24 ماۋسىم, 16:52 422 0 قاۋىپسىزدىك دينارا مىڭجاسارقىزى

ارىس قالاسىنان تۇرعىندار كوشىرىلىپ جاتىر

ارىستاعى اسكەري قويماداعى جارىلىستان سوڭ قالا تۇرعىندارى كوشىرىلىپ جاتىر. قازاقستاندىق باسىلىمداردىڭ حابارلاۋىنشا، العاشقى قىرىق اۆتوبۋس تۇرعىنداردى ەۆاكۋاتسيالاۋ ءۇشىن جولعا شىعىپ كەتكەن. "ازاماتتار قاۋىپسىز جەر رەتىندە اشىلعان 15 پۋنكتىگە جەتكىزىلەدى" دەپ جازادى باسىلىمدار.

تۇركىستان قالاسى اكىمدىگى زارداپ شەككەندەر تۋرالى اقپارات انىقتالىپ جاتقانىن حابارلادى. قازاقستان قورعانىس مينيسترلىگى "قازا تاپقاندار مەن جارالانعاندار جوق" دەپ مالىمدەدى. ۆەدومستۆو اپات سەبەپتەرى انىقتالىپ جاتقانىن ايتادى.

تۇركىستان وبلىسىنىڭ اكىمى باسشىلىق ەتەتىن جۇمىس توبى قۇرىلعان. تەلەفون ارقىلى ازاماتتارعا ارنالعان ارنايى جەلى جۇمىس ىستەيدى.

قازاقستان پرەزيدەنتى قاسىم-جومارت توقاەۆ ءوزىنىڭ Twitter پاراقشاسىنا "قورعانىس، ىشكى ىستەر مينيسترلەرىنە جانە تۇركىستان وبلىسىنىڭ اكىمىنە ارىس قالاسىنداعى اسكەري بولىمىندەگى وق-ءدارى قويماسىندا بولعان جارىلىستىڭ زارداپتارىن جويۋ جونىندە شۇعىل شارالار قابىلداۋدى تاپسىردىم. تۇرعىنداردىڭ قاۋىپسىزدىگىن قامتاماسىز ەتىپ، جارىلىستىڭ سەبەپتەرىن انىقتاۋ قاجەت" دەپ جازدى.

جارىلىس بولعانى تۋرالى حابار تاڭعى 9.20-دا تۇسكەن. بيلىك جارىلىستان سوڭ اسكەري بولىمشە اۋماعى ورتەنىپ جاتقانىن، ونداعان ءورت ءسوندىرۋشى مەن تەحنيكا جۇمىلدىرىلعانىن حابارلاعان.

الەۋمەتتىك جەلى قولدانۋشىلارى ارىستاعى ۇيلەردىڭ تەرەزى شاعىلعانىن جازادى. پاۆەل الەكساندروۆ دەگەن اتپەن بەلگىلى ەكولوگيالىق بەلسەندى اسكەري بولىمشەدەگى جارىلىستىڭ اۋەدەگى كورىنىسىن جاريالادى.

ارىستا بۇعان دەيىن بىرنەشە رەت جارىلىس بولعان.

ون جىل بۇرىن، 2009 جىلى ناۋرىزدا ارىستاعى قويمادا جارىلعىش زاتتار جارىلىپ، ساقتاۋلى تۇرعان قارۋ-جاراق اتىلعان. وقيعا كەزىندە ءتورت ادام قازا تاۋىپ، جيىرماعا تارتا ادام جاپا شەككەن ەدى. رەسمي بيلىك جارىلىسقا قويماداعى قارۋدىڭ دۇرىس ساقتالماۋى مەن جارىلعىش زاتپەن دۇرىس جۇمىس ىستەمەۋ سەبەپ بولدى دەپ مالىمدەگەن.

2014 جىلى ارىس قالاسىنداعى "قازاقجارىلىسونەركاسىبى" اكتسيونەرلىك قوعامى اۋماعىندا جارىلىس بولىپ، ەكى ادام قازا تاپقان.

2015 جىلى قاراشادا قالاداعى پوليگون اۋماعىندا جارىلىس بولىپ، ءبىر ادام مەرت بولدى. رەسمي اقپارات بويىنشا، جارىلىس اسكەري وق-دارىلەر مەن ءوندىرىس قالدىقتارىن جويۋ كەزىندە بولعان.

43 مىڭعا جۋىق ادام تۇراتىن ارىس قالاسى شىمكەنتتەن 150 شاقىرىم جەردە جاتىر.

سوڭعى جاڭالىقتار