20 ماۋسىم 2019, 17:58 890 0 تۋريزم ءنازيا جويامەرگەنقىزى

قىز بالالارعا ارنالعان Makecamp

Group of kids walk one after another over big log in the forest during nature orientation summer school trip game
Group of kids walk one after another over big log in the forest during nature orientation summer school trip game

قوعام ومىرىنە قىز بالالاردى بەيىمدەۋ، ولاردى بەلسەندى بولۋعا باۋلۋ، بويلارىنداعى قابىلەتتى اشۋ – مەملەكەت كەلەشەگى ءۇشىن ماڭىزدى ماسەلە. مامىردىڭ 27-ءسى مەن ماۋسىمنىڭ 7-ءسى اراسىندا American Corner & Makerspace Astana شىعارماشىلىق ورتالىعىندا “شەۆرون” كومپانياسىنىڭ دەمەۋ­شى­لىگىمەن 13-16 جاستاعى قىزدارعا ارنالعان العاشقى جازدىق تەحنيكالىق لاگەر ۇيىمداستىرىلدى.

Makercamp-ءتىڭ  باستى ماقساتى – قىزداردى عىلىمعا، كومپيۋتەرلىك باعدارلامالاۋعا قارقىندى ءىس-تاجىريبەگە تولى ساباقتار ارقىلى قىزىقتىرىپ، تەحنولوگيا سالاسىنا ءوز يدەيالارىمەن ۇلەس قوسۋعا ىنتالاندىرۋ. لاگەر باعدارلاماسى بويىنشا، قىزدار 2 اپتانىڭ ىشىندە 3D-مودەلدەۋ، Arduino نەگىزىندە باعدارلامالاۋ جانە پروتوتيپ شىعارۋ نەگىزدەرىن ۇيرەنىپ شىقتى.

وقىتۋ بارىسىندا ارنايى شاقىرىلعان ماماندارمەن شىعارماشىلىق كەزدەسۋلەر ءوتتى. ول كەزدەسۋلەردە جوبالارمەن جۇمىس جاساۋ، جۇمىس كەزىندەگى شىعارماشىلىقتىڭ، تاپقىرلىقتىڭ جانە دە  قارىم-قاتىناس قۇرۋ ونەرىنىڭ ماڭىزى سياقتى تاقىرىپتار تالقىلانىپ، قىزداردىڭ بولاشاعىنا قاجەتتى ساباقتار بەرىلدى.  وعان قوسا، قىزدار ناعىز ءوندىرىس پروتسەسىن ءوز كوزىمەن كورۋگە،  ماماندارمەن سۇحباتتاسۋ مۇمكىنشىلىگىنە يە بولدى.

لاگەر قورىتىندىسى رەتىندە قاتىسۋشى قىزدار بۇۇ الدىنا قويعان ماقساتتار مەن ماسەلەلەرگە  (اشتىق ماسەلەسى، سۋ ساپاسى ت.ب ) تەحنولوگيالىق شەشىم ۇسىنۋ كەرەك بولدى.

قىزدارعا ارنالعان Makercamp-ءتىڭ نەگىزگى ماقساتى ءوز يدەيالارىن تەحنولوگيا مەن عىلىم ارقىلى جۇزەگە اسىرۋعا شابىتتاندىرۋ  جانە ەڭ باستىسى – ىنتالاندىرۋ.

Makercamp-ءتىڭ  العاشقى كومانداسىنا قاراعاندى، اقتاۋ، الماتى جانە نۇر-سۇلتان قالالارىنان  كەلگەن 16 قىز بالا مۇشە بولدى. قاتىسۋشىلار اراسىنداعى دوستىقتى نىعايتۋدىڭ ەرەكشە ءبىر ءساتى – استانامەن تانىسۋ.

«ءبىز «PetSavers» توبىمىز! ءبىزدىڭ جوبامىز اۆتوماتتى استاۋ تۋرالى. لاگەر كەزىندە بىزگە كەز كەلگەن الەۋمەتتىك ماسەلەنى شەشۋ مىندەتى قويىلدى. ءبىز ءتۇرلى تاقىرىپتارمەن شابىتتانىپ، جانۋارلارعا قامقورلىق كورسەتۋ يدەياسىن تاڭدادىق، – دەپ نۇر-سۇلتان قالاسىنىڭ وقۋشىلارى، سالكەن لەيلا مەن ءجۇسىپوۆا باعيلا وزدەرىنىڭ يدەياسى جايلى ءبولىستى.

ن.بيسەنوۆا

 

سوڭعى جاڭالىقتار