24 ماۋسىم 2019, 15:55 652 0 دەنساۋلىق دينارا مىڭجاسارقىزى

 بۋللەزدى ەپيدەرموليز بويىنشا شەبەرلىك سىنىپ ءوتتى

  18 ماۋسىم كۇنى پەدياتريا جانە بالالار حيرۋرگياسى عىلىمي ورتالىعىندا «قر بۋللەزدى ەپيدەرموليزگە شالدىققان ناۋقاس بالالاردى ەمدەۋ مەن دياگنوستيكالاۋدىڭ جانە  مەديتسينالىق كومەك بەرۋدىڭ زاماناۋي اسپەكتىلەرى» تاقىرىبىندا سەمينار شەبەرلىك سىنىبى ءوتتى.

پەدياتريا ورتالىعى مەن  «كوبەلەك بالالار» قايىرىمدىلىق قورىنىڭ ۇيىمداستىرۋىمەن وتكەن سەمينارعا ەلىمىزدىڭ بارلىق وبلىسىنان 60-تان استام دەرماتولوگ،  دەرماۆەنەرولوگ، كارديورەۆموتولوگ، پەدياتر جانە ت.ب. ماماندار، سونىمەن قاتار دەرماتولوگيا جانە جۇقپالى اۋرۋلار عىلىمي ورتالىعىنىڭ دارىگەرلەرى قاتىستى.

    شەبەرلىك سىنىپتى وتكىزۋگە  رەسەيلىك Mölnlycke Health Care كومپانياسىنىڭ قولداۋىمەن وسى دەرتتى ەمدەۋدە جاقسى ماشىقتانعان حالىقارالىق گەنەتيكالىق دەرماتوزدار قاۋىمداستىعىنىڭ (ماسكەۋ ق.) دارىگەرلەرى ارنايى شاقىرىلدى.

رەسەيلىك ماماندار وقىتۋ سەمينارىندا بۋللەزدى ەپيدەرموليزگە شالدىققان بالالاردى ەمدەۋ مەن دياگنوستيكالاۋ، مەديتسينالىق جوعارى دەڭگەيدە كومەك كورسەتۋ، زاماناۋي تاڭعىشتاردى پايدالانۋدىڭ قىر-سىرى، جاڭا تۋعان نارەستەلەر مەن بالالاردىڭ نەوناتالدىق جانە پەدياتريالىق اسپەكتىلەرى جانە ت.ب. تاقىرىپتار بويىنشا ءدارىس وقىپ، رەسەيدىڭ كەشەندى ەمدەۋ تاجىريبەسىمەن ءبولىستى. سەمينار اياسىندا  «كوبەلەك اۋرۋىنا» شالدىققان بالالاردى قاراپ، شەبەرلىك سىنىپقا قاتىسۋشىلار مەن اتا-انالاردىڭ مازالاعان سۇراقتارىنا جاۋاپ بەردى.

سەميناردىڭ ماقساتى – وسى ناۋقاستارداعى كلينيكالىق ءبىلىنۋ، سوماتيكالىق اسقىنۋلاردىڭ دياگنوستيكاسى، ەمدەۋ جانە ولاردى كۇتۋ ماسەلەسى بويىنشا بىلىمدەرىن كوتەرۋ، دارىگەرلەردىڭ بىلىكتىلىكتەرىن ارتتىرۋ، تاجىريبە الماسۋ، مەديتسينالىق كومەك كورسەتۋ ساپاسىن ارتتىرۋ.

قازاقستاندا ءتۋابىتتى بۋللەزدى ەپيدەرموليزبەن اۋىراتىن 56 بالا تىركەلگەن. ونىڭ 50%-ىن 5-15 جاسقا دەيىنگى بالالار قۇرايدى.

بۋللەزدى ەپيدەرموليز — سيرەك كەزدەسەتىن گەنەتيكالىق تەرى اۋرۋى. اتى جامان دەرتتى حالىق اراسىندا «كوبەلەك اۋرۋى» دەپ اتايدى. اۋرۋ اتىنا سايكەس، ناۋقاستىڭ تەرىسى كوبەلەك قاناتى ىسپەتتى ۇلبىرەپ ءارى كۇلدىرەپ تۇرادى. اتالعان اۋرۋ جۇقپايدى، ول تۇقىم قۋالاۋ ارقىلى بەرىلەدى.

سوڭعى جاڭالىقتار