20 ماۋسىم 2019, 13:38 787 0 جاڭالىقتار دينارا مىڭجاسارقىزى

پوليتسيا قىزمەتكەرى بارشاعا ۇلگى بولۋى ءتيىس

حالىق تىنىشتىعى مەن قاۋىپ­سىزدىگى ءۇشىن قۇقىق قورعاۋ مەكەمەلەرى جانە پوليتسيا قىزمەتكەرلەرىنە سەنىم ارتادى. الايدا، سوڭعى جىلدارى كوپشىلىك اراسىندا «مەنىڭ پوليتسيام مەنى قورعاي ما؟» دەگەن سياقتى ەكىۇشتى پىكىر قالىپتاسقانى راس. وعان سەبەپتەر دە جوق ەمەس.

ىشكى ىستەر مينيسترلىگى وتاندىق پوليتسيا قىزمەتكەرلەرىن قىراعى ەتۋ ماسقاتىندا ءتۇرلى امالدى قولعا الۋدا. بۇل سالادا بىرقاتار رەفورمالاردىڭ جۇزەگە اسقانىنان دا جۇرت حاباردار. ارنايى اتتەستاتسيادان ءوتىپ، ءوز ىسىنە نەمكەتتى قارايتىنداردان تازالاندى دا. ءتىپتى، 2017 جىلى ەلباسىنىڭ قاۋلىسى بويىنشا پوليتسيا قىزمەتكەرلەرىنىڭ جالاقىسى 25 پايىزعا كوبەيگەنى بەلگىلى. سول كەزدە ەلباسى ن.نازارباەۆ: «قىلمىسپەن كۇرەستە پوليتسەيلەر الدىڭعى قاتاردا جۇرەدى جانە ءبىرىنشى بولىپ ءبىزدىڭ ازاماتتاردىڭ قۇقىقتارى مەن بوستاندىقتارىن قورعايدى. سوڭعى جىلدارى ولاردىڭ قىزمەتىنىڭ ناتيجەلەرى ايقىن كورىنۋدە. ماسەلەن، وتكەن جىلمەن سالىستىرعاندا قىلمىس دەڭگەيى 15 پايىزدان استام تومەندەگەن. اسا اۋىر جانە اۋىر قىلمىستاردىڭ بەتىن اشۋ كورسەتكىشى 72 پايىزعا جەتتى. قالالار مەن اۋىلداردا ازاماتتاردىڭ كوشەدەگى قاۋىپسىزدىگى ايتارلىقتاي كوتەرىلدى»، – دەدى.

سونداي-اق، قازىرگى جاھاندىق تۇراقسىزدىق ۋاقىتىندا حالىقتىڭ بيلىك وكىلدەرى – پوليتسەيلەرگە سەنىم ءبىلدىرۋى اسا ماڭىزدى. ءبىر ايتا كەتەرلىگى، پوليتسيا ماماندارى قىزمەتتىك پارىزىن مۇلتىكسىز اتقارعاندا عانا قوعام مەن مەملەكەتتىڭ جاڭعىرۋى جۇزەگە اسادى. زاڭدىلىقتىڭ، ازاماتتاردىڭ قۇقىقتارى مەن بوستاندىقتارىنىڭ ساقتالۋىن قاتاڭ باقىلاۋعا الۋ قاجەت. بۇل – ەلىمىزدىڭ ورنىقتى ءارى تۇراقتى دامۋىنىڭ باستى فاكتورىنىڭ ءبىرى. سونداي-اق، زاماناۋي تۇرعىدا ءتيىمدى پوليتسيا قىزمەتى مەملەكەت پەن حالىقتىڭ باسەكەگە قابىلەتتىلىگىن ارتتىرۋعا سەپتىگىن تيگىزبەك.

بىلايعى جۇرت سول ەلدىڭ پوليتسياسىنا قاراپ، مەملەكەتتىك بيلىك تۋرالى پىكىر قالىپتاستىرادى. كەيدە «باس ال دەسە، شاش الاتىن» ارەكەتتەرگە بارىپ جاتاتىن پوليتسيا قىزمەتكەرلەرى دە جوق ەمەس. پوليتسيا قىزمەتكەرى بارشاعا ۇلگى بولۋعا ءتيىس. ايتپاقشى، قر ىشكى ىستەر ءمينيسترى ەرلان تۇرعىمباەۆ 9, 10, 11 ماۋسىم كۇندەرى نۇر-سۇلتان، الماتى، شىمكەنت قالالارىندا وتكەن زاڭسىز ميتينگتەن 300-دەن استام پوليتسيا قىزمەتكەرى جاراقات العان دەپ حابارلادى.  «ونىڭ ىشىندە التاۋى اۋرۋxانادا جاتىر. قۇقىق قورعاۋ ورگاندارىنىڭ قىزمەتكەرلەرى قانداي دا ءبىر ارنايى قۇرالداردى قولدانعان جوق. ءفوتوتۇسىرىلىم جانە ۆيدەولاردى قاراساڭىز پوليتسەيلەرگە قالاي شابۋىل جاسالعانىن كورەر ەدىڭىزدەر. سۇيەكتەرى سىنعان، باس-سۇيەك جاراقاتتارىن العاندار بار. ويتكەنى، دەنە جاراقاتتارىنىڭ بارلىعى تاس لاقتىرعاننان جانە تاياق پەن ارماتۋرامەن ۇرعاننان پايدا بولعان. پوليتسياعا ارنايى قۇرالداردى – گاز قارۋىن، دۋبينكا مەن وزگە دە زاتتاردى پايدالانباۋ تۋرالى پارمەن بەرىلگەن. قازاقستاندىق پوليتسيا ولاردى قولدانبادى. تەك شيەلەنىستى رەتتەۋ ءۇشىن فيزيكالىق كۇش پايدالانىلدى. ەگەر پوليتسيا تاراپىنان قاراپايىم ادامدار جاراقات الىپ نەمەسە جاپا شەكسە پروكۋراتۋراعا ارىز جازۋ كەرەك»، – دەدى ەرلان تۇرعىمباەۆ.

 

توعجان تولەگەن

سوڭعى جاڭالىقتار