17 ماۋسىم, 14:59 379 0 قوعام TURKYSTAN.KZ

يوگا فەستيۆالى - قازاقستاندا

ەلىمىزدە جىل سايىن بۇۇ باستاماسىمەن ۇيىمداستىرىلاتىن بەسىنشى حالىقارالىق يوگا فەستيۆالى باستالدى. ول قازاقستاندا 15-22 ماۋسىم ارالىعىندا وتكىزىلەدى. بۇل جونىندە ءۇندىستاننىڭ قازاقستانداعى ەلشىسى پرابحات كۋمار ايتتى.

ەلوردادا حالىقارالىق يوگا فەستيۆالى باستاۋ الدى. ءۇندىستاننىڭ قازاقستانداعى ەلشىسىنىڭ ايتۋىنشا، قازاقستانداعى يوگانىڭ تانىمالدىعىن ەسكەرە وتىرىپ، ءۇندىستان ەلشىلىگى فەستيۆالگە قاتىساتىن قالالاردىڭ سانىن ۇلعايتۋدى شەشكەن.

«بيىل يوگا فەستيۆالى بەسىنشى رەت ءوتىپ جاتىر. بىرىككەن ۇلتتار ۇيىمى 2014 جىلى يوگا كۇنىن بەلگىلەگەن بولاتىن. ول 2015 جىلدان بەرى تويلانادى. فەستيۆال 22 ماۋسىمعا دەيىن جالعاسادى. ءبىز ەلوردادا فەستيۆالدىڭ اياقتالۋىنا بايلانىستى اۋقىمدى ءىس-شارا وتكىزەمىز. جالپى العاندا، مۇنداي ءىس-شارا بۇكىل الەم بويىنشا ۇيىمداستىرىلادى. ال قازاقستاندا ون قالادا بىردەن تويلانادى»، - دەيدى پرابحات كۋمار.

سۆامي ۆيۆەكاناند اتىنداعى مادەنيەت ورتالىعىنىڭ ديرەكتورى ساندجاي گارگتىڭ سوزىنشە، ءۇندىستان ەلشىسىنىڭ باستاماسىمەن قازاقستان يوگانىڭ ورتاق حاتتاماسىنا ەنگىزىلگەن.

«فەستيۆال نۇر-سۇلتان عانا ەمەس، الماتى، ارقالىق، قوستاناي، ورال، تاراز، زەرەندى، بۋراباي جانە قاراعاندى وبلىسىن قامتىپ وتىر. ءۇندىستاندا بۇل فەستيۆالگە ەلدىڭ پرەمەر-مينيسترىنەن باستاپ 30 مىڭنان استام ادام قاتىسادى. ورتاق حاتتاما بويىنشا، يوگا جاتتىعۋى 45 مينۋتقا سوزىلادى. ودان بولەك، ءۇندى مادەنيەت ورتالىعىندا ەلوردا تۇرعىندارى ءۇشىن يوگا جاتتىعۋى تۇراقتى تۇردە وتكىزىلىپ تۇرادى»، - دەپ اتاپ ءوتتى ساندجاي گارگ.

سوڭعى جاڭالىقتار