10 ماۋسىم 2019, 15:17 659 0 قاۋىپسىزدىك دينارا مىڭجاسارقىزى

قازاقستاندا اەس سالىنا ما؟

قازاقستاندا اتوم ەلەكتر ستانساسى قۇرىلىسى مۇمكىندىگىن زەرتتەۋ كەزەڭى ءجۇرىپ جاتىر. بۇل تۋرالى پارلامەنت ماجىلىسىندەگى ۇكىمەت ساعاتىنىن كەيىن تىلشىلەرگە ەنەرگەتيكا ءمينيسترى قانات بوزىمباەۆ ءمالىم ەتتى.

«قازاقستاندا اتوم ستانساسى قۇرىلىسى بويىنشا ەشقانداي شەشىم قابىلدانباعانى تۋرالى تاعى دا قاداپ ايتامىن. قازاقستاندا ءبىز ستانسا قۇرىلىسىنىڭ مۇمكىندىگىن زەرتتەۋ كەزەڭىن اتقارۋدامىز. ونىڭ ىشىندە تەحنولوگيالاردى وندىرەتىن ەلدەردەن ءتيىستى مالىمەتتەردى سۇراستىرۋدامىز. بۇل تۇرعىدا تەحنيكالىق سيپاتتامالار، باعا دەڭگەيى بويىنشا زەرتتەۋ جۇرۋدە»، - دەدى بوزىمباەۆ. ونىڭ سوزىنە قاراعاندا، ۇكىمەت پەن «سامۇرىق-قازىنا» كومپانياسى بۇل ماسەلەنى پىسىقتاعاننان كەيىن، ونى قوعام تالقىسىنا شىعارۋ مۇمكىندىگى بولادى. «وزدەرىڭىز بىلەسىزدەر، پرەزيدەنت قاسىم-جومارت توقاەۆ سەمەيگە ساپارى بارىسىندا بۇل ماسەلە قوعامدىق پىكىردى ەسكەرە وتىرىپ شەشىلەتىنىن ايتتى»، - دەدى ۆەدومستۆو باسشىسى. ەسكە سالساق، بيىل ءساۋىر ايىندا سەمەي قالاسىنىڭ زيالى قاۋىم وكىلدەرىمەن كەزدەسكەن مەملەكەت باسشىسى قاسىم-جومارت توقاەۆ اتوم ەلەكتر ستانساسىنىڭ قۇرىلىسىنا قاتىستى ويىمەن ءبولىستى.

«بۇعان قوسا، ەل حالقىنىڭ باسىم بولىگىنىڭ پىكىرى ەسكەرىلمەستەن اەس  قۇرىلىسى تۋرالى شەشىم قابىلدانبايدى. بۇل بۇكىل حالقىمىزدىڭ مۇددەسىنە  قاتىستى بار بارىنشا وزەكتى ماسەلە جانە ولاردىڭ پىكىرلەرى قاپەرگە الىنادى»، - دەدى ق.توقاەۆ. بۇدان بۇرىن حابارلانعانداي، بيىل كوكتەمدە قر ەنەرگەتيكا ءمينيسترى قانات بوزىمباەۆ رەسەيلىك تاراپتىڭ قازاقستاندا اتوم ەلەكتر ستانساسىن سالۋ ۇسىنىسىنا قاتىستى پىكىر بىلدىرگەن ەدى.

سوڭعى جاڭالىقتار