19 ماۋسىم, 12:13 414 0 دەنساۋلىق TURKYSTAN.KZ

دارىگەرلەردىڭ جالاقىسى تاعى كوتەرىلەدى

2020 جىلدىڭ اقپانىنا قاراي ەلىمىزدەگى 400 مىڭ مەديتسينا قىزمەتكەرىنىڭ جالاقىسى تاعى 30 پايىزعا ارتاتىن بولادى. بۇل تۋرالى حالىقپەن ەسەپتىك كەزدەسۋ كەزىندە قر دەنساۋلىق ساقتاۋ ءمينيسترى ەلجان ءبىرتانوۆ ايتتى. 

«ەلباسى مەن پرەزيدەنتتىڭ تاپسىرماسىنا سايكەس جالاقىنى كوتەرۋ ءۇشىن بارلىق قاجەتتى شارالار  وسى ايدان باستاپ قابىلداناتىن بولادى. ادامدار قولىنا ناقتى الاتىن جالاقىنى 30  پايىزعا كوتەرۋدى ماقسات تۇتىپ وتىرمىز. دەگەنمەن، مۇنىڭ دا وزىندىك ەرەكشەلىكتەرى بار. كوپشىلىك، حالىق  تا دەنساۋلىق ساقتاۋ سالاسىنداعى جالاقىنى دەنساۋلىق ساقتاۋ ءمينيسترى نەمەسە مەملەكەت بەكىتەدى دەپ ويلاۋى مۇمكىن. ال ءىس جۇزىندە، بۇل ولاي ەمەس. ءبىز مەديتسينالىق ۇيىمدارعا كورسەتكەن قىزمەتى ءۇشىن تولەيمىز.  ياعني، اپپەنديتسيتتى ەمدەسە ونىڭ بەكىتىلگەن باعاسى بار. ونى تاريف دەپ ايتامىز جانە وسى تاريف ارقىلى جالاقى شىعىندارىن قالىپتاستىرامىز. ءبىز وسى ءتاريفتى مەديتسينالىق قىزمەتكەرلەرگە اقشا جەتۋى ءۇشىن ارتتىرامىز»، - دەدى ە.ءبىرتانوۆ. ونىڭ ايتۋىنشا، وتكەن جىلدىڭ ىشىندە دارىگەرلەردىڭ جالاقىسىن ارتتىرۋ ماقساتىندا العاشقى مەديتسينالىق-سانيتارلىق كومەك ءتاريفى 20 پايىزعا كوتەرىلگەن. الايدا، ءتاريفتىڭ كوتەرىلۋى دارىگەرلەردىڭ جالاقىسىنىڭ كوتەرىلۋىنە ەش اسەرىن تيگىزە الماعانى انىقتالعان. «بيىل ءبىز جاڭا تەتىكپەن جۇمىس ىستەيمىز. ءبىرىنشى كەزەكتە الەۋمەتتىك مەديتسينالىق ساقتاندىرۋ قورى اتالعان اقشانىڭ بارلىق مەديتسينالىق ورتالىقتاردا ماقساتقا ساي پايدالانىلۋىن قاداعالايتىن بولادى. قور جالعىز تولەۋشى بولعاننان كەيىن، قوسىمشا تالاپ قويۋعا قۇقىلى. بۇل جۇمىسقا كاسىپوداق فەدەراتسيالارىن تارتامىز. مۇنداي جۇمىس بارلىق الەمدە بار. ءبىز قارجىلاندىرۋدى ارتتىرامىز، ال كاسىپوداقتار جالاقىنىڭ ارتۋىن تالاپ ەتەتىن بولادى. بۇل سىزبانىڭ جۇمىس ىستەيتىندىگىنە سەنىمدىمىن»، - دەدى ول.

سونىمەن قاتار ول بۇل  جۇمىسقا جەرگىلىكتى اتقارۋشى ورگانداردىڭ تاراپىنان باقىلاۋ بولۋى ءتيىس ەكەندىگىن باسا ايتتى. «ءدال وسى سىزبامەن جىل سايىن جالاقىنى ارتتىرۋدى قاراستىرىپ وتىرمىز. 2020 جىلى جالاقىنى تاعى 30 پايىزعا كوتەرۋدى جوسپارلاۋدامىز. ول ءۇشىن اقشا بار، بۇل اقشانى سىزدەرمەن بىرگە جينادىق. تولىقتاي العاندا، اقپاننان باستاپ كەلەسى جىلدىڭ اقپانىنا دەيىن بارلىق سالادا جالاقى شامامەن 70 پايىزعا ارتاتىن بولادى. بۇل 400 مىڭ مەديتسينا قىزمەتكەرىنە قاتىستى»، - دەدى مينيستر.

 

سوڭعى جاڭالىقتار