25 ماۋسىم, 15:15 391 0 بىلگەنگە مارجان "تۇركىستان" گازەتىنىڭ اۆتورلارى

سەمەي قالاسىنداعى اسپالى كوپىر

تامسانساڭ، سەمەيدەگى اسپالى كوپىرگە تامسان. مۇنداي كوپىر تمد-دا دا جوق. الەم ەلدەرىنىڭ وزىندە ساۋساقپەن سانارلىق قانا. سەمەيدىڭ كوركىنە كورىك قوسىپ، ساۋلەتىن ارتتىرعان بۇل اسپالى كوپىر - تاۋەلسىزدىكتىڭ ءتول تۋىندىسى.

بۇل كوپىر ەرتىستىڭ ارعى جاعى مەن بەرگى جاعىن عانا ەمەس، ازيا مەن ەۋروپانى، قىر مەن ءسىبىردى جالعاستىرىپ جاتىر. سەمەي قالاسىنداعى اسپالى كوپىر 2000 جىلى 17 قازاندا سالىنعان.

ەرتىس وزەنى ارقىلى وتەتىن  كوپىر قۇرىلىسىنىڭ جوباسىن ۇسىنعان جاپوندىق يساكاۆادزيما حاريما حەۆي ينداستريز كومپانياسى 1998 جىلى ۇكىمەت جاڭا كوپىر قۇرىلىسىن باستاۋعا شەشىم شىعاردى.  قۇرىلىسىمەن، نەگىزىنەن، جاپوندىق «اياچاي» فيرماسى اينالىستى. جاپونيادا جاسالعان كوپىر قاڭقالارى الدىمەن سۋ جولىمەن، سوسىن تەمىرجولمەن سەمەي قالاسىنا تاسىمالدانعان. جالپى، ەكى ەل اراسىنداعى كەلىسىمگە قاراي، جاپونيا مەملەكەتى كوپىر قۇرىلىسىنا 165 ملن دوللار بولگەن. بۇل قارجىنى 2,7 پايىزبەن 30 جىلدا قايتارۋ ماسەلەسى دە الدىن-الا پىسىقتالعان.

ال تۇركيانىڭ «السيمالاركو» فيرماسى كوپىرگە كەلىپ تىرەلەتىن ۇزىندىعى 16 شاقىرىم جول قۇرىلىسىن جۇرگىزۋمەن شۇعىلداندى. وسى ارادا ايتا كەتۋ كەرەك، كوپىردىڭ ۇستىنە تابيعي اسفالت توسەلگەن. بۇل اسفالت، بىلەتىندەردىڭ ايتۋىنشا، كاريب باسسەينىندەگى ترينيناد كولىنەن ارنايى تاسىپ جەتكىزىلگەن كورىنەدى. سونىمەن قاتار كوپىر قۇرىلىسى جۇمىستارىنا ءوز ەلىمىزدەن 30-عا جۋىق فيرمالار قاتىسسا، جۇمىسشىلاردىڭ 90 پايىزىن جەرگىلىكتى ازاماتتار قۇراپتى. كوپىر قۇرىلىسى بەلگىلەنگەن مەرزىمنەن بۇرىن اياقتالىپ، 2000 جىلدىڭ قازان ايىندا حالىققا پايدالانۋعا بەرىلدى.

                        جاراس نۇربولۇلى

 

سوڭعى جاڭالىقتار