13 ماۋسىم, 17:09 509 0 ىشكى ساياسات TURKYSTAN.KZ

تاكير بالىقباەۆ: حالىقتىڭ قامى – بولاشاقتىڭ قامى

9 ماۋسىمدا وتكەن پرەزيدەنت سايلاۋى قازاقستان حالقىنىڭ ۇيىمشىلدىعىن، بىرتۇتاستىعىن كورسەتۋمەن بىرگە ەلىمىزدە قانات جايىپ كەلە جاتقان دەموكراتيالىق ۇدەرىستىڭ جارقىن كورىنىسى بولدى.

سايلاۋدا ايقىن باسىمدىلىقپەن جەڭىسكە جەتكەن قاسىم-جومارت توقاەۆ ەل تىزگىگىن ۇستادى. حالىقتىڭ بۇل تاڭداۋى بەكەر ەمەس. قاسىم-جومارت كەمەلۇلى كورنەكتى مەملەكەت قايراتكەرى، دارىندى ديپلومات، تۇڭعىش پرەزيدەنت – ەلباسىمەن بىرگە قازاقستاننىڭ تاۋەلسىزدىگىن نىعايتۋعا، جاس مەملەكەتىمىزدىڭ قالىپتاسىپ، نىعايۋىنا، قازاق ەلىنىڭ حالىقارالىق قاۋىمداستىقتا كەڭىنەن تانىلۋىنا، ابىروي-بەدەلىنىڭ ارتۋىنا ولشەۋسىز ۇلەس قوسقان مەملەكەتتىك تۇلعا رەتىندە حالىقتىڭ قالاۋلىسىنا اينالعان ازامات.

قاسىم-جومارت توقاەۆ ءوزىنىڭ سايلاۋالدى باعدارلاماسىندا نەگىزگى ماقسات-مۇراتى ساباقتاستىق، ادىلدىك، ورلەۋ ەكەنىن اتاپ كورسەتكەن بولاتىن. ساباقتاستىق دەگەن ول تۇڭعىش پرەزيدەنت – ەلباسىنىڭ سىننان وتكەن ستراتەگيالىق باعىتىنىڭ ساباقتاستىعىن قامتاماسىز ەتۋمەن سيپاتتالادى. مۇندا قوعامنىڭ بىرلىگىن ساقتاۋ، ەل ازاماتتارىنىڭ تۇرمىس ساپاسىن ارتتىرۋعا ارنالعان بارلىق الەۋمەتتىك باعدارلامالاردى مۇلتىكسىز جۇزەگە اسىرۋ، ولاردى ءارى قاراي دامىتۋ، تۇراقتى ەكونوميكالىق ءوسىم ارقىلى جەتىستىكتەرىمىزدى ەسەلەۋ، ەلباسىنىڭ بەس ينستيتۋتسيونالدى رەفورماسىن – ۇلت جوسپارىن جۇزەگە اسىرۋ ەكەنىن ق.توقاەۆ ەرەكشە اتاپ كورسەتكەن ەدى. سونداي-اق ول ادىلدىككە نەگىزدەلگەن ادىلەتتى قوعام ورناتۋ، ونىڭ ىشىندە: زاڭ ۇستەمدىگى مەن ءادىل سوت تورەلىگىن، قوعامدىق قاۋىپسىزدىكتى قامتاماسىز ەتۋدى، جەمقورلىقتى ءتۇپ-تامىرىمەن جويۋدى، ءتيىمدى الەۋمەتتىك قامسىزداندىرۋ جۇيەسىن قۇرۋدى، دەنى ساۋ، ءبىلىمدى ۇرپاق قالىپتاستىرۋدى، حالىقتى جۇمىسپەن قامتۋدى ماقسات ەتىپ قويعان بولاتىن. ال «ورلەۋ» باعىتى بويىنشا: قارقىندى ەكونوميكا قۇرۋ، اۋقاتتى جانە زاماناۋي اۋىل قالىپتاستىرۋ، ءتيىمدى قارجى جۇيەسىن، جوعارى ساناتتى ينفراقۇرىلىم، تۇرعىلىقتى حالىقتى قولجەتىمدى باسپانامەن قامتاماسىز ەتۋ سياقتى ماڭىزدى مىندەتتەردى بەلگىلەگەنى ءمالىم.

12 ماۋسىمدا اسەم استانامىز – نۇر-سۇلتان قالاسىندا وتكەن ۇلىقتاۋ راسىمىندە سويلەگەن سوزىندە پرەزيدەنت قاسىم-جومارت توقاەۆ وسى ايتىلعان مىندەتتەردى ودان ءارى تياناقتاي ءتۇستى. ەڭ باستىسى، مەملەكەت باسشىسى ەلىمىزدە ادىلەتتى قوعام ورناتۋ، حالىقپەن ساناسا جۇمىس ىستەپ، ولاردىڭ

الەۋمەتتىك-تۇرمىستىق جاعدايلارىن جاقسارتۋدى باستى نىسانا ەتىپ الۋى ادامداردىڭ ويىنان شىعىپ، بولاشاققا دەگەن سەنىمدەرىن نىعايتا ءتۇستى. حالىقتى بۇگىنگى تاڭدا تولعاندىرىپ وتىرعان اسا ماڭىزدى ماسەلەلەردى سارالاي كەلىپ، ق.توقاەۆ الداعى ۋاقىتتا باسا ءمان بەرىلەتىن ون ءتۇرلى باعىتقا توقتالدى. ونىڭ ءبىرىنشىسى حالىقتىڭ تابىسىن ارتتىرۋعا اكەلىپ سايادى. پرەزيدەنت بۇل ماسەلەنى تۇراقتى جانە قارقىندى ەكونوميكالىق ءوسىم ارقىلى عانا شەشۋگە بولاتىنىن ەسكەرتتى. وسى ارقىلى ازاماتتارىمىز ءوز ەلىندە الاڭسىز ءومىر ءسۇرىپ، ۇرپاعىن تاربيەلەپ، جاراسىمدى ءومىر سۇرۋگە ءتيىس.

پرەزيدەنت ۇسىنعان ەكىنشى باعىت-سىبايلاس جەمقورلىقتى جويۋ. جەمقورلىق – قوعامداعى ءوزارا سەنىمگە، مەملەكەتىمىزدىڭ قاۋىپسىزدىگىنە، دامۋىنا قاتەر توندىرەتىن قۇبىلىس. سوندىقتان پرەزيدەنتىمىزدىڭ جەمقورلىقتىڭ دەڭگەيىن تومەندەتۋگە باعىتتالعان رەفورمالار توپتاماسىن دايىنداۋ جانە جۇزەگە اسىرۋ جونىندەگى باستاماسى دا حالىقتىڭ كوكەيىنەن شىقتى دەپ ويلايمىن.

مەملەكەت باسشىسىنىڭ باسا كوڭىل ءبولىپ وتىرعان باعىتتارىنىڭ ءۇشىنشىسى – سوت جانە قۇقىقتىق قورعاۋ جۇيەسىن رەفورمالاۋ ماسەلەسى. سوت جۇيەسىنىڭ ادىلدىگىنە كوپشىلىكتىڭ سەنىمى كەمىپ تۇرعان قازىرگى تاڭدا بۇل دا كوپشىلىكتىڭ كوكەيىندە تۇرعان سۇراقتاردىڭ ءبىرى. پرەزيدەنتتىڭ: «سوت – ادىلدىكتىڭ سوڭعى شەگى بولۋى ءتيىس. قۇقىقتىق قورعاۋ جۇيەسىنىڭ باستى مىندەتى – حالىقتىڭ سەنىمىنە يە بولۋ»، -- دەگەنى سوندىقتان.

ەلىمىزدە جۇمىسسىزدار سانىنىڭ ازايماي تۇرعانى، ايلىق جالاقىنىڭ ماردىمسىزدىعى كۇردەلى الەۋمەتتىك ماسەلەلەردىڭ ءبىرى ەكەنى بەلگىلى. مىنە، بۇل ماسەلەگە بايلانىستى شارالار قولدانۋ جونىندە پرەزيدەنت جاڭا جۇمىس ورىندارىن اشۋ جانە حالىقتى لايىقتى جالاقىمەن قامتۋ تۋرالى وي قوزعايتىن ءتورتىنشى باعىتىندا ايتتى. سونىمەن بىرگە بۇگىندە ازاماتتارىمىزدى تۇرعىن ءۇي ماسەلەسى دە قاتتى تولعاندىراتىنى انىق. ويتكەنى باسپانا باعاسىنىڭ قىمباتتىعى، قولجەتىمسىزدىگى جاستارىمىزدىڭ الاڭسىز ەڭبەك ەتىپ، ءومىر سۇرۋىنە كوپ قيىندىق كەلتىرىپ وتىرعانى بارشاعا ايان. بۇل ماسەلەگە دە جاڭا پرەزيدەنتتىڭ سەرگەك قاراۋى ەل جۇرەگىنە سەنىم ۇيالاتۋدا.

«ءبىز ادام كاپيتالىن دامىتۋ ساياساتىن جالعاستىرامىز، -- دەدى پرەزيدەنت ق.توقاەۆ. – بۇل باعىتتا، ەڭ الدىمەن، نە ىستەۋىمىز قاجەت؟ جاپپاي ءبىلىم بەرۋدى قولداۋ. بارلىق تۇرعىنعا ساپالى مەديتسينالىق قىزمەت كورسەتۋ... ءبىز مۇعالىمدەر مەن دارىگەرلەردىڭ مارتەبەسىن كوتەرەتىن جاڭا زاڭدار قابىلدايمىز. ولاردىڭ قۇقىعىن قورعاپ، ماتەريالدىق جاعدايلارىن جاقسارتۋ ءۇشىن ءتيىستى قولداۋ كورسەتەمىز». مىنە، بۇل دا پرەزيدەنتتىڭ ەلگە دەگەن جاناشىرلىعىنىڭ ءبىر مىسالى.

پرەزيدەنت ۇسىنعان كەلەسى باعىتتار وڭىرلەردى دامىتۋ، رۋحاني جاڭعىرۋ، سىرتقى ساياسات، جاستار ءىسى سياقتى ماڭىزدى ماسەلەلەردى قامتيدى. وسى باعدارلامانىڭ ءار جولىنان مەملەكەت باسشىسىنىڭ حالىققا دەگەن قامقورلىعى ايقىن سەزىلىپ وتىرعانىن بايقايمىز. جالپى، قاسىم-جومارت كەمەلۇلى ءوزىنىڭ پرەزيدەنتتىك قىزمەتىنە كىرىسكەن العاشقى كۇننەن ( 20 ناۋرىز 2019 ج.) باستاپ بيلىك پەن حالىق اراسىن جاقىنداتۋعا كوڭىل ءبولىپ كەلەدى. ونىڭ وبلىس اكىمدەرىنە الەۋمەتتىك جەلىلەرمەن جۇمىس ىستەۋدى ۇيرەنىپ، حالىقتىڭ ۇسىنىس-پىكىرلەرىنە سول ارقىلى ۋاقتىلى جاۋاپ بەرىپ وتىرۋدى تاپسىرعانى وسى ءسوزىمىزدىڭ دالەلى. ق.توقاەۆ سايلاۋ الدىنداعى كەزدەسۋلەرىندە دە ەل باسشىلارىن حالىقپەن بىرگە جۇمىس ىستەۋگە شاقىرعانى بەلگىلى. ال ەندى پرەزيدەنتتىك ۇلىقتاۋ راسىمىندەگى سوزىنەن دە ونىڭ بۇقارامەن تىعىز بايلانىستا جۇمىس ىستەۋگە دەگەن ىنتا-ىقىلاسى ايقىن سەزىلىپ تۇر. بيلىك حالىققا جاقىنداعان سايىن ەلدىڭ دە كوڭىل-كۇيى كوتەرىلىپ، بەرەكەسى ارتا تۇسەتىنى ءسوزسىز. جاڭا باسشىنىڭ العاشقى قادامىنىڭ وزىنەن-اق ەل بولاشاعىنىڭ شۇعىلالى كوكجيەگى كورىنىس بەرگەندەي. ۇزاعىنان ءسۇيىندىرسىن.

تاكير بالىقباەۆ،

اباي اتىنداعى قازۇپۋ رەكتورى، پروفەسسور

سوڭعى جاڭالىقتار