13 ماۋسىم 2019, 15:27 804 0 وقشانتاي Turkystan Support

داستۇرلەر ساباقتاستىعىنىڭ جەڭىسى

«Nur Otan» پارتياسىنىڭ الماتى قالالىق فيليالىندا ايماقتىق «ميراس» قوعامدىق كەڭەسىنىڭ كەڭەيتىلگەن وتىرىسى ءوتتى. قوعامدىق كەڭەس مۇشەلەرى، مادەنيەت، عىلىم وكىلدەرى جانە قوعام قايراتكەرلەرىنىڭ قاتىسۋىمەن وتكەن جيىن ەلىمىزدەگى پرەزيدەنت سايلاۋىنىڭ قورىتىندىسىنا ارنالدى.
كەڭەيتىلگەن وتىرىسقا جەتەكشىلىك ەتكەن «ميراس» قوعامدىق كەڭەسىنىڭ توراعاسى ءۋاليحان قاليجان پرەزيدەنت سايلاۋىنىڭ ءادىل ءارى اشىق وتكەنىن ايتا كەلە، بۇل سايلاۋدىڭ ەلىمىز ءۇشىن ماڭىزدى ءارى باتىل قادام بولعانىنا توقتالدى. «ورتالىق سايلاۋ كوميسسياسىنىڭ حابارلاۋىنشا، سايلاۋدا قاسىم-جومارت توقاەۆ 70,96 پايىز جيناپ، جەڭىسكە جەتتى. سايلاۋ ناتيجەسى بيلىك تۇراقتىلىعىنىڭ دەڭگەيىن، دەموكراتيالىق ينستيتۋتتاردىڭ كۇشىن، ەلدىڭ ساياسي مادەنيەتى مەن ازاماتتاردىڭ بىرلىگىن انىق كورسەتتى. بۇل ەلىمىزدىڭ ارى قارايعى قارقىندى دامۋى ءۇشىن جاسالعان اسا ماڭىزدى قادام بولدى. بۇل كورسەتكىشكە جەتۋ ءۇشىن جاي عانا تانىمالدىق از. قاسىم-جومارت توقاەۆتى جاقسى بىلەمىن، 1990 جىلداردىڭ باسىندا ۇكىمەتتە ءارتۇرلى مينيسترلىكتە قاناتتاسا ەڭبەك ەتتىك. ول ءبىر سىندارلى ساتتەر ەدى. ەلباسىمىزدىڭ ەڭ سەنىمدى سەرىگى رەتىندە قاسىم-جومارت كەمەلۇلى تاۋەلسىزدىك جىلدارى قازاقستاننىڭ قالىپتاسۋى مەن دامۋىنا ەرەكشە ەڭبەك ءسىڭىردى. سىرتقى ىستەر ءمينيسترى، پرەمەر-مينيستر، بىرىككەن ۇلتتار ۇيىمى باس حاتشىسىنىڭ ورىنباسارى، سەنات توراعاسى سياقتى جوعارى لاۋازىمدى قىزمەتتەردە، ديپلوماتيالىق سالادا حالىقارالىق دەڭگەيدە تانىلدى. ءوزىنىڭ بىلىمىمەن، بىلىكتىلىگىمەن، جارقىن ىستەرىمەن تۋعان ەلىن دە تانىتا ءبىلدى. سول ەڭبەگىن لايىقتى باعالاپ، نۇرسۇلتان نازارباەۆ ۇلكەن سەنىم ارتىپ، ءوز شاكىرتىنە ەل تىزگىنىن سەنىپ تاپسىردى. ەندى، مىنە، قاسىم-جومارت توقاەۆ قازاقستاندىقتاردىڭ تاعدىرى مەن بولاشاعى سىنعا تۇسكەن كەشەگى سايلاۋدا زور جەڭىسكە جەتىپ، ەلباسىنىڭ دا، ەلىنىڭ دە سەنىمىن اقتادى. ابىروي بيىگىنەن كورىندى. حالىق ءسوز قادىرىن بىلەتىن پەرزەنتىن قولدادى. ءسوز قادىرىن بىلەتىن جان دەپ وتىرعانىم – ونىڭ اكەسى كەمەل توقاەۆ ۇلكەن جازۋشى ەدى. توقاەۆ ءوز تۇعىرناماسىندا «مەنىڭ ماقساتىم – قازاقستاندىقتاردىڭ ءومىر ءسۇرۋ ساپاسىن جاقسارتىپ، تابىسىن ارتتىرۋ» دەپ تۇڭعىش پرەزيدەنت، ەلباسىنىڭ باعىتىن ارى قاراي جالعاستىراتىنىن اتاپ ءوتتى. ەندەشە بۇل – ەلباسى قالىپتاستىرعان ۇلى جەتىستىكتەرى مەن داستۇرلەر ساباقتاستىعىنىڭ جەڭىسى»، – دەپ اتاپ ءوتتى ءۋاليحان قاليجان.

ال «Nur Otan» پارتياسى الماتى قالالىق فيليالى توراعاسىنىڭ ورىنباسارى ارمان حالبەكوۆ 6,5 ميلليوننان استام سايلاۋشىنىڭ داۋىسىنا يە بولۋدىڭ ءوزى ۇلكەن جەتىستىك ەكەنىنە توقتالدى. «قاسىم-جومارت توقاەۆتىڭ «ساباقتاستىق. ادىلدىك. ورلەۋ» دەپ اتالاتىن تۇعىرناماسى بارشا حالىقتىڭ كوڭىلىنەن شىقتى. وندا تۇراقتىلىقتى ساقتاۋ، ەلدى دامىتۋ، مىقتى الەۋمەتتىك ساياسات، كوپبالالى وتباسىلار مەن جاستاردى قولداۋ قامتىلدى.وسى سايلاۋدى قازاقستان كەيبىر مەملەكەتتەر ون جىلدا وتەتىن ساياسي مادەنيەتتىڭ جوعارىلاۋ پروتسەسىنەن ءوتتى دەپ ايتۋعا نەگىز بار. جانە بۇل جولعى سايلاۋ بۇرىنعى سايلاۋلارعا قاراعاندا ەرەكشە بولدى. قانداي ەرەكشەلىك؟ ول – كوپ كانديداتتىڭ تىركەلۋى. وزدەرىڭىز بىلەتىندەي، قوعامعا تانىمال 7 كانديدات تا ءوز باعدارلاماسىن جاريالاپ، تەڭ قۇقىلى تۇردە سايلاۋالدى جۇمىستارىن جۇرگىزدى. سايلاۋالدى كەزەڭنىڭ جاۋاپتىلىعى مەن سالماعى ەرەكشە بولاتىنىن بىلەسىزدەر. Nur Otan پارتياسىنىڭ قالالىق شتابتارىنداعى 170 ادام مەن 1 500-گە جۋىق سەنىمدى وكىلىمىزبەن بىرگە، بىرقاتار جۇيەلى جۇمىس جۇرگىزدىك. عىلىم مەن مادەنيەتتىڭ، بيزنەس پەن جاستاردىڭ قالاسى بولعاندىقتان، الماتىدا 500-دەن اسا ءتۇرلى شارا وتكىزىلدى. كەزدەسۋلەرگە بارلىق سالانىڭ ەڭبەك ۇجىمى بەلسەندىلىكپەن قاتىستى»، – دەپ قورىتىندىلادى ءسوزىن ارمان حالبەكوۆ.

 

قانىبەك جۇماشەۆ، «Nur Otan» پارتياسىنىڭ حاتشىسى:

الەۋمەتتىك جاعدايعا باسا كوڭىل بولمەك

– قاسىم-جومارت توقاەۆ حالىقتىڭ الەۋمەتتىك تۇرمىسىن جاقسارتۋ ماقساتىندا بارشانىڭ يگىلىگى ءۇشىن باعدارلاما ۇسىندى. ادىلدىك، ورلەۋ، دامۋدىڭ ءۇش تاعانىن تىرەك ەتكەن جوبانىڭ بولاشاعى زور دەپ ايتار ەدىم. باعدارلاما اياسىندا «بىرگە» اياتسياسى شەڭبەرىندە حالىقتىڭ جاپپاي ۇسىنىس-پىكىرى جيناقتالدى. بۇگىندە 530 مىڭعا جۋىق ءوتىنىش كەلىپ ءتۇستى. 1 500 000-نان استام ادام ۇسىنىس-پىكىر ايتتى. ەڭ ءبىرىنشى الەۋمەتتىك ماسەلەلەر، الەۋمەتتىك قامسىزداندىرۋعا ەرەكشە جاعداي كوڭىل بولىنەدى. جاستاردى جۇمىسپەن قامتۋ، ءبىلىم سالاسىنا بايلانىستى تۇيتكىلدى ماسەلەلەردى شەشۋ جايىندا ۇسىنىستار كوپتەپ ءتۇستى. قاسىم-جومارت توقاەۆ از قامتىلعان، كوپبالالى وتباسىلار باسپانا سالۋ، از قامتىلعان جانە كوپبالالى وتباسىلارعا، مۇمكىندىگى شەكتەۋلى ادامدارعا، بارلىق ساناتتاعى مۇقتاج ادامدارعا بەرىلەتىن الەۋمەتتىك كومەكتىڭ اۋقىمى كوبەيەتىنىن ايتقان بولاتىن. سونداي-اق مۇمكىندىگى شەكتەۋلى ادامدارعا الەۋمەتتىك كومەك قولجەتىمدى بولادى.

قاسىم-جومارت توقاەۆتىڭ سايلاۋدا 70 پايىزدان استام داۋىس جيناۋى – ۇلكەن جەتىستىك، ناتيجەلى ەڭبەكتىڭ جەمىسى. ايماقتاردا ءبىلىم بەرۋ، دەنساۋلىق ساقتاۋ، وڭىرلەردىڭ عىلىمي  الەۋەتىن دامىتۋ ءۇشىن كوپ جۇمىس اتقارىلۋدا. شتاب مۇشەلەرى حالىقپەن جۇزدەسۋدە ەلباسى تاپسىرمالارىنىڭ ارى قاراي جالعاساتىنىن جەتكىزدى.

قاسىم-جومارت كەمەلۇلى – مەملەكەتتىك قىزمەتتە جوعارى لاۋازىمداردا ۇزاق جىلدار جۇمىس ىستەگەن تاجىريبەلى ساياساتكەر. ءبىلىم مەن عىلىم، الەۋمەتتىك، ەكونوميكالىق ماسەلەلەردى جاقسى بىلەدى.

«ساباقتاستىق. ادىلدىك. ورلەۋ» تۇعىرناماسى قولدانىستاعى باعدارلامالاردى ارى قاراي جالعاستىرادى. حالىقتى قولجەتىمدى تۇرعىن ۇيمەن قامتاماسىز ەتۋ ءۇشىن قازىرگى بار باعدارلامالاردى تۇرعىن-ءۇي قۇرىلىسىنىڭ بىرىڭعاي ساياساتىنا بىرىكتىرۋ جوسپاردا بار. سونىمەن بىرگە، جۇمىسسىزدىق جويىلىپ، ەڭبەكاقى كوتەرىلەدى. «اكتسيا» اياسىندا ايتىلعان ۇسىنىستار تالدانىپ، جۇزەگە اسادى.

 

 

دارحان مىڭباي، قر پارلامەنت ءماجىلىسىنىڭ دەپۋتاتى، «Nur Otan»

پارتياسى فراكتسياسىنىڭ مۇشەسى:

پرەزيدەنت ادىلەتتىلىك، ادالدىق ۇعىمدارىنا ەرەكشە توقتالدى

بىرىنشىدەن، سايلاۋ ءوتتى. حالىققا سالسا دا، قالىپقا سالسا دا «Nur Otan» پارتياسى ءوز بيىگىنەن كورىندى. حالىققا سالسا دەپ وتىرعانىم، جالپى وسى حالىقتىڭ مۇددەسىمەن، وسى كوپشىلىكتىڭ ماسەلەسىمەن اينالىساتىن پارتيا. سوندىقتان «Nur Otan» پارتياسىنىڭ جەڭىسى – بۇكىل حالىقتىڭ جەڭىسى دەگەندى كوپشىلىكتىڭ كوكەيىندەگى ماسەلەلەر ەندى دۇرىس شەشىم تابادى دەگەن سەنىممەن ايتىپ جاتىرمىز. مىنە، وسى ءۇشىن سايلاۋدا ءبىز ءوز كانديداتىمىزعا داۋىس بەردىك.

بۇگىنگى ۇلىقتاۋ راسىمىندە قاسىم-جومارت كەمەلۇلى «ەلدىڭ مۇددەسىن قورعاۋ – مەنىڭ باستى ماقساتىم» دەپ ايتتى. ەلدىڭ مۇددەسى دەگەن ءسوز – قازاقستان ازاماتىنىڭ ارقايسىنىڭ مۇددەسى. سونىڭ ىشىندە «جاستاردى ساياسي كوزقاراستارى مەن ۇستانىمدارى بويىنشا بولۋگە جول بەرمەيمىن» دەپ ايتتى. بۇل وتە ماڭىزدى. «بولىنگەندى ءبورى جەيدى». ەلگە جانى اشيتىن پاتريوت ادام ءوزىنىڭ ساياسي نەمەسە باسقا دا ۇسىنىستارىن ەلدى بىرىكتىرۋگە باعىتتايدى. كۇنى كەشە سايلاۋدا ايقىن باسىمدىقپەن جەڭىسكە جەتكەننەن كەيىن دە، «ءتورت جارىم مىڭ ۇسىنىس كەپ ءتۇستى. بۇل ۇسىنىستاردىڭ بارلىعىن ساراپتاپ، ءار ۇسىنىسقا وتە مۇقيات قاراۋ كەرەك، بۇل باسقارۋ ورگاندارىنىڭ، اكىمشىلىكتەردىڭ، قوعامدىق ۇيىمداردىڭ ءبارىنىڭ مىندەتى. بۇلاردىڭ بارلىعىنا ءۇن قاتۋ، جاۋاپ بەرۋ كەرەك»، – دەدى پرەزيدەنت.

اسىرەسە، ادىلەتتىلىك ماسەلەسىن وتە قاتتى ايتىپ ءجۇر. ادىلەتتى الەۋمەتتىك ساياسات دەگەن بار. مىسالى، ريم يمپەرياسىنىڭ ءوزى نان جەتپەگەندىكتەن ەمەس، ناندى ءادىل بولمەگەندىكتەن قۇلاعانىن تاريحتان بىلەمىز. ادىلدىك، ادالدىق دەگەن ۇعىمدار بارلىق سالادا بولسىن دەگەندى دە قاداپ ايتتى. تاعى ءبىر قۋانارلىعى، ول كىسى «رۋحاني جاڭعىرۋ» باعدارلاماسىن نەگىزىنەن جاس ۇرپاقتى تاربيەلەۋگە ارناۋىمىز كەرەك دەپ وتىر. شىندىعىندا، وسى رۋحاني جاڭعىرۋدى داڭعازادان تازالاپ، جاستاردى تاربيەلەيتىن قۇرال رەتىندە پايدالانساق جاقسى بولار ەدى. مەملەكەت باسشىسىنىڭ وسى ماسەلەنى قاداپ ايتقانى مەنىڭ كوڭىلىمنەن شىقتى.

 

 

ىقىلاس قۋاندىق، «NUR OTAN» پارتياسى ستراتەگيالىق باستامالار ينستيتۋتىنىڭ اقپاراتتىق-ساراپتامالىق ءبولىمىنىڭ باس ساراپشىسى:

ەل دامۋىنىڭ جاڭا بەلەسى

اقپاراتتار اعىنى جاڭا بەلەسكە كوتەرىلگەن بۇگىنگى قاربالاس قوعامدا كەز كەلگەن ماسەلەنىڭ بارىنە ءجىتى كوڭىل ءبولۋ مۇمكىن ەمەس. سول سەبەپتەن دە مەملەكەتتىك ورگاندار ساياساتىن ۇدايى قوعامنىڭ تالاپ-تىلەگىنە سايكەس جۇرگىزە بەرمەيتىنى راس.

ءدال وسى تۇيتكىلدەرگە جاڭادان سايلانعان پرەزيدەنت قاسىم-جومارت توقاەۆ جاڭا قىرىنان كوڭىل ءبولدى. ول ۇلىقتاۋ راسىمىندە سويلەگەن سوزىندە قازاقستاننىڭ دامۋى جونىندەگى 10 باعىتتى ايقىنداپ بەردى.

قازاقستان پرەزيدەنتى قاسىم-جومارت توقاەۆ اۋەلى قوعام تاراپىنان الەۋمەتتىك-ەكونوميكالىق ماسەلەلەردى شەشۋ تۇرعىسىنداعى رەفورمالارعا قاتىستى ساۋالداردىڭ كوپ ەكەندىگىن تىلگە تيەك ەتتى.

ەكىنشىدەن، ول قوعامدا قوردالانىپ قالعان وزەكتى ماسەلەلەردى شەشۋ ءۇشىن بيلىك پەن قوعام اراسىندا ءوزارا بايلانىس ورناتىپ، ساياسي ديالوگتى جۇزەگە اسىرۋ كەرەكتىگىن ايتتى. سەبەبى قازىر مەملەكەتتىڭ ودان ءارى دامۋى ءۇشىن بيلىك پەن قوعام اراسىنداعى كوممۋنيكاتسيالىق قارىم-قاتىناستى رەتتەۋ ماڭىزدى. سوندىقتان پرەزيدەنت ق.توقاەۆ  قوعامدىق سەنىمنىڭ ۇلتتىق كەڭەسىن قۇرۋدى تاپسىردى. وعان قوعام وكىلدەرى، ونىڭ ىشىندە جاستار بەلسەندىلىك تانىتۋى ءتيىس.

مۇنىمەن قوسا، ق.توقاەۆ ەلىمىزدىڭ ەكونوميكالىق-الەۋمەتتىك دامۋىن قامتاماسىز ەتىپ جانە تۇيتكىلدى قىسقا مەرزىمدە شەشۋ ءۇشىن  جاڭا شەشىمدەر مەن جاڭا قادامدار قاجەتتىگىن باسا ايتتى.

دەمەك، وسى مالىمدەمە ازاماتتاردىڭ بەتپە-بەت كەلگەن ماسەلەسىنىڭ استارىنا تەرەڭ ءۇڭىلىپ جانە ونى جەدەل شەشۋ بارىسىندا  مەملەكەتتىڭ جاڭا باعىتتا دامۋىنىڭ كۋاسى بولماق. ءبىز جاقىن ارادا ەلىمىزدە ايتارلىقتاي وزگەرىستەر ورىن الىپ، ازاماتتىق قوعاممەن ارادا جاڭا قارىم-قاتىناستىڭ پايدا بولاتىنىنا سەنىم بىلدىرەمىز.

 

حالىق ءوز تاڭداۋىن جاسادى

بارشاعا بەلگىلى، ماۋسىمنىڭ 9-ى كۇنى ەلىمىزدە كەزەكتەن تىس پرەزيدەنت سايلاۋى وتكەن بولاتىن. وسىنداي تاريحي ماڭىزدى ساتتە حالىق بەلسەندىلىك تانىتىپ، ءوز تاڭداۋىن جاسادى. ەڭ باستىسى سايلاۋ ءادىل ءوتتى. سايىپ كەلگەندە، قاسىم-جومارت توقاەۆ باسقا ۇمىتكەرلەردەن باسىم ايقىندىقپەن جەڭىسكە جەتتى. بۇل – ەگەمەندى ەلدىڭ جەڭىسى!

سايلاۋدا باسىم داۋىسقا يە بولعان قاسىم-جومارت توقاەۆ قازاقستاندى كەزەكتى ءبىر بيىك بەلەسكە كوتەرەتىنىنە ەل ازاماتى رەتىندە سەنىم ارتامىن. سەبەبى قاسىم-جومارت كەمەلۇلى – ەلىمىزدىڭ ىشكى-سىرتقى ساياساتىن جاقسى بىلەتىن الەمدىك دارەجەدەگى ساياساتكەر.

 

 ازامات قۋانىشاليەۆ،

«Nur Otan» پارتياسى

باتىس قازاقستان وبلىستىق فيليالى ۇيىمداستىرۋ ءبولىمىنىڭ كونسۋلتانتى

 

 دۇرىس تاڭداۋ – جارقىن بولاشاق كەپىلى

9 ماۋسىمدا وتكەن قازاقستان رەسپۋبليكاسىنىڭ سايلاۋى – ەل تاريحىندا تايعا تاڭبا باسقانداي ماڭىزدى وقيعا. وعان ءبارىمىز كۋا بولدىق. ەلىمىز ءۇشىن ماڭىزدى سايلاۋ كۇنى حالىق ءوز ازاماتتىق پارىزدارىن ورىنداپ، دۇرىس تاڭداۋ جاساۋ ارقىلى، بولاشاققا قادام باسۋ جولىندا ءوز ۇلەستەرىن قوستى. قازاقستاندىقتار جارقىن بولاشاق، كەمەل كەلەشەك ءۇشىن ءوز تاڭداۋىن ءبىر كىسىدەي جاسادى. كەزەكتەن تىس پرەزيدەنت سايلاۋىندا قازاقستان ازاماتتارىنىڭ 77,5 پايىزى ءوز تاڭداۋىن جاسادى.

ورتالىق سايلاۋ كوميسسياسىنىڭ حابارلاۋىمەن سايلاۋشىلاردىڭ باسىم بولىگىنىڭ سەنىمىنە، ياعني 70,96 پايىزعا يە بولعان «Nur Otan» پارتياسى ۇسىنعان قاسىم-جومارت كەمەلۇلى توقاەۆ قازاقستان پرەزيدەنتى بولىپ سايلاندى. ەلباسىمىز «تاۋەلسىزدىككە قول جەتكىزۋ دە، ونى باياندى ەتۋ دە وڭاي ەمەس» دەپ ايتىپ كەتكەندەي وسى تاۋەلسىزدىگىمىزدىڭ تۇعىرلى، مەملەكەتىمىزدىڭ عۇمىرلى بولۋ جولىندا قاسىم-جومارت كەمەلۇلى ايانباي ەڭبەك ەتەتىنىنە سەنىمىز زور.

«ەلۋ جىلدا – ەل جاڭا» دەمەكشى، ءبىزدىڭ ەلىمىز جيىرما جىلدا كەرەمەت تابىستارعا جەتتى. ەلباسى وسى ءوزى باستاپ كەتكەن سارابدال ساياساتىمەن دارا جولىن جالعاستىرۋشى رەتىندە قاسىم-جومارت كەمەلۇلىنا ۇلكەن سەنىم ارتتى.

«قازاق السىرەسە – الاۋىزدىقتان السىرەگەن، كۇشەيسە – بىرلىكپەن كۇشەيگەن» دەپ، اششى بولسا دا، شىندىقتى ايتقان ەلباسى، بارلىعىمىزدى بىرلىككە، دوستىققا، ىنتىماققا شاقىرادى. ەگەر ءبىزدى السىرەتەتىن سىرتقى جانە ىشكى فاكتورلارعا بەرىلەتىن بولساق، قانشا توككەن ماڭداي تەرىمىز زايا كەتەدى. ەل بولىپ ءبىر جاعادان – باس، ءبىر جەڭنەن – قول شىعارا الاتىن بولساق قانا، قانداي دا بولماسىن فاكتورلار بىزگە اسەرىن تيگىزە المايتىنى ايدان انىق. كۇندەلىكتى بولىپ جاتقان سىرت ەلدەردەگى وقيعالاردى مىسال ەتۋگە بولادى، قانتوگىس، تۇراقسىزدىق سالدارىنان قانشاما ەلدەردىڭ قۇردىمعا كەتىپ بارا جاتقانىن كورىپ ءجۇرمىز. سوندىقتان، بارلىعىمىز ءبىر جىپتەن ۇستايتىن بولساق، ءالى تالاي بەلەستەردى، شىڭداردى باعىندىراتىنىمىزعا سەنىمدىمىن.

ەلىمىز تىنىش، حالقىمىز امان، تاۋەلسىزدىگىمىز باياندى بولسىن!

 

مالىك بەيسەنوۆ،

«Nur Otan» پارتياسى كوكسۋ اۋداندىق فيليالى

توراعاسىنىڭ ءبىرىنشى ورىنباسارى

 

ەندىگى مىندەت – ەل سەنىمىن اقتاۋ

پرەزيدەنت سايلاۋىنىڭ ناتيجەسى مەملەكەتتىك قىزمەتتەگى جاستاردىڭ كوڭىلىنەن شىقتى. بۇل سايلاۋدان ءبىزدىڭ ەل ەرتەڭىنە دەگەن جاۋاپكەرشىلىگىن سەزىنە بىلەتىن ءبىرتۇتاس ۇلت ەكەنىمىزدى كوردىك. قازاقستاندى بۇدان دا قۋاتتى مەملەكەتكە اينالدىرۋ نيەتى ءبارىمىزدى سايلاۋدا بىرىكتىردى. ەلدىڭ ارقاسىندا، ەلدىڭ بەرگەن داۋىسىنىڭ ارقاسىندا قاسىم-جومارت توقاەۆ 70,96 پايىز داۋىس جيناپ، جەڭىسكە جەتتى. سايلاۋ جەڭىمپازىنىڭ ەندىگى مىندەتى – ەل ارتقان سەنىمدى اقتاۋ. بۇل تاڭداۋ – ءاربىر ازاماتتىڭ جەكە تاڭداۋى عانا ەمەس، بولاشاق الدىنداعى جاۋاپكەرشىلىگى. ەندىگى مىندەت – وسى ەلدىڭ سەنىمىن اقتاۋ.

قوعامداعى كەلىسىم مەن تۇراقتىلىقتى كوزىمىزدىڭ قاراشىعىنداي ساقتاعاندا عانا بارشا ازاماتتارىمىزدىڭ ءومىرى جاقسارادى. كەشەدەن بەرى وسى سايلاۋعا سىرت كوز بولىپ باعا بەرگەن حالىقارالىق بايقاۋشىلار ونىڭ بارلىق ستاندارت پەن نورماعا ساي وتكەنىن ايتىپ جاتىر. ال مەن بۇل سايلاۋدى بۇلىكتەن گورى بىرلىكتى جوعارى قويعان ەل تاڭداۋى بولدى دەپ اتار ەدىم.

 

داۋلەت كارىبەك،

«جاس وتان» جاستار قاناتىنىڭ توراعاسى

ساياسي ساباقتاستىق – ەل ەرتەڭى ءۇشىن

كەشە قر پرەزيدەنتى قاسىم-جومارت توقاەۆتىڭ ءوز قىزمەتىنە رەسمي كىرىسۋ سالتاناتتى شاراسى بولىپ ءوتتى. بۇل ساياسي ناۋقاندا ءبىزدىڭ جەتىسۋلىق پارتيالاستارىمىز، بارىنشا بەلسەندىلىك تانىتىپ، اۋقىمدى جۇمىس اتقاردى. بۇل جەتىسۋلىقتاردىڭ قاسىم-جومارت كەمەلۇلىنا كورسەتكەن ۇلكەن قولداۋلارى.

ال ەندىگى كەزەكتە ەل باسقارۋعا كىرىسكەن قاسىم-جومارت كەمەلۇلىنا ساتتىلىك تىلەي وتىرىپ، ەلىمىزدىڭ دامۋى ءۇشىن تەك العا قادام باسۋ قاجەت دەپ سانايمىز. مەملەكەتتىمىزدىڭ بولاشاعى جارقىن بولارىنا سەنىم ارتامىن. ەلدىڭ دامۋى ءۇشىن ەڭبەك ەتۋ – ءار قازاقستاندىق ءۇشىن ۇلكەن جاۋاپكەرشىلىك. سوندىقتان ءبىز ق.توقاەۆقا سەنىم بىلدىرە وتىرىپ، العا قويعان ماقسات-مىندەتتەرىن جۇمىلا جۇزەگە اسىرۋعا ءازىر ەكەنىمىزدى جەتكىزەمىز.

 

امانجول جازىقباەۆ،

 «Nur Otan» پارتياسى تالدىقورعان قالالىق فيليالى

توراعاسىنىڭ  ءبىرىنشى ورىنباسارى

 

ەل تاريحىنداعى جاڭا كەزەڭ

قر پرەزيدەنتى قاسىم-جومارت توقاەۆتىڭ ءوز قىزمەتىنە رەسمي كىرىسۋىمەن قۇتتىقتايمىن! ەلىمىزدىڭ ەرتەڭى جارقىن، كەلەشەگى كەمەل بولسىن! قازاقستانىمىز الەم الدىندا باسەكەگە قابىلەتتى، بەدەلى جوعارى بولا بەرسىن دەپ تىلەيمىن! حالقىمىزدىڭ جارقىن بولاشاعى ءۇشىن ءاربىر قازاقستاندىق ايانباي ەڭبەك ەتە بەرەيىك!

مەن ەلىمنىڭ كەمەل كەلەشەگى ءۇشىن قاسىم-جومارت كەمەلۇلى توقاەۆتىڭ كومانداسىندا جۇمىس ىستەۋگە ارقاشان دايىنمىن! ەلباسى نۇرسۇلتان نازارباەۆتىڭ ساياسي ساباقتاستىق باعىتى وتە دۇرىس جانە ەلىنىڭ ەرتەڭى ءۇشىن دۇرىس شەشىم قابىلدادى دەپ وي بىلدىرەمىن. كوك تۋىمىزدى ارقاشان كوكتە كوتەرىپ جۇرەيىك!

عازيز امانجولۇلى،

«Nur Otan»  پارتياسى  تالدىقورعان قالالىق  فيليالىنىڭ كەڭەسشىسى

 

بۇل – حالىقتىڭ جەڭىسى

ەلىمىزدىڭ كونستيتۋتسياسىنا سايكەس قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋى بارلىق زاڭ تالاپتارىنا ساي ءوتتى. سايلاۋ اشىق ءارى ءادىل بولدى دەپ تولىقتاي ايتا الامىن. بارلىق شارالار جوعارى دەڭگەيدە ۇيىمداستىرىلعان. مەن ادامداردىڭ ايانباي ەڭبەك ەتكەنىن كوردىم، سايلاۋشىلاردىڭ كوپتەپ كەلگەنىن، ءارى بەلسەندىلىك تانىتقانىن بايقادىم. اسىرەسە، ەل كەلەشەگى سانالاتىن جاستاردىڭ بۇل سايلاۋعا بەلسەنە اتسالىستى. بۇل – جاستاردىڭ ەرتەڭگى كۇنگە جاۋاپكەرشىلىكپەن قاراپ، مەملەكەت باسشىسى رەتىندە قاسىم-جومارت كەمەلۇلىنا سەنىم ارتتى دەگەن ءسوز. حالىق ءوز تاڭداۋلارىن جاسادى. سايلاۋداعى بۇل جەڭىس – بۇكىل قازاق حالقىنىڭ جەڭىسى.

ازات ساعاتوۆ،

«Nur Otan» پارتياسى باتىس قازاقستان وبلىستىق

فيليالى  ساياسي جۇمىس ءبولىمىنىڭ كونسۋلتانتى

 

سوڭعى جاڭالىقتار