13 ماۋسىم, 14:57 460 0 ىشكى ساياسات اسەل انۋاربەك

قاسىم-جومارت توقاەۆ: ءار ازاماتتىڭ مۇددەسىن قورعاۋ - باستى ماقساتىم

12 ماۋسىم، 2019 جىل. نۇر-سۇلتان قالاسىنداعى تاۋەلسىزدىك سارايىندا ەلىمىز ءۇشىن ماڭىزدى شارا – پرەزيدەنتتى ۇلىقتاۋ ءراسىمى ءوتتى. جاڭا سايلانعان مەملەكەت باسشىسى قاسىم-جومارت توقاەۆ قازاقستان حالقىنا انت بەرىپ، قازاقستان رەسپۋبليكاسى پرەزيدەنتىنىڭ كۋالىگىن قولىنا الدى.

مەملەكەت باسشىسى قاسىم-جومارت توقاەۆ قر پرەزيدەنتىن ۇلىقتاۋ راسىمىندە ءسوز سويلەپ، بىرقاتار ساياسي-الەۋمەتتىك ءھام ەكونوميكالىق ماسەلەلەرگە توقتالدى. قاسىم-جومارت كەمەلۇلى ەڭ الدىمەن وزىنە سەنىم ارتىپ، قولداۋ كورسەتكەن قازاقستاندىقتارعا ريزاشىلىعىن جەتكىزدى. ەلدىڭ تاتۋلىعى مەن بىرلىگى – باستى قۇندىلىق ەكەنىنە توقتالعان قر پرەزيدەنتى ەل ازاماتتارىنىڭ مۇددەسىن قورعاۋدى قولعا الماق. «ەلىمىزدىڭ ءار ازاماتىنىڭ مۇددەسىن قورعاۋ – مەنىڭ باستى ماقساتىم. ولاردى ساياسي كوزقاراستارى مەن ۇستانىمدارىنا قاراي بولۋگە جول بەرمەيمىن! ءتۇرلى ساياسي جانە قوعام قايراتكەرلەرىنەن كەلىپ تۇسكەن قۇندى ۇسىنىستاردى، باستامالاردى ءوز جۇمىسىمدا مىندەتتى تۇردە ەسكەرەمىن. اشىق جانە ءادىل جۇمىس ىستەيمىز. ءبىز ءۇشىن ەڭ ماڭىزدى مىندەت – زاڭعا ساي ادال قىزمەت ەتۋ. ءبىزدىڭ ءبىر عانا وتانىمىز بار! تاعدىرىمىز – ءبىر! ءبىز حالقىمىزدىڭ جارقىن بولاشاعى ءۇشىن ءبارىمىز بىرگە ەڭبەك ەتەمىز»، – دەدى قاسىم-جومارت توقاەۆ.

ودان ءارى مەملەكەت باسشىسى قازاقستاننىڭ تۇڭعىش پرەزيدەنتى، ەلباسى نۇرسۇلتان نازارباەۆتىڭ ەل دامۋىنا سىڭىرگەن وراسان زور ەڭبەگىنە توقتالدى. «نۇرسۇلتان ءابىشۇلى نازارباەۆ بۇكىل الەم مويىنداعان دامۋ مودەلىن جاسادى. قازاقستاننىڭ كوك تۋىن دۇنيە ءجۇزىنىڭ تۇكپىر-تۇكپىرىندە جەلبىرەتتى. وسى كۇندەرى مەنىڭ اتىما ازاماتتارىمىزدان كوپتەگەن ءوتىنىش-تىلەكتەر كەلىپ تۇسۋدە. ولاردىڭ بارىنە ورتاق ءبىر عانا تىلەك بار: ەلباسىمىزدىڭ جولىن، ستراتەگياسىن ساقتاۋ جانە ونى ودان ءارى نىعايتۋ. شىن مانىندە، حالىقتىڭ ءدال وسىنداي ءوتىنىش-تىلەك ايتۋى زاڭدى، ورىندى. سەبەبى، قازىرگى دامىعان قازاقستان – بۇل، ەڭ الدىمەن، ەلباسىنىڭ ارقاسى. ەلباسى – قازاق مەملەكەتىنىڭ نەگىزىن قالاۋشى ۇلى تۇلعا. ول جاھاندىق دەڭگەيدەگى مەملەكەت قايراتكەرى. الەم تاريحىنا ءدال وسىلاي جازىلدى. ەلباسىنىڭ حالقىمىز ءۇشىن جانە الەم قاۋىمداستىعى ءۇشىن سىڭىرگەن وراسان زور ەڭبەگىن ارقاشان قۇرمەتتەۋ – بارىمىزگە ورتاق پارىز»، – دەپ اتاپ ءوتتى ەل پرەزيدەنتى.

ءوز كەزەگىندە مەملەكەت باسشىسى حالىقتى تولعاندىرىپ جۇرگەن ماڭىزدى ماسەلەلەرگە توقتالىپ، ولاردى شەشۋ ءۇشىن ناقتى جۇمىستاردى قولعا الۋ قاجەتتىگىن تىلگە تيەك ەتتى. ياعني، ورتامەرزىمدى كەشەندى شارالار قابىلداۋ قاجەت. كوتەرىلگەن ماسەلەلەردى جيناقتاي كەلە قر پرەزيدەنتى قاسىم-جومارت كەمەلۇلى ماڭىزدى 10 باعىتقا باسا ءمان بەرۋدى سۇرادى. پرەزيدەنت ۇسىنعان العاشقى باعىت – حالىقتىڭ تابىسىن ارتتىرۋ. مەملەكەت باسشىسى بۇل ماسەلەنى تۇراقتى جانە قارقىندى ەكونوميكالىق ءوسىم ارقىلى عانا شەشۋگە بولاتىنىن جەتكىزدى. «ەڭ الدىمەن، ءوسىم بىزگە نە ءۇشىن قاجەت ەكەنىن تەرەڭ ءتۇسىنۋىمىز كەرەك. ازاماتتارىمىز ءوز ەلىندە الاڭسىز ءومىر ءسۇرىپ، ەڭبەك ەتىپ، ۇرپاعىن تاربيەلەپ، حالقىمىزدىڭ جەتىستىكتەرىنە بىرگە قۋانىپ، ماقتان تۇتۋ ءۇشىن ەكونوميكالىق ءوسىم بولۋى ءتيىس.

تاياۋ ارادا ۇكىمەتتىڭ كەڭەيتىلگەن وتىرىسىندا ءبىز ەلىمىزدىڭ الەۋمەتتىك-ەكونوميكالىق دامۋىنا ارنالعان ناقتى مىندەتتەردى ايقىندايمىز»، – دەيدى قاسىم-جومارت كەمەلۇلى.

ەكىنشى باعىت سىبايلاس جەمقورلىقتى جويۋعا ارنالادى. «ءبىرىنشى قىركۇيەككە دەيىن جەمقورلىقتىڭ دەڭگەيىن مەيلىنشە تومەندەتۋگە باعىتتالعان رەفورمالار توپتاماسى دايىندالادى. جەمقورلىق – مەملەكەتتىڭ دامۋىن تەجەيتىن كەسەل. بۇل قوعامداعى ءوزارا سەنىمگە، جالپى مەملەكەتىمىزدىڭ قاۋىپسىزدىگىنە قاتەر توندىرەتىن قۇبىلىس. سىبايلاس جەمقورلىققا قارسى جۇيەلى جۇمىس جۇرگىزەمىز»، – دەپ اتاپ ءوتتى مەملەكەت باسشىسى. قر پرەزيدەنتى سوت جانە قۇقىق قورعاۋ جۇيەسىن رەفورمالاۋعا دا ايرىقشا نازار اۋدارىپ وتىر. «سوت – زاڭ ۇستەمدىگىنىڭ كەپىلى. سوندىقتان سۋديالاردىڭ جوعارى كاسىبي جانە ادامگەرشىلىك تالاپتارىنا ساي بولۋى – بۇل ۇلكەن مىندەت. سۋديالار مەن وسى قىزمەتكە ۇمىتكەرلەردى باعالاۋ جانە ىرىكتەۋ جۇيەسىن قاتاڭداتۋ كەرەك. سوت – ادىلدىكتىڭ سوڭعى شەگى بولۋى ءتيىس. قۇقىق قورعاۋ جۇيەسىنىڭ باستى مىندەتى – حالىقتىڭ سەنىمىنە يە بولۋ»، – دەدى پرەزيدەنت.

مەملەكەت باسشىسى جاڭا جۇمىس ورىندارىن اشۋ جانە حالىقتى لايىقتى جالاقىمەن قامتۋ ماسەلەسىن ماڭىزدى باعىتتاردىڭ ءبىرى رەتىندە اتاپ ءوتتى. بۇل رەتتە مەملەكەتتىك بيۋدجەتتىڭ قاراجاتىن، ەڭ الدىمەن كەلەشەگى زور ماقساتتارعا جانە جاڭا جۇمىس ورىندارىن اشۋعا ءبولۋ قاجەتتىگى ايتىلدى. كەلەسى باعىت – تۇرعىن ءۇي ماسەلەسىن شەشۋ. «ءتۇرلى ساناتتاعى ازاماتتاردىڭ قولجەتىمدى باسپاناعا يە بولۋىنا ايرىقشا نازار اۋدارامىن. ءبىزدىڭ الدىمىزدا بىرىڭعاي تۇرعىن ءۇي ساياساتىن جاساقتاۋ مىندەتى تۇر. ۇكىمەت وسى باعىتتا ناقتى شارالار قابىلدايدى»، – دەدى قاسىم-جومارت كەمەلۇلى.

بۇدان بولەك مەملەكەت باسشىسى ادام كاپيتالىن دامىتۋ ساياساتىن جالعاستىراتىنىن ايتا كەلە، ءبىلىم بەرۋ مەن مەديتسينالىق قىزمەت كورسەتۋ ساپاسىن ارتتىرۋعا ەرەكشە نازار اۋدارىلاتىنىنا توقتالدى. سونداي-اق، مۇعالىمدەر مەن دارىگەرلەردىڭ مارتەبەسىن كوتەرەتىن جاڭا زاڭدار قابىلداناتىندىعىن تىلگە تيەك ەتتى. وڭىرلەردى دامىتۋ ماسەلەسى دە پرەزيدەنت نازارىنان تىس قالعان جوق. مەملەكەت باسشىسى ەرەكشە نازار اۋدارعان باعىتتاردىڭ ءبىرى – «رۋحاني جاڭعىرۋ» قۇندىلىقتارى. «تاريحقا قۇرمەتپەن قاراۋ، وتانعا ادال بولۋ، عىلىم-بىلىمگە دەگەن ۇمتىلىس – مۇنىڭ بارلىعى ءبىزدىڭ حالقىمىزدىڭ بويىنداعى اسىل قاسيەتتەر. بۇل قاسيەتتەر ءبىزدىڭ حالقىمىزدىڭ بىرلىگىن جانە ۇلتىمىزدىڭ جاسامپازدىعىن نىعايتادى، باسەكەگە قابىلەتتى ەل بولۋعا جول اشادى»، – دەپ اتاپ ءوتتى پرەزيدەنت.

سونداي-اق، قاسىم-جومارت كەمەلۇلى قازاقستاننىڭ سىرتقى ساياساتتاعى الار ورنىنا توقتالىپ، ونىڭ الداعى ۋاقىتتا ەلگە، ۇلتتىق كاسىپكەرلىككە، ءار ازاماتقا تيگىزەر پايداسى بارىن ايتتى. ونىنشى باعىت رەتىندە جاستار ماسەلەسى باستى نازارعا الىندى. «سىزدەر قازاقستان دامۋىنىڭ قارساڭىندا شەشۋشى ءرولدى اتقارىپ وتىرسىزدار. ويتكەنى دامۋدىڭ قوزعاۋشى كۇشى – جاستار. مەنىڭ مىندەتىم – ەڭ ۇلكەن ارماندارىڭىز بەن وزدەرىڭىزگە ءتان «جەتىستىك تاريحىن» قالىپتاستىرۋ بولماق»، – دەدى پرەزيدەنت.

ءسوز سوڭىندا مەملەكەت باسشىسى الدىمىزدا ماڭىزدى مىندەتتەر تۇرعانىن ايتىپ، ەل بولاشاعىنىڭ جارقىن بولارىنا سەنىم ءبىلدىردى. «ءبىز بابالار ءداستۇرىن قاستەرلەيتىن، جاھاننىڭ وزىق جەتىستىكتەرىنە ۇمتىلاتىن حالىقپىز. بۇل – ءبىزدىڭ كۇش-قۋاتىمىزدىڭ دىڭگەگى. ءبىز الدىمىزداعى بارلىق قيىندىقتاردى بىرگە ەڭسەرەمىز. ءبىز قۋاتتى ءارى گۇلدەنگەن قازاقستاننىڭ وركەندەۋى ءۇشىن بىرگە ەڭبەك ەتەمىز. انتقا ادال بولۋ، سەرتكە بەرىك بولۋ – مەنىڭ حالىق الدىنداعى پارىزىم. قازاقستاننىڭ جارقىن بولاشاعى ءۇشىن، حالىق ءۇشىن ايانباي ەڭبەك ەتۋگە سەرت بەرەمىن»، – دەپ قورىتىندىلادى ءوز ءسوزىن قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ.

ايتا كەتەيىك، ۇلىقتاۋ ءراسىمى اياقتالعاننان كەيىن قازاقستان پرەزيدەنتى – قر قارۋلى كۇشتەرىنىڭ جوعارعى باس قولباسشىسى قاسىم-جومارت توقاەۆ تاۋەلسىزدىك سارايى الدىندا قر قك وكىلدەرىنىڭ سالتاناتتى شەرۋىن قابىلدادى.

سوڭعى جاڭالىقتار