19 ماۋسىم, 14:23 602 0 ونەر "تۇركىستان" گازەتىنىڭ اۆتورلارى

تۇعىرى بيىك - تۇركىستان

تۇركىستان ءتورت باعىتتا داميدى

تۇركىستان وبلىسىنىڭ قۇرىلعانىنا بيىل 1 جىل تولىپ وتىر. وتكەن جىلدىڭ 19 ماۋسىمىندا ەلباسى، قازاقستاننىڭ تۇڭعىش پرەزيدەنتى ن.نازارباەۆ شىمكەنت شاھارىنا مەگاپوليس قالا مارتەبەسىن بەرىپ، تۇركىستان وبلىسىن قۇرۋ تۋرالى جارلىققا قول قويعان بولاتىن. سول تۇستا جاڭا وبلىستىڭ ورتالىعى بولىپ تۇركىستان قالاسى بەكىتىلدى.

مىنە، سودان بەرگى ۋاقىتتا جاڭا وبلىس ورتالىعىن كوركەيتۋ، گۇلدەندىرۋ باعىتىنداعى جۇمىستار ۇلكەن قارقىنمەن جۇرگىزىلىپ كەلەدى. بەكىتىلگەن جوبالاردى جوسپارعا ساي جۇزەگە اسىرۋ ماسەلەسى دە كۇن تارتىبىنەن تۇسكەن ەمەس. رەسپۋبليكالىق دەڭگەيدە ءجيى-ءجيى جيىندار ءوتىپ، تۇركىستاننىڭ دامۋى جان-جاقتى پىسىقتالۋدا. جالپى العاندا، ەلباسىنىڭ جارلىعىمەن جاڭا ستاتۋسقا يە بولعان كونە قالا جاڭا كەيىپتە بوي كوتەرىپ جاتىر.

ەڭ باستىسى تۇركىستان وبلىسىنىڭ الەۋمەتتىك-ەكونوميكالىق دامۋىنا ەل ۇكىمەتى ايرىقشا نازار اۋدارىپ وتىر. ءبىر ايدىڭ كولەمىندە ۇكىمەت تاراپىنان اسا ماڭىزدى 5 قاۋلى قابىلدانعان. ونىڭ ەڭ ماڭىزدىسى - «تۇركىستان وبلىسىن الەۋمەتتىك-ەكونوميكالىق دامىتۋدىڭ 2024 جىلعا دەيىنگى كەشەندى جوسپارى». بۇل باعىتتا قوماقتى قارجىلار قاراستىرىلىپ، ماڭىزدى جوبالاردى ىسكە اسىرۋ جانە ءوڭىردى دامىتۋ باعىتىندا كوپتەنەن جۇمىستار جۇزەگە اسادى دەپ جوسپارلانۋدا.

اپتانىڭ سەيسەنبىسىندە تۇركىستان وبلىسىنىڭ اكىمى ومىرزاق شوكەەۆ جىل بويى اتقارىلعان جۇمىستاردى قورىتىندىلاپ، ءباسپاسوز ءماسليحاتىن وتكىزدى. وندا تۇركىستان وبلىسىنىڭ دامۋ بارىسى دا جان-جاقتى ايتىلدى.

جىل سوڭىندا جەتى نىسان پايدالانۋعا بەرىلەدى

تۇركىستاننىڭ دامۋىنا ەلىمىزدىڭ بارلىق ءوڭىرى، ءىرى ۇلتتىق كومپانيالارى مەن بيزنەس وكىلدەرى وزىندىك ۇلەستەرىن قوسىپ جاتىر. اتاپ ايتساق، قوستاناي وبلىسى - نەكە سارايىن، شىعىس قازاقستان وبلىسى – اۋەندى سۋبۇرقاق تارتۋ ەتپەك. جامبىل وبلىسى – ۆيزيت ورتالىعىن، باتىس قازاقستان وبلىسى – تاريحي-كيەلى ورىندار ورتالىعىن تۇرعىزباق. قىزىلوردا وبلىسى – شىعىس مونشاسىن، ماڭعىستاۋ وبلىسى – امفيتەاتر، «نۇر - سۇلتان» قالاسى – «نۇر - سۇلتان» الاڭىن، الماتى – مەديا ورتالىق، شىمكەنت قالاسى – وبلىستىق عىلىمي-امبەباپ كىتاپحانا سالىپ بەرەدى دەپ كۇتىلۋدە. اۆتوبەكەت، فيتنەس ورتالىق، بەس جۇلدىزدى «ريكسوس» قوناقۇيىنىڭ قۇرىلىسى جەكە ينۆەستورلار ەسەبىنەن جۇرگىزىلەدى. «سامۇرىق-قازىنا» ۇلتتىق ءال-اۋقات قورى» اكتسيونەرلىك قوعامى، «بازيس-ا» جانە «BI Group» سەكىلدى ۇلتتىق كومپانيالار دا كونە قالاعا ساۋلەتتى عيماراتتاردى تارتۋ ەتپەك.

 

--جالپى بۇگىنگى تاڭدا قۇرىلىسى قارقىندى ءجۇرىپ جاتقان تۇركىستاندا 29 نىسان سالىنادى. ونىڭ ىشىندە جاڭا اكىمشىلىك-ىسكەرلىك ورتالىعىندا 17 نىساننىڭ قۇرىلىسى باستالعان. بيىلعى جىلى وبلىس اكىمدىگى، «نۇر-سۇلتان» الاڭى، مەديا ورتالىق، وليمپيادالىق رەزەرۆتەگى سپورت مەكتەبى، ساياباق، مۋزىكالىق مەكتەپ، حالىققا قىزمەت كورسەتۋ ورتالىعى پايدالانۋعا بەرىلەدى دەپ كۇتىلۋدە – دەدى ومىرزاق شوكەەۆ.

ياساۋي شاكىرتتەرى شاقىرىلادى

بۇگىنگى تاڭدا تۇركىستاننىڭ الەۋمەتتىك-ەكونوميكالىق دامۋىمەن قاتار، يدەولوگيالىق دامۋىنىڭ 4 باعىتى ايقىندالىپ وتىر.

بىرىنشىدەن، تۇركىستان – قازاق حالقى مەن تۇركى تىلدەس ەلدەردىڭ ەڭ ءىرى زيارات جانە تۋريزم ورتالىعى. ەكىنشى، تۇركىستان – الەمدىك دەڭگەيدەگى قولونەر جانە شەبەرلەر ورتالىعى. ءۇشىنشى، تۇركىستان – ۇلى جىبەك جولىنىڭ بويىندا ورنالاسقان ءىرى ساۋدا ورتالىعى. ءتورتىنشى، قوجا احمەت ياساۋي – رۋحاني تۇلعا. مىنە، وسى 4 باعىت بويىنشا يدەولوگيالىق جۇمىستار قولعا الىنادى. ونىڭ بىرقاتارى تۇركىستان وبلىسىنىڭ 1 جىلدىعى اياسىندا باستالىپ تا كەتتى.

-- كەلگەن تۋريستەر وڭىرىمىزدە ورنالاسقان كيەلى جەرلەرگە زيارات ەتىپ، تۋريستىك باعىتتاردى ناسيحاتتايدى. تاريح قويناۋىندا كونەدەن كەلە جاتقان ۇلتتىق قولونەرىمىزدى كەيىنگى ۇرپاققا جەتكىزۋ ءۇشىن، شەبەرلىك قۇپيالارى مەن قولونەر تەحنولوگيالارىن ساقتاۋ، نىعايتۋ جانە جاڭعىرتۋ ءۇشىن بارلىق جاعداي جاسايمىز. تۇركىستان زامانىندا توعىز جولدىڭ تورابىندا ورنالاسقان ءىرى ساۋدا ورتالىعى بولعانى ەسكەرىلە وتىرىپ، بۇل قالانى ءىرى ساۋدا، ونەر، تۋريزم ورتالىعىنا اينالدىرۋدىڭ كەشەندى تەتىگى دايىندالادى. ءياساۋيدىڭ ارتىنا قالدىرعان وشپەس مۇراسىن ناسيحاتتاۋ ماقساتىندا قوجا احمەت ءياساۋيدىڭ تۇركيا، وزبەكستان، يران، يندونەزيا جانە ەۋروپا ەلدەرىندەگى شاكىرتتەرىنىڭ باسىن قوساتىن سيمپوزيۋم ۇيىمداستىرىلادى – دەدى وبلىس اكىمى.

57 تۋريستىك نىسان ازىرلەنۋدە

تۇركىستاندا تۋريستەر ءۇشىن قولايلى جاعدايلار جاسالادى. كوشەلەرى كونە قالانى ەسكە تۇسىرسە، شىعىس بازارى سەكىلدى ساۋدا قاتارلارى شەتەلدەن كەلۋشىلەرگە ءتۇرلى كادە-سىيلاردى ۇسىنباق.

ەڭ باستىسى، قالادا حالىقارالىق اەروپورت سالىنىپ، تاشكەنت پەن بۇقارادان، سامارقاندتان تۋريستەردى تىكەلەي تاسىمالداۋ ماقساتىندا باعىتىندا رەيستەر اشىلادى.

بۇگىندە قر تۇڭعىش پرەزيدەنتى ن.ءا.نازارباەۆتىڭ تاپسىرماسىنا سايكەس تۇركىستان قالاسىندا تۋريزم سالاسى بويىنشا كوللەدج اشۋ جۇمىستارى جۇرگىزىلۋدە. سونداي-اق ەكولوگيالىق، تاريحي-مادەني جانە

تانىمدىق باعىتتا 57 تۋريستىك مارشرۋت ازىرلەنىپ وتىر. سونىڭ ءبىرى - قاسقاسۋ تۋريستىك-رەكرەاتسيالىق كەشەنى.

جوبانىڭ ءبىرىنشى كەزەڭىندە جىلىنا 45 000 – 110 000 تۋريستەر قابىلداۋعا مۇمكىندىك تۋماق. ونىڭ قۇرىلىسى بارىسىندا 2000 –عا جۋىق جۇمىس ورنى جانە ىسكە قوسىلعاندا 400 تۇراقتى جۇمىس ورنى اشىلادى دەپ كۇتىلۋدە.

سونداي-اق «زياراتشىلار ورتالىعى» عيماراتى قايتا قۇرىلىمداۋدان ءوتىپ، «ۇلى جىبەك – جولى» ۇلتتىق قول ونەر شەبەرلەرى ورتالىعىنا اينالادى.

ورتالىقتا قولونەرشىلەر ءۇشىن دۋالدى ءبىلىم بەرۋ ورتالىعى اشىلادى. شاكىرتتەر ءداستۇرلى قولونەردىڭ بارلىق تۇرلەرىن ۇيرەنەدى. كەراميكا، توقىما، اعاش جانە بىلعارىمەن جۇمىس جاساۋدى، سونداي-اق زەرگەرلىك بۇيىمدار مەن قولا قۇيۋ ىستەرىن مەڭگەرەتىن بولادى.

تۇركىستاننان شىعىس بازارى سالىنادى. مۇندا شىعىس ستيلىندەگى 5 جىبەك-جولى ەلدەرىنىڭ بازارى قاراستىرىلعان. اتالعان جوبا تولىقتاي جەكە ينۆەستيتسيا ەسەبىنەن ىسكە اسىرىلادى.

اقىلدى تەحنولوگيالار قولدانىسقا ەنەدى

ءوڭىر باسشىسىنىڭ ايتۋىنشا وبلىس ورتالىعىن ازىق-تۇلىك قاۋىپسىزدىگىمەن قامتاماسىز ەتۋ ماقساتىندا تۇركىستان قالاسى ايماعىندا راديۋسى 15,0 شاقىرىمدى قۇرايتىن ازىق-تۇلىك جانە جاسىل بەلدەۋ قالىپتاستىرۋ جوباسى باستالعان. عالىمداردىڭ سۇيەمەلدەۋىمەن اقىلدى تەحنولوگيالاردى قولدانا وتىرىپ جۇزەگە اساتىن بەلدەۋ 2 كەزەڭ بويىنشا جۇزەگە اسادى. بۇعان قوسا، 8 ءىرى ينۆەستيتسيالىق جوبالاردى ىسكە اسىرۋ جوسپارلانۋدا.

--اۋا-رايىنىڭ قولايلىلىعى، حالىقتىڭ ەڭبەكقورلىعى – ءوڭىردىڭ ينۆەستيتسيالىق قابىلەتتىلىگىن كورسەتەتىن باستى ولشەمنىڭ ءبىرى. بيىلعى جىلدىڭ العاشقى بەس ايىندا ينۆەستيتسيا كولەمى 60 ملرد. تەڭگەدەن استى. سونداي-اق وبلىستا بۇگىندە ەكسپورتتاۋشىلار ءۇشىن بىرىڭعاي Call Center جۇمىس ىستەپ كەلەدى جانە كاسىپكەرلەرگە ارنالعان بارلىق قاجەتتى اقپارات ورنالاسقان ۆەب-پورتال سىناقتان وتكىزىلۋدە – دەدى ومىرزاق ەستايۇلى.

مىڭنان استام كوپبالالى وتباسى پاتەرلى بولادى

وبلىستا حالىقتىڭ تۇرمىس ساپاسىن جاقسارتۋ جايى باستى نازاردا. كوپبالالى انالارعا اتاۋلى الەۋمەتتىك كومەك كورسەتۋ مولشەرى ارتىپ كەلەدى.

تۇركىستان وبلىسى بويىنشا جىل سوڭىنا دەيىن 1032 كوپبالالى وتباسى پاتەرمەن قامتاماسىز ەتىلەتىن بولادى. بۇدان بولەك، 2019 جىلدىڭ 5 ايىندا تۇركىستان وبلىسى بويىنشا بارلىعى 1724 پاتەر تاپسىرىلعان. جىل قورىتىندىسىمەن 50 تۇرعىن ءۇي، ياعني 2 613 پاتەر پايدالانۋعا بەرىلەدى دەپ كۇتىلۋدە.

وبلىستا 2 قالالىق، 4 اۋداندىق ەمحانانىڭ قۇرىلىسى جانە تۇركىستان قالاسىندا №3 وبلىستىق پەريناتالدىق ورتالىعىنا جاپسارلاس 150 ورىندىق پەرزەنتحانانىڭ قۇرىلىسى جۇرۋدە. سونداي-اق، وبلىس ورتالىعىندا 900 ورىندىق 1 ءبىلىم ۇياسى سالىنىپ جاتىر.

بيىل مەملەكەتتىك جانە سالالىق باعدارلامالار اياسىندا 3315 جاڭا جۇمىس ورىندارى اشىلعان. بۇل ءوز كەزەگىندە جۇمىسسىزدىق دەڭگەيىنىڭ تومەندەۋىنە ايتارلىقتاي اسەر ەتكەن. ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسى شەڭبەرىندە 24 478 ادام جۇمىسپەن قامتىلعان.

بۇگىندە وبلىس تۇرعىندارىنىڭ ءومىر ساپاسىن ارتتىرۋ ماقساتىندا ينجەنەرلىك ينفراقۇرىلىم، سونىڭ ىشىندە جىلۋ، سۋ تارتۋ جۇيەسى، گاز جانە ەلەكترمەن جابدىقتاۋ بويىنشا كوپتەگەن ماسەلەلەر شەشىمىن تاۋىپ كەلەدى.

قازىرگى تاڭدا تۇركىستان قالاسىندا اكىمشىلىك-ىسكەرلىك ورتالىق پەن مادەني-تاريحي ورتالىقتى بۇرىن قولدانىلماعان ينجەنەرلىك ينفراقۇرىلىممەن قامتاماسىز ەتۋ جۇمىستارى جۇرگىزىلۋدە. جاڭادان سالىنىپ جاتقان نىسانداردى جىلۋمەن قامتاماسىز ەتۋ جانە ونىڭ ساپالىق كورسەتكىشىن ارتتىرۋدى قامتاماسىز ەتۋ ماقساتىندا جاڭا تەحنولوگيالار قولدانىلىپ جاتىر.

تۇركىستان قالاسىنداعى ەكولوگيالىق جاعدايدى جاقسارتۋ ءۇشىن اعىمداعى جىلدىڭ سوڭىنا قاراي حالىقتىڭ 56% گازبەن قامتاماسىز ەتۋ جوسپاردا بار.

ءباسپاسوز ءماسليحاتى بارىسىندا وبلىس اكىمى ومىرزاق ەستايۇلى وڭىردە اتقارىلىپ جاتقان جۇمىستاردى كەڭ كولەمدە ايتىپ ءوتتى. الداعى جۇمىس جوسپارىمەن دە تانىستىرىپ، جۇزەگە اساتىن جوبالارعا دا جان-جاقتى توقتالىپ ءوتتى.

جيىنعا رەسپۋبليكالىق جانە وبلىستىق باق باسشىلارى مەن وكىلدەرى قاتىستى. ءتۇرلى تاقىرىپتار توڭىرىگەندە قويىلعان سۇراقتارعا دا تولىققاندى جاۋاپ بەردى.

س.سەيىت،

تۇركىستان قالاسى

سوڭعى جاڭالىقتار