14 ماۋسىم 2019, 10:20 683 0 ايماق Túrkistan Gazeti

"تولە بي" تۋىندىسىن تاسپالاۋعا 153 ملن تەڭگە جۇمسالعان

19 ماۋسىم كۇنى تۇركىستان وبلىسىنىڭ قۇرىلعانىنا تۋرا 1 جىل تولادى. جۋىردا ورتالىق كوممۋنيكاتسيالار قىزمەتىندە اتاۋلى كۇنگە ارنالعان ءباسپاسوز كونفەرەنتسياسى ءوتتى.

تۇركىستان وبلىسى اكىمىنىڭ ورىنباسارى مالىك وتارباەۆ تۇركىستان قالاسىن تۇركى تىلدەس ەلدەردىڭ رۋحاني استاناسى رەتىندە تانىتۋ جوسپارلانعانىن ايتتى.

«بۇل ماقساتتاعى جۇمىستار ءتورت باعىتتا جۇرەدى. ونىڭ ءبىرىنشىسى - ءوڭىردى زيارات مەكەنى رەتىندە تۋريستەرگە تانىتۋ. ەكىنشى باعىت - قوجا احمەت ياساۋي كەسەنەسىن الەمدىك ساۋلەت ونەرىنىڭ جادىگەرى رەتىندە ناسيحاتتاۋ. ءۇشىنشى باعىت  - تۇركىستان قالاسىن وڭتۇستىكتىڭ ساۋدا ورتالىعىنا اينالدىرۋ. ءتورتىنشى باعىت - تۇركىستاننىڭ ۇلى ەسىمدەرىن ۇلىقتاۋ اياسىندا «ياساۋيتانۋ» ءىلىمىن دامىتۋ. وبلىستىڭ ءبىر جىلدىعىن اتاپ ءوتۋ  ماقساتىندا اپتالىق جاريالادىق. سونىڭ اياسىندا رەسپۋبليكا كولەمىندە 46 شارا وتكىزۋ جوسپارلانعان»، - دەدى مالىك وتارباەۆ.

تۇركىستان وبلىستىق مادەنيەت جانە تىلدەردى دامىتۋ باسقارماسىنىڭ باسشىسى نۇرداۋلەت يسابەكتىڭ ايتۋىنشا، وسى اپتالىق اياسىندا نۇر-سۇلتاندىق تۇرعىنداردىڭ نازارىنا بىرنەشە كينوتۋىندىنىڭ تۇساۋكەسەرى ۇسىنىلماق.

«وبلىسىمىزدىڭ ءبىر جىلدىعىنا وراي نۇر-سۇلتان قالاسىندا «ورداباسى - بىرلىك تۋى» انيماتسيالىق ءفيلمىنىڭ تۇساۋى كەسىلەدى. 25 مينۋتتىق «وقسىز وق» ءفيلمى مەن «تۇركىستان» انيماتسيالىق تۋىندىسى دا كورەرمەنگە جول تارتپاق. ال 10 سەريادان تۇراتىن «تولە بي» كينوحيكاياسىنىڭ قىسقارتىلعان نۇسقاسى فيلم رەتىندە كورسەتىلەدى»، - دەدى باسقارما باسشىسى.

اتالعان تۋىندىلار 14 ماۋسىمنان باستاپ ۇلكەن ەكراننان تەگىن كورسەتىلە باستايدى. سونىڭ ىشىندە «تولە بي» حيكاياسى «حابار» ارناسىنان كورسەتىلۋى مۇمكىن.

«تولە بي» حيكاياسىن ءتۇسىرۋ ءۇشىن وبلىس بيۋدجەتىنەن 153 ملن تەڭگە بولىنگەن. ساتىبالدى نارىمبەتوۆتىڭ كوركەمدىك جەتەكشىلىگىمەن تۇسىرىلگەن تۋىندىنى «استانا كۇنى» قارساڭىندا «حابار» ارناسىنان كورسەتۋدى جوسپارلاپ وتىرمىز»، - دەدى نۇرداۋلەت يسابەك.

سوڭعى جاڭالىقتار