19 ماۋسىم, 11:10 429 0 ونەر TURKYSTAN.KZ

"تولە بي" تۇساۋكەسەرى انشلاگپەن ءوتتى

تۇركىستان وبلىسىنىڭ ءبىر جىلدىعى مەرەكەسى اياسىندا «تولە بي» تەلەحيكاياسىنىڭ تۇساۋكەسەرى ءوتتى. تۇركىستان قالاسىندا ۇيىمداستىرىلعان  تەلەحيكايانىڭ تۇساۋكەسەر كورسەتىلىمى انشالاگپەن ءوتتى.

ق.ا.ياساۋي اتىنداعى حقتۋ مادەنيەت ورتالىعىندا وتكەن ءىس-شارانى وبلىستىق مادەنيەت باسقارماسىنىڭ باسشىسى نۇرداۋلەت يسابەك اشىپ، وبلىستا كينو ونەرىنە زور ۇلەس قوسىپ جۇرگەن ونەر مايتالماندارىنا العىسىن ءبىلدىردى.

«تولە بي» تاريحي ءفيلمىنىڭ تۇساۋكەسەرى  ەلوردامىز نۇر-سۇلتان قالاسىندا جوعارى دەڭگەيدە وتكەنىن اتاپ ءوتتى. «بۇل «ساق» كينوستۋدياسى مەن «وڭتۇستىكفيلم» كمم-ءنىڭ بىرلەسىپ تۇسىرگەن ءبىرىنشى جانە سوڭعى ءفيلمى ەمەس. تەك وبلىسىمىزدىڭ ماقتانىشتارى عانا ەمەس، سونىمەن بىرگە ەلىمىزدىڭ مادەنيەت سالاسىنا، ونىڭ ىشىندە كينو ونەرىنىڭ تىڭ يدەيالارىمەن جاڭاشا دامۋىنا ۇلكەن ۇلەس قوسۋدا. وسىنداي جاڭا دۇنيەلەرمەن كينوفيلمدەر قورجىنىن تولتىرا بەرىڭىزدەر»،- دەدى باسقارما باسشىسى.

ءىس-شاراعا سونداي-اق، قر ەڭبەك سىڭىرگەن قايراتكەرى، «قۇرمەت» وردەنىنىڭ يەگەرى، «تولە بي» ءفيلمىنىڭ كوركەمدىك جەتەكشىسى ساتىبالدى نارىمبەتوۆ پەن تەلەحيكايانىڭ ستسەناريسى، جازۋشى - شويبەك ورىنباي، ءفيلمنىڭ باس رەجيسسەرى باتىرحان داۋرەنبەكوۆ، تولە بي ءرولىن سومداعان - ساعىندىق ءجۇمادىل، تولە ءبيدىڭ جىگىت كەزىن سومداعان تالانتتى اكتەر - ابزال تولەن، تاعى دا باسقا بارلىق اكتەرلار مەن ءتۇسىرىلىم توبى، «ساق» كينوستۋدياسىنىڭ شىعارماشىلىق ۇجىمى قاتىستى.

كورسەتىلىم  سوڭىندا باسقارما باسشىسىنىڭ ورىنباسارى اسىلحان تەمىرحانۇلى بىرقاتار ونەر يەلەرىن وبلىستىق مادەنيەت باسقارماسى باسشىسىنىڭ العىس حاتىمەن ماراپاتتادى. كورەرمەندەر جاڭادان جارىققا شىققان كوركەم ءفيلمدى ەرەكشە ىقىلاسپەن تاماشالاپ، تارقاستى.

سوڭعى جاڭالىقتار