنگىزۋدەن تۋىندايتىن قۇندىلىقتار.

وسىعان بايلانىستى اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ رەكتورى، پروفەسسور تاكير وسپانۇلى بالىقباەۆتىڭ باستاماسىمەن وقۋ ورنىندا ەكى جىلدان بەرى زاماناۋي تالاپتارعا سايكەس كەلەتىن جاڭا مۇعالىمدەر دايارلاۋدىڭ جولدارى مەن ادىستەرىن ىزدەستىرۋگە باتىل قادامدار جاسالىپ وتىر. وتكەن مامىر ايىندا ەۋرازيالىق ەكونوميكالىق وداققا كىرەتىن رەسەي، بەلارۋسسيا، ارمەنيا، قازاقستان جانە قىرعىزستان، تمد قۇرامىنداعى باسقا دا مەملەكەتتەردىڭ پەداگوگيكالىق جوعارى وقۋ ورىندارىندا جاس پەداگوگتار دايارلاۋدىڭ جايىنا ارنالعان حالىقارالىق جيىن وتكىزىلسە، ال ەندى ماۋسىم ايىندا اباي ۋنيۆەرسيتەتىندە «پەداگوگيكالىق ءبىلىم بەرۋدىڭ قازىرگى زامان ۇدەرىستەرى» تاقىرىبىندا وتكەن حالىقارالىق فورۋمدا دا بۇل وزەكتى ماسەلە تۇبەگەيلى تالقىلاندى. كەمبريدج (ۇلىبريتانيا), ماگدەبۋرگ (گەرمانيا), وكاياما ۋنيۆەرسيتەتتەرى (جاپونيا), چجە-تسزيان پوليتەحنيكالىق ۋنيۆەرسيتەتى (قحر), شياۋلياي ۋنيۆەرسيتەتى (ليتۆا), يۋۆياسكيۋل ۋنيۆەرسيتەتى (فيليانديا), تۇركيانىڭ ۋسكۋدار، گازي، احي-ەۆران ۋنيۆەرسيتەتتەرى، م.لومونوسوۆ اتىنداعى ماسكەۋ مەملەكەتتىك ۋنيۆەرسيتەتى (رەسەي), نازارباەۆ ۋنيۆەرسيتەتى مەن كوپتەگەن حالىقارالىق ۇيىمداردىڭ وكىلدەرى قاتىسقان بۇل جيىن الماتىداعى «راحات پالاس» قوناق ءۇيىنىڭ ءماجىلىس زالىندا ءوتتى. فورۋمدى اشقان اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ رەكتورى، پروفەسسور ت.بالىقباەۆ كۇن تارتىبىنە قويىلىپ وتىرعان ماسەلەنىڭ وزەكتىلىگىنە توقتالدى.

ءححى عاسىر – جاھاندىق جاڭا تەحنولوگيالار مەن يننوۆاتسيالار عاسىرى، جاڭاشا ويلاۋ جانە الەمدە بولىپ جاتقان وزگەرىستەرگە جاڭا كوزقاراستار قالىپتاستىرۋ عاسىرى، -- دەدى ت.بالىقباەۆ. – بۇل وزگەرىستەر نەمەن بايلانىستى؟ بىرىنشىدەن، بۇل ءبىلىم بەرۋ پاراديگماسىنىڭ نەگىزى بولىپ تابىلاتىن وقىتۋدىڭ جاڭا شارتتارى مەن بەلسەندى ادىستەرىن جاساۋ; ەكىنشىدەن، جەدەل وزگەرمەلى الەمنىڭ تالاپتارىنا سايكەس سىني ويلايتىن جانە فۋنكتسيونالدىق ساۋاتتى تۇلعانى دايىنداۋعا دەگەن تالاپتاردىڭ ءوسۋى; ۇشىنشىدەن، مەكتەپتە وقىتۋ مەن ونى وقۋ ۇدەرىسىن جاڭارتۋ، پەداگوگتاردىڭ

يننوۆاتسيالارعا، ءوزىن-ءوزى دامىتۋعا، جەتىلدىرۋگە، كورپاراتيۆتىك ءوزارا ءىس-قيمىلعا دايىندىعى دەگەن ءسوز. بۇگىنگى ءبىلىم بەرۋدىڭ جۇيەسى اشىق بولۋعا ءتيىس. ونىڭ ماقساتى – وقۋ ۇدەرىسى سۋبەكتىسىنىڭ بارلىق پىكىرىن ەسكەرە وتىرىپ جۇمىس ىستەۋ. ءبىز ۇلتتىق پەداگوگيكالىق ءبىلىم بەرۋ جۇيەسىنىڭ باسىندا وتىرعاندىقتان ءبىلىم ساياساتىن دامىتۋعا، وتاندىق ءبىلىم جۇيەسىن العا جىلجىتۋعا باعىتتالعان وقىتۋدىڭ جوعارى ساپالى تەحنولوگياسى مەن جاڭا ادىستەمەلەرىن ەنگىزۋگە ۇمتىلۋدامىز. ءبىزدىڭ بۇگىنگى ترەند – بۇل تسيفرلىق رەۆوليۋتسياعا قول جەتكىزۋ دەگەن ءسوز. بولاشاق پەداگوگتار جاڭا تسيفرلىق قۇزىرەتتىلىككە كرەاتيۆتىك ەلەمەنتتەرگە، كوممۋنيكاتيۆتىلىككە ءزارۋ. سوندىقتان بۇگىنگى پەداگوگتان جالپى ورتا ءبىلىم بەرۋدىڭ جاڭارتىلعان ستاندارتتارىن، مازمۇنىن، مەتودولوگياسىن قابىلداۋ، وقۋ ۇدەرىسىن باعدارلامالىق جانە ادىستەمەلىك قامتاماسىز ەتۋ تالاپ ەتىلەدى.

جاپونيانىڭ وكاياما ۋنيۆەرسيتەتىنىڭ پروفەسسورى حيروكي فۋدجي، تۇركيانىڭ ۋسكۋدار ۋنيۆەرسيتەتىنىڭ پروفەسسورى نۋرپەر ۋلكۋ، فينليانديانىڭ يۋۆياسكيۋليا ۋنيۆەرسيتەتتەر توبىنىڭ جەتەكشى ساراپشىسى يااككو سكانتسي، گەرمانياداعى ماگدەبۋرگ ۋنيۆەرسيتەتىنىڭ كەڭەسشىسى كارلوس ماچادو، ليتۆاداعى شياۋلياي ۋنيۆەرسيتەتىنىڭ پروفەسسورى ستەفانيا اليشاۋسكيەنە، نازارباەۆ ۋنيۆەرسيتەتىنىڭ پروفەسسرى ەلاين شارپلين، اقش-تاعى KS Global Partners كومپانياسىنىڭ ديرەكتورى دجون كيم جانە باسقالار جاڭا زاماننىڭ جاڭا پەداگوگتارىن دايارلاۋ تۋرالى ءوز تاجىريبەلەرى مەن ۇستانىمدارىن ورتاعا سالدى.

فورۋمنىڭ كەلەسى كۇنىندە وتكەن ءار الۋان شەبەرلىك سىنىپتارىندا، پىكىر الماسۋلاردا، دوڭگەلەك ۇستەلدەردە جاڭا پەداگوگ دايارلاۋدىڭ باسقا دا تىڭ تاسىلدەرى مەن ادىستەرى تۋرالى پىكىر الماسىلدى.

 

سوڭعى جاڭالىقتار