20 ماۋسىم 2019, 13:41 1091 0 جاھان اسەل انۋاربەك

لوندون مەرىن نەگە ايىپتادى؟

ۇلىبريتانيا استاناسى – لوندوندا سوڭعى جىلدارى قىلمىستىق وقيعالار ءورشىپ بارادى. وسىنداي ءبىر-بىرىنە قاتىسى جوق قىلمىستىق شابۋىلداۋ سالدارىنان وتكەن دەمالىستا لوندوندا 18 بەن 30 جاس اراسىنداعى ءۇش ەر ادام قازا تاۋىپ، تاعى ۇشەۋى جارالاندى. قازىر قۇقىق قورعاۋ ورگاندارى تەرگەۋ جۇمىستارىن جۇرگىزۋدە.

رەسمي دەرەكتەرگە سۇيەنسەك، اعىلشىنداردىڭ باس قالاسىندا جىل باسىنان بەرى 56 ادام كىسى قولىنان مەرت بولعان. ال وتكەن جىلدىڭ ءدال وسى مەرزىمىندە لوندوندا 82 ادام قىلمىسكەرلەردىڭ قۇربانىنا اينالدى. بۇل – سوڭعى ونجىلدىقتاعى ەڭ ۇلكەن كورسەتكىش.

ءدال وسىنداي جاڭالىقتار الەمدىك اقپارات قۇرالدارىندا جاريالانىسىمەن اقش پرەزيدەنتى دونالد ترامپ لوندون مەرى ساديك حاندى ايىپتاۋعا اسىقتى. ترامپ «تۆيتتەردەگى» پاراقشاسىندا «لوندونعا جاڭا مەر قاجەت. حان – بۇل اپات، ءبارى بۇدان دا ناشار بولادى» («LONDON needs a new mayor ASAP. Khan is a disaster - will only get worse!») دەپ جازدى. ال لوندون مەرىنىڭ وكىلدەرى حاننىڭ قازا تاپقانداردىڭ وتباسىنا كوڭىل ايتاتىنىن مالىمدەپ، «مۇنداي جازبالارعا جاۋاپ بەرۋگە ۋاقىت جوعالتپايتىنىن» جەتكىزدى. ءبىراز ۋاقىت وتكەننەن كەيىن لوندون باسشىسى «ءبىزدىڭ قالادا زورلىق پەن قىلمىسقا جول جوق. مەن ءۇشىن لوندوندىقتاردىڭ قاۋىپسىزدىگى وتە ماڭىزدى» دەگەن جازبا قالدىردى.

دونالد ترامپ ايىپتاپ وتىرعان شاھارداعى جاعداي امەريكادا قانداي؟ ۆۆس پورتالىنىڭ زەرتتەۋىنشە، اقش-تىڭ ۇلكەن قالالارىنىڭ ءبىرى سانالاتىن نيۋ-يوركتە دە احۋال الاڭداتارلىقتاي. مىسالى، جەرگىلىكتى پوليتسيانىڭ مالىمەتى بويىنشا، 2018 جىلى لوندون قالاسىندا جانە شاھار ماڭىندا 136 ادام ءولىمى تىركەلىپتى. ال نيۋ-يورك پوليتسياسىنىڭ دەرەگىنە سۇيەنسەك، بۇل شاھارداعى ادام ءولىمى ودان 2 ەسەگە كوپ. ايتا كەتەيىك، اتالعان ەكى قالاداعى حالىق سانى شامالاس (لوندون – 8 ملن 869 مىڭ ادام، نيۋ-يورك – 8 ملن 623 مىڭ ادام). سوعان قاراماستان، نيۋ-يورك امەريكاداعى ەڭ قاۋىپتى قالا ەمەس. ويتكەنى اقش-تىڭ وزگە قالالارىندا ادام ءولىمى بۇدان دا كوپ تىركەلەدى ەكەن. سوندا دونالد ترامپ لوندون مەرىن نەگە ايىپتاپ وتىر؟ «قۇلاپ جاتىپ جىعىلعانعا كۇلىپتى» دەگەن وسىنداي بولاتىن ءتارىزدى.

سوڭعى جاڭالىقتار