15 ماۋسىم, 22:49 526 0 وقشانتاي TURKYSTAN.KZ

جۋرناليستەر تەننيس وينادى

باق وكىلدەرى اراسىندا تەننيستەن رەسپۋبليكالىق تۋرنير ءوتتى. اتالعان سپورتتىق باسەكە «TÚRKISTAN» حالىقارالىق ساياسي اپتالىعىنىڭ 25 جىلدىق مەرەيتويىنا، الدا كەلە جاتقان جۋرناليستەردىڭ ءتول مەرەكەسىنە وراي ۇيىمداستىرىلعان.

قولىنا قالام ۇستاپ، حالىق پەن بيلىك اراسىنداعى التىن كوپىر بولعان تىلشىلەر قاۋىمى تەننيس راكەتكاسىمەن دە ورنەكتى ويىن وتكىزە الاتىنىن دالەلدەدى. ءتۋرنيردىڭ باس جۇلدەسىن جەزقازعاننان ارنايى كەلگەن «سارىارقا» ايماقتىق گازەتىءنىڭ ءفوتوتىلشىسى عاليا ابدىعاپپاروۆا يەلەندى.

«ۇستەل تەننيسىنە جانىم قۇمار. قولىم قالت ەتە قالسا راكەتكامدى الىپ، شار سوققاندى جاقسى كورەمىن. «TÚRKISTAN» باسىلىمى تۋرنير وتكىزگەلى جاتىر» دەگەن حابارلاندىرۋدى كورىپ، الماتىعا اسىقتىق. جارىس جوعارى دەڭگەيدە ءوتتى. جۋرناليستەر اراسىندا بۇل سپورت تۇرىمەن ماشىقتانعان جاندار بارشىلىق ەكەن. وسىنداي شارالار ءجيى بولىپ تۇرسا دەيمىز. ۇيىمداستىرۋشىلارعا كوپ راحمەت»، – دەدى ع.ابدىعاپپاروۆا.

«TÚRKISTAN» حالىقارالىق ساياسي اپتالىعىنىڭ باس رەداكتورى قۋات اۋەسباي بۇل شارانىڭ وزىندىك ءمانى بار دەيدى.

«قالتاي مۇحامەدجانوۆ نەگىزىن قالاعان باسىلىمنىڭ ەرەكشەلىگىن كوزى قاراقتى وقىرمان بىلەدى. سوندىقتان ءبىزدىڭ ۇجىم وتكىزەتىن شارالار دا ەرەكشە بولۋ كەرەك. شيرەك عاسىرلىق مەرەيتوي قارساڭىندا كونتسەرت پەن ءتۇرلى جيىندار وتكىزۋگە بولۋشى ەدى. بىراق ارىپتەستەردىڭ باسىن قوسىپ، سپورتتىق جارىستار وتكىزۋدى ءجون دەپ تاپتىق. بۇل ءۇردىس بولاشاقتا «TÚRKISTAN»-عا ءتان ەرەكشەلىك رەتىندە كوپكە ۇلگى بولادى دەپ ويلايمىن»، – دەيدى باسىلىم باسشىسى.

وتىزعا جۋىق باق وكىلدەرىنىڭ باسىن قوسقان شاراعا قر مادەنيەت جانە سپورت مينيسترلىگى، قر ۇستەل تەننيس فەدەراتسياسى مەن جەكە كاسىپكەرلەر دەمەۋشى بولدى. قاتىسۋشىلار ىشىندە تالدىقورعان قالاسىنىڭ جۋرناليستەرى ايشىقتى ونەر كورسەتتى.

اتاپ ايتساق، «تالدىقورعان» گازەتىنىڭ باس رەداكتورى دانيار سەيسەنباەۆ ەكىنشى ورىن، «وگني الاتاۋ» باسىلىمىنىڭ وكىلى اسحات التىنبەكوۆ ءۇشىنشى ورىندى قانجىعالاپ قايتتى.

«تالدىقورعاننان الماتىعا كەلگەن نەگىزگى ماقسات – ارىپتەستەرمەن قاۋىشىپ، ەمەن-جارقىن اڭگىمەلەسۋ بولاتىن. ونىڭ ۇدەسىنەن شىقتىق. جۇلدەلى دە بولدىق. قۋانىشتىمىن. «TÚRKISTAN» تۇركى جۇرتىنا ورتاق تانىمال باسىلىم. ستۋدەنت كەزىمىزدە ىزدەپ ءجۇرىپ وقىدىق. قازاق جۋرناليستيكاسىندا وزىندىك ورنى بار مەكتەپ دەسەك بولادى. شيرەك عاسىرلىق مەرەيتوي قۇتتى بولسىن»، – دەدى ا. التىنبەكوۆ.

تاعى ءبىر ءۇشىنشى ورىندى «TÚRKISTAN» گازەتىنىڭ 2016 جىلعا دەيىنگى قىزمەتكەرى ەسەنكۇل كاپقىزى يەلەندى. ونان وزگە مينيسترلىك تاعايىنداعان ارنايى جۇلدەمەن جۋرناليست اقنيەت وسپانباي، جاندوس ايتبايۇلى، ەسەنقۇل توقتاعۇل ماراپاتتالدى.

«TÚRKISTAN» بۇعان دەيىن بوۋلينگ سپورت تۇرىنەن جۋرناليستەر اراسىندا تۋرنير وتكىزگەن-ءدى.

سوڭعى جاڭالىقتار