13 ماۋسىم 2019, 17:55 776 0 ايماق Túrkistan Gazeti

تۇركىستاندى دامىتاتىن 5 قاۋلى

ءو.شوكەەۆ:  «ۇكىمەت تۇركىستاندى بارىنشا دامىتاتىن 5 قاۋلى قابىلدادى»

بۇگىن تۇركىستان قالاسىندا تۇركىستان وبلىستىق ءماسليحاتىنىڭ سەسسياسى ءوتتى. القالى جيىندا تۇركىستان وبلىسىنىڭ اكىمى ومىرزاق شوكەەۆ ءوڭىردى دامىتۋ باعىتىنداعى جوسپارلارى مەن اتقارىلاتىن جۇمىستارى جونىندە باياندادى.

«تۇركىستاندى تەك وبلىس ورتالىعى عانا ەمەس، جالپى تۇركى الەمىنىڭ مادەني-رۋحاني ورتالىعى رەتىندە دامىتۋ جونىندەگى تاپسىرماسىن ورىنداۋ ماقساتىندا وسى ءبىر ايدىڭ كولەمىندە ۇكىمەت تاراپىنان وبلىس ءۇشىن اسا ماڭىزدى 5 قاۋلى قابىلداندى. بۇل – تاريحتا بولماعان جاعداي. ونىڭ وبلىس جانە تۇركىستان قالاسى ءۇشىن ەڭ ماڭىزدىسى – «تۇركىستان وبلىسىن الەۋمەتتىك-ەكونوميكالىق دامىتۋدىڭ 2024 جىلعا دەيىنگى كەشەندى جوسپارى». سونىمەن بىرگە وزگە قاۋلىلار دا تۇركىستان ءۇشىن اسا ماڭىزدى. وبلىسىمىزعا مەملەكەت تاراپىنان ايرىقشا قولداۋ كورسەتىلىپ وتىر»، – دەدى وبلىس اكىمى.

ەل ۇكىمەتى تاراپىنان جوعارىدا اتالعان قاۋلىدان بولەك  «تۇركىستان قالاسىن سالۋ شەڭبەرىندە جۇمىستار جانە كورسەتىلەتىن قىزمەتتەر ساتىپ الىناتىن تۇلعالاردى ايقىنداۋ» جونىندەگى قاۋلى دا ماڭىزعا يە. سونداي-اق «TURKISTAN» ەركىن ەكونوميكالىق ايماعى مەن اكىمشىلىك-ىسكەرلىك ورتالىعىن، تۇركىستان قالاسىن دامىتۋ كوزدەلگەن قاۋلىلار وبلىستى وركەندەتۋگە وڭ اسەرىن تيىگزەتىنى انىق.

ۇكىمەت قابىلداعان قاۋلىلارعا سايكەس، وبلىستا بارلىق سالا بويىنشا اۋقىمدى جۇمىستار اتقارىلادى. اۋىل شارۋاشىلىعى، قۇرىلىس، يدەولوگيا، ءوندىرىس، يندۋستريالدى ايماقتاردى دامىتۋ جولىندا ۇلكەن جوسپارلار جۇزەگە اسىرىلادى.

ماسەلەن، تۋريزم سالاسىندا ەكولوگيالىق، تاريحي-مادەني جانە تانىمدىق باعىتتا 57 تۋريستىك مارشرۋت ازىرلەنگەن.  قاسقاسۋ تۋريستىك-رەكرەاتسيالىق كەشەنىنىڭ قۇرىلىسى بارىسىندا 1900 جۇمىس ورنى اشىلسا، ىسكە قوسىلعاندا 400 تۇراقتى جۇمىس ورنى اشىلماق. جىلىنا كەلەتىن تۋريستەر سانى دا ارتا تۇسپەك.

وڭىردە ينفراقۇرىلىم جاقسارادى. بارلىق اۋدان، قالالاردا اۋىز سۋ، گازبەن قامتۋ، ساپالى ەلەكتر ماسەلەلەرى بويىنشا تياناقتى جۇمىستار اتقارىلادى. گاز ماسەلەسى دە شەشىمىن تاۋىپ كەلەدى. ەكى ايدا 30 ەلدى مەكەنگە «كوگىلدىر وتىن» تارتىلىپ، 45 مىڭ ادام گازعا قول جەتكىزدى. بۇل جۇمىس ارى قاراي دا جالعاسىن تاۋىپ، وسى جىلدىڭ 1 قىركۇيەگىنە دەيىن 48 ەلدى مەكەنگە گاز تارتۋ جوسپاردا بار.

2019 جىلدىڭ سوڭىنا دەيىن ورتالىقتاندىرىلعان سۋمەن جابدىقتالۋ كورسەتكىشى قالالاردا 97,2 پايىزعا، ال، اۋىلدىق ەلدىمەكەندەردە 80,4 پايىزعا جەتەدى دەپ جوسپارلانىپ وتىر.

تۇركىستان قالاسىن دامىتۋ، قۇرىلىس نىساندارىن تالاپقا ساي جۇرگىزۋ جۇمىستارى دا جوسپارعا ساي اتقارىلادى. بيىلدىڭ وزىندە بىرنەشە ءىرى نىسان پايدالانۋعا بەرىلەدى.

جيىندا وسى جانە وزگە دە دەرەكتەردى سويلەتكەن ءوڭىر باسشىسى ەل ۇكىمەتى تاراپىنان بولىنگەن ءاربىر تيىن ەل يگىلىگى ءۇشىن جۇمسالىپ، جۇمىستاردىڭ ساپالى ءارى ۋاقتىلى ورىندالۋى باستى نازاردا بولاتىنىن جەتكىزدى.

تۇركىستان وبلىستىق ءماسليحاتىنىڭ 38-ءشى سەسسياسىنىڭ كۇن تاربىبىندە ءتۇرلى سالالار قامتىلعان 19 ماسەلە تالقىلانىپ، ماڭىزدى شەشىمدەر قابىلداندى.

سوڭعى جاڭالىقتار