14 ماۋسىم, 16:29 439 0 قاۋىپسىزدىك دينارا مىڭجاسارقىزى

  توقاەۆ ەلدە وتكەن ميتينگىلەردىڭ سەبەبىن ايتتى

 ميتينگ كەزىندە قوعامدىق قاۋىپسىزدىككە قاۋىپ توندىرمەگەن ادامدار جاقىن ارادا بوساتىلادى. بۇل تۋرالى قازاقستان پرەزيدەنتى قاسىم-جومارت توقاەۆ Euronews باسىلىمىنا بەرگەن سۇحباتىندا مالىمدەدى، - دەپ حابارلايدى Tengrinews.kz ءتىلشىسى.

"شەرۋگە شىققاندارعا كەلسەك، ولار نارازىلىعىن ءبىلدىرۋ ءۇشىن كوشەگە شىقتى. قازىر ولاردىڭ تالابىن زەرتتەۋ جۇمىستارى ءجۇرىپ جاتىر. كوبىنىڭ تالابى الەۋمەتتىك سيپاتتا. مۇنداي ماسەلەلەردىڭ بارىن جوققا شىعارمايمىن. نەگىزىندە مۇنداي جاعداي ادامداردىڭ كەدەيلەنۋىنە بايلانىستى بولادى. ولار ۇكىمەتتەن الەۋمەتتىك-ەكونوميكالىق پروبلەمالاردى شەشۋدى تالاپ ەتەدى", - دەدى توقاەۆ. ونىڭ ايتۋىنشا، قۇقىق قورعاۋ ورگاندارى زاڭسىز اكيتسيالاردىڭ جولىن كەسۋدى جالعاستىرادى.  "باس پروكۋراتۋرا كوشەدەگى مۇنداي جيىنداردىڭ زاڭسىز ەكەنىن تالاي ايتقان. زاڭسىز ميتينگتەر، تارتىپسىزدىكتەر - بۇعان قاتىسقىسى كەلمەيتىن حالىققا كەدەرگى كەلتىرەدى", - دەدى پرەزيدەنت. مۇنىڭ الدىندا اقپارات جانە قوعامدىق دامۋ ءمينيسترى داۋرەن اباەۆ ميتينگىگە قاتىسقان حالىقتىڭ ەلدىڭ تاعدىرىنا دەگەن ءوز الاڭداۋشىلىعىن بىلدىرەتىنىن ايتقان ەدى.  "بۇگىن باس پروكۋراتۋرا وكىلدەرى، ىشكى ىستەر مينيسترلىگى بۇل ماسەلە جايىندا پىكىر ءبىلدىردى. مەن بۇل ماسەلەنىڭ باسقا جاعىنا توقتالار ەدىم. ءبىز سايلاۋدىڭ حالىقتىڭ ساياسي بەلسەندىلىگىن ايقىندايتىن كۇش ەكەنىن ءتۇسىنۋىمىز قاجەت. حالىق ەل پرەزيدەنتىن تاڭداپ، سونىمەن قاتار ەلدىڭ بولاشاعىن دا تاڭدايدى. وسىعان بايلانىستى ولار سايلاۋدىڭ ناتيجەسىنە بەي-جاي قاراي المايدى. سوندىقتان سايلاۋ ناتيجەسى جاريالانعاننان كەيىن، حالىق ىشتە ساقتاپ وتىرعان ەنەرگياسىن سىرتقا شىعارعىسى كەلەدى. سودان كەيىن ول ميتينگىگە جانە ءتۇرلى نارازىلىق بىلدىرۋگە الىپ كەلەدى", - دەگەن ەدى اباەۆ.

سوڭعى جاڭالىقتار