20 ماۋسىم, 13:45 428 0 جاھان اسەل انۋاربەك

مەكسيكاداعى ميگرانتتارمەن كۇرەس

الەمدە بوسقىندارمەن كۇرەس ماسەلەسى ءالى دە وزەكتى بولىپ تۇر. كۇنى كەشە مەكسيكا بيلىگى ەل اۋماعىنا زاڭسىز كىرگەن 76 كۋبالىق ميگرانتتى وتانىنا قايتاردى.

اپتا باسىندا مەكسيكانىڭ قۇقىق قورعاۋ ورگاندارى زاڭسىز ميگرانتتار مىنگەن 4 جۇك كولىگىن ۇستاپ، سونىڭ ءناتي­­جەسىندە 800 ميگرانتتى قولعا ءتۇسىردى. ءاربىر جۇك كولىگىنە 200 ادامنان مىنگەن كورىنەدى. ولاردىڭ اراسىندا ايەلدەر مەن بالالار دا بار. وقيعانىڭ جاي-جاپسارىن انىقتاۋ ءۇشىن كولىك جۇرگىزۋشىلەرى فەدەرالدى پروكۋراتۋراعا جەتكىزىلدى. جاريالانعان مالىمەتتەرگە سۇيەنسەك، ورتالىق امەريكادان شىققان ميگرانتتار ساپارعا ۆيلياەرموس قالاسىنان ات­تا­نىپتى. ءجۇر­گىزۋشىلەردىڭ قولىندا كولىككە كوكونىس تيەلگەندىگىن راستايتىن جالعان قۇجات بولعانى انىقتالدى. ال ميگرانتتار ولارعا ەلدىڭ سولتۇستىگىنە جەتۋ ءۇشىن 3,5 مىڭ دوللار تولەگەن.

سونداي-اق، مەكسيكا بيلىگى  گوندۋراستان كەلگەن 105 ميگرانتتى ەلىنە كەرى قايتاردى. ولاردىڭ 63-ءى كامەلەتتىك جاسقا تولماعاندار. بوسقىندار ەلدىڭ ۆەراكرۋس شتاتىنان ۇشاققا وتىرعىزىلعان. بۇعان دەيىن ايماقتان 300-گە جۋىق گوندۋراس ازاماتى دەپورتاتسيالانعان ەدى. ەسكە سالا كەتەيىك، مامىردىڭ سوڭىندا اقش پرەزيدەنتى دونالد ترامپ «مەكسيكا زاڭسىز ميگرانتتارمەن كۇرەسپەي وتىر» دەپ، بۇل ەلدەن كەلەتىن تاۋارلارعا 5 پايىز باج سالىعىن ەنگىزەتىنىن جاريالاعان. سودان بەرى مەكسيكا بيلىگى ماسەلەنى شەشۋ ءۇشىن شۇعىل شارالار قابىلداپ، قوس مەملەكەت ساۋدا جانە ميگرانتتار بويىنشا ورتاق  كەلىسىمگە كەلدى. سول كەلىسىمنىڭ ءبىر ءبولىمى – امەريكا قۇراما شتاتتارىنا باعىتتالعان بوسقىندار اعىنىن ازايتۋ. قۇجاتقا ساي، مەكسيكا، سالۆادور، گۆاتەمالا جانە گوندۋراس ەلدەرى ورتالىق امەريكادان كەلگەن ميگرانتتاردى تىركەۋگە الىپ، كومەك كورسەتۋى ءتيىس. ال بۇعان كەلىسپەي بوسىپ جۇرگەندەردى، اقش اۋماعىنا وتپەك بولعانداردى قيناپ، ەلىنە قايتارادى. بۇل جاڭالىقتان سوڭ، ميگرانتتاردىڭ باسىم بولىگى تىركەۋدەن وتۋگە مەحيكوعا اعىلىپ جاتىر. ال اقش كەلى­سىمنىڭ تيىمدىلىگىن تەكسەرۋ ماقساتىندا مەكسيكا بيلىگىنە 45 كۇن ۋاقىت بەردى.

سوڭعى جاڭالىقتار