18 ماۋسىم, 13:23 703 0 ونەر Túrkistan Gazeti

"ويىنشىقتار حيكاياسى" قازاق تىلىندە

ورتالىق كوممۋنيكاتسيالار قىزمەتىندە «وزىڭنەن باستا» جوباسى اياسىندا قازاق تىلىنە دۋبلياجدالعان «ويىنشىقتار حيكاياسى-4» ءفيلمىنىڭ تۇساۋكەسەرىنە ارنالعان ءباسپاسوز كونفەرەنتسياسى ءوتتى.

«بولاشاق» كورپوراتيۆتىك قورى قامقورشىلىق كەڭەسىنىڭ ءتورايىمى دينارا ءشايجۇنىسوۆانىڭ ايتۋىنشا، «ويىنشىقتار حيكاياسى-4» تۋىندىسىن دۋبلياجداۋ ءۇشىن نۇر-سۇلتان جانە الماتى قالالارىندا 50-دەن استام اكتەر كاستيگتەن وتكەن. ال فيلم بارىسىندا وينالاتىن ساۋندترەكتەردىڭ بارلىعىن ءانشى دانيار وتەگەن ورىنداپ شىققان.

«ءبىز بۇل ءىستى قولعا العالى 8 جىل بولىپتى. سول ۋاقىتتا دەمەۋشىلەر تاراپىنان 3,5 ملن دوللار تارتىلىپ، 30 گولليۆۋدتىق فيلم قازاقشالاندى. ونىڭ 14-ءى Walt Disney Pictures, Pixar ستۋديالارىنىڭ انيماتسيالىق تۋىندىلارى بولسا، قالعان 16-سى Sony Pictures, Disney, Lucasfilm, Marvel Studios سياقتى تانىمال كومپانيالاردىڭ وتباسىلىق فيلمدەرى»، - دەيدى دينارا ءشايجۇنىسوۆا.

«ويىنشىقتار حيكاياسى-4» تۋىندىسىن قازاقشا ساۋندترەكپەن ارلەگەن دانيار وتەگەن Walt Disney Pictures ستۋدياسىنىڭ داۋىس بازاسىنا 100-دەن استام قازاقستاندىق اكتەر ەنگەنىن ايتتى.

«بۇل وتاندىق اكتەرلەردىڭ مۇمكىندىگىن كەڭەيتەدى. داۋىستار بازاسىندا ءبىزدىڭ اكتەرلەردىڭ بولۋى فيلمدەردى دۋبلياجداۋ جۇمىسىن جەدەلدەتەتىن بولادى. سوندىقتان بۇل ءىستى بولاشاقتىڭ قامىنا جاسالعان شارۋا دەپ ايتۋعا بولادى»، دەيدى ءانشى.

20 ماۋسىمنان باستاپ كورەرمەنگە جول تارتاتىن «ويىنشىقتار حيكاياسى-4» ءفيلمىن دۋبلياجداۋ شىعىندارىن BI Group قۇرىلىس كومپانياسى كوتەرگەن.

«وسىعان دەيىن 8 كينولەنتانى دۋبلياجداۋعا دەمەۋ جاساعانبىز. وتكەن جىلى جالپى بۇل جوباعا 150 ملن تەڭگە بولسەك، بيىل 300 ملن تەڭگە ءبولۋدى جوسپارلاپ وتىرمىز. ال 2020 جىلى بۇل سوما 350 ملن تەڭگەگە جەتۋى ءتيىس. كينونى قازاقشا سويلەتۋ ارقىلى ءۇي-ءىشىمىزدى قازاق تىلىندە سويلەتە الاتىنىمىزدى تۇسىنەتىن ۋاقىت جەتتى. ۇيدە قازاقشا سويلەسەك تە، بالالاردىڭ ءتىلى ورىسشا شىعىپ جاتادى. سەبەبى، كورەتىن مۋلتفيلمدەرى ورىن تىلىندە. قازاقستانداعى بيزنەس وكىلدەرىنە ۇندەۋ جولداعىم كەلىپ وتىر. بۇل ىسكە بارشامىز قولداۋ كورسەتەيىك»، - دەدى BI Group كومپانياسىنىڭ  قۇرىلىس يندۋسترياسىن تسيفرلاندىرۋ جونىندەگى ديرەكتورى اسحان تۇرعىنبەكۇلى.

سوڭعى جاڭالىقتار