17 ماۋسىم 2019, 14:00 677 0 دەنساۋلىق Túrkistan Gazeti

ماماندار قان قىسىمىن قالىپتى ۇستاۋدىڭ قۇپياسىن ايتتى

مەديتسينا قىزمەتكەرلەرى كۇنى قارساڭىندا الماتىداعى №4 قالالىق كلينيكالىق اۋرۋحانادا حالىقارالىق ارتەريالدىق گيپەرتونيامەن كۇرەس كۇنىنە ارنالعان عىلىمي-تاجىريبەلىك كونفەرەنتسيا ءوتتى.

ماماندار اۋىرمايتىن جول ىزدەۋدىڭ امالدارىن ايتتى. كونفەرەنتسياعا قالاداعى مەديتسينالىق مەكەمەلەردەن جالپى تاجىريبەلىك دارىگەرلەر، تەراپەۆتەر، كارديولوگتار، نەۆروپاتولوگتار، سالاۋاتتى ءومىر سالتىن ناسيحاتتايتىن دارىگەرلەر قاتىستى. سونىمەن قاتار، №4 قالالىق كلينيكالىق اۋرۋحانا مەن جەدەل شۇعىل كومەك اۋرۋحاناسىنىڭ دارىگەرلەرى تەلەكوپىر ارقىلى ءوزارا اقپارات الماستى.

№4 قالالىق كلينيكالىق اۋرۋحانانىڭ باس دارىگەرى قانات تەزەكباەۆ بۇگىندە ارتەريالدىق گيپەرتونيانىڭ الدىن الۋ، اسقىندىرۋ دەڭگەيىنە جەتكىزبەۋ شارالارىنىڭ دەر كەزىندە جۇرگىزىلۋى وزەكتى ەكەنىن اتاپ ءوتتى.

«ارتەريالدىق گيپەرتونيامەن اۋىراتىن ناۋقاستاردى دەر كەزىندە انىقتاۋ ماقساتىندا قارالاتىن ناۋقاستاردىڭ سانى جىلدان جىلعا ارتىپ كەلەدى. ءبىر جاقسىسى، ولاردى دەر كەزىندە ەمدەپ، ينسۋلت پەن جەدەل ميوكارد ينفاركتىسى دەڭگەيىنە جەتكىزبەي، ەمدەۋ مۇمكىنشىلىگى ارتادى. ارينە، دارىگەرلەر قان قىسىمىنىڭ الدىن الۋدا، ارتەريالدىق گيپەرتونياسى بار ناۋقاستاردى ەمدەۋدە ەلەۋلى جەتىستىكتەرگە قول جەتكىزىپ، وزىق زاماناۋي ادىستەردى ەنگىزىپ وتىر. دەگەنمەن، ەڭ كۇردەلى ماسەلە كۇندەلىكتى تىرشىلىك قامىمەن ءجۇرىپ، ءوز دەنساۋلىعىمىزعا دەگەن جاۋاپكەرشىلىكتىڭ ءالى دە ازدىعىندا. سوندىقتان دەر كەزىندە سكرينينگتىك تەكسەرۋدەن ءوتىپ، اۋرۋدى اسقىندىرماي، دارىگەرلەر كەڭەسىنە جۇگىنۋ كەرەك»،- دەدى قانات تەزەكباەۆ.

«Help» ينسۋلتپەن اۋىراتىن ناۋقاستارعا كومەك كورسەتۋ قورى» قق اتقارۋشى ديرەكتورى، نەۆروپاتولوگ-دارىگەر ايگۇل قۇدايبەرگەنوۆا جۇكتى ايەلدەردە ارتەريالدىق گيپەرتونيانىڭ اسقىنۋى، ونىڭ سالدارى، انا مەن بالاعا تيگىزەر اسەرى تۋرالى بايانداما جاساپ، كلينيكالىق جاعدايلارمەن تانىستىردى.

دارىگەرلەر ارتەريالدىق قان قىسىمىن باقىلاۋعا قول جەتكىزۋ ادىستەرىن جەتىلدىرۋ، تسەرەبرالدىق ۆەنوترومبوزدارىن دياگنوستيكالاۋدىڭ كۇردەلىلىگى مەن ەمدەۋ تەراپياسىن جۇرگىزۋ، اكۋشەرلىكتەگى قايتالانعان ترومبوەمبوليكالىق اسقىنۋلار سالدارى، ارتەريالدىق گيپەرتونياسى بار ناۋقاستاردى ەمدەۋ ەرەكشەلىكتەرى، ارتەريالدىق گيپەرتونيا كەزىندەگى كوگنيتيۆتىك زاقىمدانۋلاردى كەڭىنەن تالقىلادى.

ستاتيستيكاعا سۇيەنسەك، گيپەرتونيالىق اۋرۋمەن اۋىرۋ كورسەتكىشى قازاقستاندا 3 جىلدا 10 پايىزعا ارتقان.

سوڭعى جاڭالىقتار