17 ماۋسىم, 13:44 448 0 قوعام دينارا مىڭجاسارقىزى

“قازاقستان بارىسى"  اقسۋاتتا 2 ملن جەڭىپ الدى

تارباعاتاي اۋدانىندا ىرعىزباي دوسىحانۇلى اتىنداعى قازاق كۇرەسىنەن وتكەن الەمدىك گران-پري سايىسىندا قازاقستاندىق ايبەك نۇعىماروۆ توپ جاردى. ءبىر اپتا بۇرىن عانا نۇر-Cۇلتان قالاسىندا وتكەن “قازاقستان بارىسى” جارىسىندا وزا شاپقان بالۋان بۇل جولى دا تۇعىردىڭ ەڭ بيىك ساتىسىنان كورىندى.

الەمنىڭ  28 ەلىنەن كەلگەن ءاپايتوس پالۋاندار اراسىندا اقتىق سىندا ايبەكپەن وزبەكستاندىق  مۇقسين حيسامەدينوۆ ايقاسقان بولاتىن. جالپى فينالدىق كەزدەسۋ ايبەككە وڭاي تيگەن جوق. بەلدەسۋ اياقتالعاننان كەيىن ايبەك  ءوز ويىمەن ءبولىستى.

“قازاقستان بارىسى” تۋرنيرىنەن كەيىن دەمالىپ ۇلگەرگەن جوقپىن. ءتۇرلى باسقوسۋلارعا، تەلەارناداعى تۇسىرىلىمدەرگە قاتىسىپ، شارشاعانىمدى بايقادىم. ءبىزدىڭ وڭىردە ءوتىپ جاتقان جارىس بولعان سوڭ، ۇيىمداستىرۋشىلار قولقا سالدى. باس تارتا المادىم، ەلىمنىڭ نامىسىن ابىرويمەن قورعاعانىما قۋانىشتىمىن. ماعان قولداۋ بىلدىرگەن اقسۋات جۇرتشىلىعىنا راحمەت. “تۇعىرى بيىك-تارباعاتاي” اتتى ونەر جانە سپورت فەستيۆالىن وتكىزىپ جاتقان تالعات مازباەۆ، دۋلات تاستەكەەۆ اعالارىما العىس بىلدىرەمىن”،- دەدى ا.نۇعىماروۆ.

ءتۋرنيردىڭ 70, +80 كەلى سالماقتارىندا تاجىكستان، گرۋزيا ەلدەرىنەن كەلگەن بالۋاندار جەڭىسكە جەتتى. جەڭىمپازعا ۇيىمداستىرۋشىلار 2 ملن تەڭگە، ەكىنشى ورىنعا 1 ملن، ءۇشىنشى ورىن العان سپورتشىعا 500 مىڭ تەڭگە تابىستادى. سپورتشىلاردى اتاقتى بوكسشى قانات يسلام، اقىن ءجۇرسىن ەرمان، اقسۋات اۋىلىنىڭ قۇرمەتتى ازاماتى تۇرسىن تاستەكەەۆتەر ماراپاتتادى.

قازاق كۇرەسى ءتۋرنيرى اياقتالعاننان كەيىن Qazaq Promotions كومپانياسىنىڭ ۇيىمداستىرۋىمەن كاسىپقوي بوكس كەشى ءوتتى. قازاقستاندىق ەلديار قامشىبەكوۆ، نۇرلان ساپارباي، نۇرسۇلتان امانجولوۆ سەكىلدى قازاق بوكسشىلارى شارشى الاڭعا شىعىپ، جينالعان جۇرتشىلىقتىڭ دەلەبەسىن قوزدىردى.

سوڭعى جاڭالىقتار