13 ماۋسىم, 15:42 396 0 نۇر وتان Turkystan Support

جاستار پرەزيدەنت باعدارلاماسىن قولدايدى

مەملەكەت باسشىسى قاسىم-جومارت توقاەۆتىڭ سايلاۋالدى باعدارلاماسىندا اتالعان مىندەتتەردى جۇزەگە اسىرۋ تەتىكتەرىن تالقىلاۋ ماقساتىندا «جاس وتان» جاستار قاناتى رەسپۋبليكالىق جاستار ۇيىمدارىنىڭ باسشىلارى مەن جاستار ساياساتىنداعى بەلسەندىلەر باس قوستى.

باسقوسۋعا پارتيا كانديداتىنىڭ ناسيحات جۇمىستارىن جۇرگىزگەن رەسپۋبليكالىق قوعامدىق شتاب جانىنان قۇرىلعان TEAM QAZAQSTAN جاستار توبىنىڭ مۇشەلەرى قاتىسىپ، وي-پىكىرلەرىمەن ءبولىستى. شارانىڭ شىمىلدىعىن اشقان «جاس وتان» جاستار قاناتىنىڭ توراعاسى داۋلەت كارىبەك ەڭ الدىمەن جاستاردى پارتيا كانديداتى قاسىم-جومارت توقاەۆتىڭ پرەزيدەنت سايلاۋىنداعى جەڭىسىمەن قۇتتىقتادى. «بۇگىنگى باسقوسۋ ارقىلى جاستار مەملەكەتتىك ورگانداردان نۇسقاۋ كۇتپەستەن، ءوز بولاشاعىن قۇرۋعا بەلسەندى ارالاسۋعا قابىلەتتى ەكەنىن كورسەتكىمىز كەلەدى»، – دەپ اتاپ ءوتتى توراعا.

ءوز سوزىندە داۋلەت كارىبەك قاسىم-جومارت توقاەۆتىڭ 300 جاستى ىرىكتەپ، پرەزيدەنتتىڭ كادرلىق رەزەرۆىن قۇرۋ تۋرالى ۇسىنىسىنىڭ ارتىقشىلىعىنا توقتالدى. پرەزيدەنتتىڭ وسى ۇسىنىسىنان كەيىن ءارتۇرلى جاستار ۇيىمدارىنىڭ وكىلدەرى حابارلاسىپ، كادرلىق رەزەرۆكە قالاي وتۋگە بولاتىنىن سۇراپ جاتقانىن تىلگە تيەك ەتتى. داۋلەت كارىبەك كانديداتتارعا قانداي تالاپتار قويىلاتىنى ءالى بەكىتىلمەگەنىن، بىراق بۇل باعىتتا جاستار اتىنان ۇسىنىس جاساۋعا بولاتىنىن جەتكىزدى.

بۇل ماسەلەگە قاتىستى «بولاشاق» قاۋىمداستىعىنىڭ اتقارۋشى ديرەكتورى لاۋرا دەمەسىنوۆا كادرلىق رەزەرۆكە «بولاشاق» باعدارلاماسىمەن شەتەلدە ءبىلىم الىپ كەلگەن جاستاردى تارتۋدىڭ ماڭىزدىلىعىن ايتا كەلە، بۇل ءۇشىن جاستار ۇعىمىنىڭ اياسىن كەڭەيتىپ، 35 جاسقا دەيىنگى ازاماتتاردىڭ دا باق سىناۋىنا مۇمكىندىك جاساۋ قاجەت دەگەن ۇسىنىسىن جەتكىزدى. لاۋرا دەمەسىنوۆانىڭ سوزىنشە، مەملەكەت قارجىسىنا حالىقارالىق ۇزدىك ءبىلىم مەن تاجىريبە الىپ كەلگەن جاس مامان مەملەكەتتىڭ دامۋىنا ۇلكەن ۇلەس قوسا الادى.

جيىنعا قاتىسۋشىلار اراسىندا جەمقورلىق فاكتىلەرىن قىسقارتۋ ءۇشىن كادرلىق رەزەرۆكە وتۋگە ۇمىتتىلەردى جەمقورلىققا قارسى سىناقتان وتكىزۋ كەرەك دەگەن پىكىر ايتقاندار دا بار. بۇل رەتتە «جاس عالىمدار» اليانسىنىڭ ءتورايىمى ءاسيا ەرمۇحامەتوۆا عىلىمدى قولداۋعا بولىنەتىن 3 ملرد تەڭگەنىڭ يگەرىلۋى جايىندا ءسوز قوزعادى. «بيىل 23 قاڭتاردا ەلباسى نۇرسۇلتان نازارباەۆ ۇكىمەتكە جاس عالىمداردىڭ ىرگەلى جانە قولدانبالى زەرتتەۋلەرىن گرانتتىق قارجىلاندىرۋدى جىل سايىن 3 ملرد تەڭگەگە ۇلعايتۋدى تاپسىردى. سونىمەن قاتار جاستار جىلى اياسىندا جاس عالىمداردىڭ الەۋەتىن ارتتىرۋ ماقساتىندا ولارعا جان-جاقتى قولداۋ كورسەتىلەتىنى ايتىلدى. بىراق بۇل مالىمدەمەدەن بەرى جارتى جىل ءوتتى. قازىر كونكۋرستىق قۇجاتتامانى دايىنداۋ بويىنشا جۇمىستار ءجۇرىپ جاتىر. بۇل بايقاۋدىڭ جاريالانۋىن اسىعا كۇتەمىز»، – دەدى ءاسيا ەرمۇحامەتوۆا.

جيىن سوڭىندا بەلسەندى ازاماتتار جاستاردىڭ دامۋىنا ىقپال ەتەتىن جوبالاردى قولعا الۋ قاجەتتىگىن ايتىپ، تارقاستى.

سوڭعى جاڭالىقتار